ஆசிய விளையாட்டு மல்யுத்தம்.. தங்கம் வென்ற சுஜித்!

Sujeet Kalkal: 2026 ஆசிய விளையாட்டுப் போட்டியில் இந்திய மல்யுத்த வீரர் சுஜீத் கல்கல் ஆடவர் 65 கிலோ ஃப்ரீஸ்டைல் பிரிவில் தங்கப் பதக்கம் வென்றார்.

சுஜீத் கல்கல்

ByPunitha Rajesh

Published on: October 3, 2026 at 12:43 pm

டோக்கியோ, அக்.3, 2026: 2026 ஆசிய விளையாட்டுப் போட்டியில் இந்திய மல்யுத்த வீரர் சுஜீத் கல்கல் ஆடவர் 65 கிலோ ஃப்ரீஸ்டைல் பிரிவில் தங்கப் பதக்கம் வென்றார்.

ஜப்பானின் நகோயாவில் நடைபெற்ற இறுதிப்போட்டியில் தஜிகிஸ்தானின் அப்துல்மஜித் குடியேவ் 9-2 என முன்னிலை பெற்றிருந்த நிலையில், சுஜீத் அடுத்தடுத்து 8 புள்ளிகளைப் பெற்று 10-9 என்ற கணக்கில் பரபரப்பான வெற்றியை பதிவு செய்தார். இதன் மூலம் இந்தப் பிரிவில் தனது முதல் ஆசிய விளையாட்டு தங்கத்தை சுஜீத் கைப்பற்றினார்.

இறுதிப்போட்டிக்கு முன்னதாக சுஜீத், காலிறுதியில் ஈரானின் அப்பாஸ் இப்ராஹிம்சாதேவை 10-0 என்ற தொழில்நுட்ப மேன்மையில் வீழ்த்தினார். அரையிறுதியில் பாரிஸ் ஒலிம்பிக் சாம்பியனான ஜப்பானின் கொட்டாரோ கியூகாவை 3-3 என்ற கணக்கில் சமன் செய்து, அதிக புள்ளி பெற்ற நகர்வின் அடிப்படையில் வெற்றி பெற்று இறுதிக்கு முன்னேறினார். ஆப்கானிஸ்தானின் சயீத் ஓமர் ஜசாயையும் 13-3 என்ற கணக்கில் வீழ்த்தியிருந்தார்.

இதனிடையே, இந்திய வீராங்கனை தீபான்ஷி போகத் மகளிர் 50 கிலோ ஃப்ரீஸ்டைல் பிரிவில் வெண்கலப் பதக்கத்துக்கான போட்டியில் கஜகஸ்தானின் செய்னிப் பயனோவாவிடம் 4-11 என்ற கணக்கில் தோல்வியடைந்தார். முன்னதாக ஜப்பானின் யுயி சுசாகியிடம் தோல்வியடைந்த தீபான்ஷி, ரெப்பேஜ் சுற்றில் கம்போடியாவின் சம்நாங் டிட்டை 10-0 என வீழ்த்தி வெண்கலப் போட்டிக்கு தகுதி பெற்றிருந்தார். ஆனால் இறுதியில் பதக்கம் வெல்லும் வாய்ப்பை இழந்தார்.

இதையும் படிங்க : 44 ஆண்டுக்கு பின் திரும்பிய வரலாறு.. ஹாக்கியில் தங்கப் பதக்கம் வென்ற மகளிர் அணி!