அண்ணா என்ற பசு மீது அமர்ந்திருக்கும் காக்கா.. திமுக குறித்து அண்ணாமலை!

Annamalai Targets DMK: திமுக நிறுவனர் அண்ணா என்ற பசு மீது அமர்ந்திருக்கும் காக்கா தான் இன்றைய திமுக என விமர்சித்துள்ளார் பாரதிய ஜனதா கட்சியின் முன்னாள் தலைவர் அண்ணாமலை.

தமிழக பா.ஜ.க முன்னாள் தலைவர் கு. அண்ணாமலை

BySaranya JK

Published on: February 3, 2026 at 4:26 pm

Updated on: February 3, 2026 at 4:27 pm

சென்னை பிப்ரவரி 3, 2026; திமுக நிறுவனர் அண்ணா ஆட்சியில், ஊழல் இல்லை என கூறிய தமிழக பாரதிய ஜனதா கட்சியின் முன்னாள் தலைவர் அண்ணாமலை, ” அண்ணா என்ற பசு மீது அமர்ந்திருக்கும் காக்கா தான் இன்றைய திமுக” எனவும் விமர்சித்தார்.
தொடர்ந்து இன்றைய திமுக ஆட்சி மக்களிடமிருந்து பிடுங்கி தின்கிறது; அண்ணாவின் குடும்பம் அரசியல் பக்கமே வரவில்லை.

ஆனால் இன்று முதல்வர் அவரது மகன் பேரன் என அனைவரும் அரசியலுக்கு வந்து அண்ணாவின் வழியை பின்பற்றுகிறோம் எனக் கூறுகிறார்கள். இதை எப்படி ஏற்றுக் கொள்ள முடியும்? அன்று ஊழல் இல்லை இன்று ஊழல் இருக்கிறது” என்றார்.

அமைச்சர்களுக்கு அண்ணாவைப் பற்றி தெரியாது

தொடர்ந்து திமுக அமைச்சர்களை விமர்சித்த அண்ணாமலை, ” திமுக அமைச்சர்களுக்கு அண்ணாவைப் பற்றி எதுவும் தெரியாது; அவரைப் பற்றி ஒரு பத்து வரிகள் எழுதுங்கள் என்று சொன்னால் திணறுவார்கள். அண்ணா அண்ணா என அவரது பிறந்த நாள் மற்றும் நினைவு நாளில் மட்டும் பேசுவார்கள்” என்றார்.

தேர்தல் பொறுப்பு குறித்து விளக்கம்

தேர்தல் தொகுதி பொறுப்பு குறித்து விளக்கம் அளித்த அண்ணாமலை, “கட்சித் தலைவர் நயினார் நாகேந்திரனுக்கு நான் வேண்டுகோள் விடுத்துள்ளேன்; இந்த நேரத்தில் என் தந்தையின் உடல்நிலையை நான் பார்த்துக்கொள்ள வேண்டும்; எனவேதான் அதிகமாக கோவை பகுதியில் இருக்கிறேன்; தந்தை டயாலிசிஸில் இருக்கிறார்; அவரை பார்த்துக்கொள்வது எனது முதல் கடமை

அதனால், அடிப்படை வேலைகளை என்னால் செய்வதற்கான சாத்தியக்கூறுகள் இல்லை; அதிகமாக டிராவல் செய்ய முடியாது என்ற வேண்டுகோளை வைத்துள்ளேன்; கட்சியும் அதனை ஏற்றுக்கொண்டு வேறுவேறு பொறுப்பாளர்களை நியமிப்பார்கள்” என்றார்.

பரப்புரை சொல்வேன்

தொடர்ந்து, “அதேநேரத்தில் பிரசாரம், வேறு என்ன சொல்கிறார்களோ அதை செய்யத் தயாராக இருக்கிறேன்; கட்சி, பாஜக வேட்பாளர்களுக்கு என்ன வேலை செய்ய வேண்டும். அதிமுக உட்பட கூட்டணி கட்சிக்கு என்ன வேலை செய்ய வேண்டும் என்று கட்சி சொல்வதை செய்வோம்” எனவும் தமிழக பாஜக முன்னாள் மாநிலத் தலைவர் அண்ணாமலை பேட்டி அளித்தார்.

இதையும் படிங்க; சீரழித்த சினிமா.. டீ கடையில் வேலை.. சென்னையில் தாய்-மகனுக்கு நேர்ந்த கொடுமை!