3வது முறையாக ஆசிய சாம்பியன்.. ஜப்பானை வீழ்த்திய இந்தியா!

Asian Champions Trophy: ஜப்பானை வீழ்த்தி தொடர்ந்து 3-வது முறையாக ஆசிய சாம்பியன்ஸ் கோப்பையை வென்றது இந்தியா.

இந்தியா வெற்றி

ByPunitha Rajesh

Published on: November 6, 2026 at 1:37 pm

மொஹாலி, நவ.6, 2026: ஆடவர் ஆசிய சாம்பியன்ஸ் டிராபி ஹாக்கி தொடரின் இறுதிப்போட்டியில் இந்திய அணி 4-1 என்ற கோல் கணக்கில் ஜப்பானை வீழ்த்தி சாம்பியன் பட்டத்தை வென்றது. பஞ்சாப் மாநிலம் மொஹாலியில் நடைபெற்ற இந்தப் போட்டியில் வெற்றி பெற்றதன் மூலம், இந்திய அணி தொடர்ந்து மூன்றாவது முறையாக கோப்பையைக் கைப்பற்றியுள்ளது.

போட்டியின் தொடக்கத்திலேயே ஜப்பான் அணி ஆதிக்கம் செலுத்தி 3-வது நிமிடத்தில் கசுமாசா மட்சுமோட்டோ மூலம் முதல் கோல் அடித்தது. இதனால் முதல் பாதி ஆட்டத்தின் முடிவில் இந்திய அணி 0-1 என்ற கணக்கில் பின்தங்கியிருந்தது.

இரண்டாவது பாதியில் அதிரடியாக விளையாடிய இந்திய அணி, 42-வது நிமிடத்தில் ஷிலானந்த் லக்ரா மூலம் முதல் கோலை அடித்து ஆட்டத்தைச் சமன் செய்தது. தொடர்ந்து 48-வது நிமிடத்தில் தில்பிரீத் சிங், 53-வது நிமிடத்தில் ஜுக்ராஜ் சிங், 54-வது நிமிடத்தில் விவேக் சாகர் பிரசாத் ஆகியோர் அடுத்தடுத்து கோல் அடித்து இந்திய அணியின் வெற்றியை உறுதி செய்தனர்.

இதன் மூலம் இந்திய அணி ஆசிய சாம்பியன்ஸ் டிராபி வரலாற்றில் 6-வது முறையாக சாம்பியன் பட்டத்தைக் கைப்பற்றி சாதனை படைத்துள்ளது. இதற்கு முன்பு 2011, 2016, 2018, 2023 மற்றும் 2024 ஆகிய ஆண்டுகளில் இந்தியா கோப்பையை வென்றுள்ளது. மேலும், இந்தத் தொடரில் விளையாடிய 7 போட்டிகளிலும் வெற்றி பெற்று தோல்வியின்றி இந்திய அணி சாம்பியன் பட்டத்தைத் தக்கவைத்துள்ளது.

இதையும் படிங்க : இந்திய டென்னிஸில் புதிய நம்பிக்கை நட்சத்திரம் மாயா ராஜேஸ்வரன்.. அதிரடி ஆட்டத்தால் முன்னேற்றம்!