சத்தீஸ்கர் மதுபான ஊழல்.. மாஜி முதலமைச்சர் மகன் கைது ஏன்?

Chhattisgarh liquor scam: சத்தீஸ்கர் மதுபான ஊழலில் முன்னாள் காங்கிரஸ் முதலமைச்சர் பூபேஷ் பாகேல் மகன் சைதன்யா கைது செய்யப்பட்டது ஏன்?

சத்தீஸ்கர் மதுபான ஊழல் வழக்கில் சைதன்யா கைது

ByPushpa Gopinath

Published on: July 20, 2025 at 2:21 pm

ராய்ப்பூர், ஜூலை 20 2025: சத்தீஸ்கர் மாநிலத்தின் முன்னாள் முதலமைச்சர் பூபேஷ் பாகேலின் மகன் சைதன்யாவை வெள்ளிக்கிழமை (ஜூலை 18 2025) அமலாக்க இயக்குநரகத்தால் கைது செய்யப்பட்டார்.
அவர் மீது ரூ.2,161 கோடி மதிப்பிலான மதுபான ஊழல் குற்றச்சாட்டு எழுந்துள்ளது. இந்த நிலையில், சைதன்யா ராய்ப்பூரில் உள்ள சிறப்பு பணமோசடி தடுப்புச் சட்டம் (PMLA) நீதிமன்றத்தில் ஆஜர்படுத்தப்பட்டு, 5 நாள்கள் அமலாக்கத் துறை காவலில் வைக்கப்பட்டுள்ளார்.

மதுபான ஊழல் என்ன?

காங்கிரஸ் தலைமையிலான மாநில அரசாங்கத்தின் கீழ் 2019 மற்றும் 2022 க்கு இடையில் மதுபான ஊழல் நடந்ததாகக் கூறப்படுகிறது. இந்த ஊழலினால் மாநிலத்தின் கருவூலத்திற்கு எந்தப் பணமும் வரவில்லை என்றும் இதனால் மாநில அரசுக்கு ரூ.2,161 கோடி இழப்பு ஏற்பட்டதாகவும் குற்றம் சாட்டப்பட்டுள்ளது.

இந்த நிலையில், சத்தீஸ்கரின் பொருளாதார குற்றப் பிரிவு/ஊழல் தடுப்புப் பிரிவு (EOW/ACB) பதிவு செய்த முதல் தகவல் அறிக்கையை (FIR) தொடர்ந்து, ஏப்ரல் 2024 இல் அமலாக்க வழக்கு தகவல் அறிக்கை ECIR-ஐ ED பதிவு செய்தது.

சைதன்யா மீதான குற்றச்சாட்டு என்ன?

இந்த வழக்கில் குற்றவாளிகளில் ஒருவரான லட்சுமி நாராயண் பன்சால் என்கிற பப்புவின் வாக்குமூலத்தில் சைதன்யா சம்பந்தப்பட்டிருப்பதாக அமலாக்கத் துறை தெரிவித்துள்ளது. மதுபான ஊழலில் இருந்து ரூ.1,000 கோடிக்கு மேல் பணத்தை சைதன்யாவுடன் இணைந்து கையாடியதாக பப்பு கூறியுள்ளார்.

பப்புவின் கூற்றுப்படி, அன்வர் தேபரிடமிருந்து நிதியை திபென் சாவ்டா மூலம் சேகரித்து, பின்னர் முன்னாள் காங்கிரஸ் பொருளாளர் ராம் கோபால் அகர்வாலுக்கு வழங்குவார் எனத் தெரிவிக்கப்பட்டுள்ளது.
மேலும், இவர்கள் அனைவரும் சைதன்யாவுடன் ஒருங்கிணைந்து செயல்படுவார்கள் என்றும் சைதன்யாவின் உத்தரவின் பேரில் கே.கே. ஸ்ரீவஸ்தவாவுக்கு ரூ.80-100 கோடி வழங்கியதாகவும் பப்பு வாக்குமூலம் அளித்துள்ளார்.

தொடர்ந்து, இந்த மோசடியில் இருந்து பெறப்பட்ட சட்டவிரோத பணம், சைதன்யாவின் “விட்டல் கிரீன் ப்ராஜெக்ட்” என்ற திட்டத்தை அவரது நிறுவனமான பாகேல் டெவலப்பர்ஸ் மூலம் கட்ட பயன்படுத்தப்பட்டதாகவும் அமலாக்கத் துறை கூறியுள்ளது. மேலும், இந்த திட்டத்தின் உண்மையான செலவு ரூ.13-15 கோடிக்கு பதிலாக ரூ.7.14 கோடி என தவறாகக் குறைத்து மதிப்பிடப்பட்டுள்ளதாக இந்தத் திட்டத்துடன் தொடர்புடைய ஒரு சாட்சி அமலாக்கத் துறையிடம் தெரிவித்ததாக கூறப்படுகிறது.

சைதன்யா வழக்கறிஞர் பேட்டி

இந்த நிலையில், சைதன்யாவின் வழக்கறிஞர் பைசல் ரிஸ்வி, இந்த வழக்கு 2022 முதல் நடந்து வருவதாகவும், ஆனால் நீதிமன்றத்தில் தாக்கல் செய்யப்பட்ட அமலாக்கத் துறையின் நான்கு வழக்குரைஞர் புகார்களில் அவரது கட்சிக்காரரின் பெயர் ஒருபோதும் குறிப்பிடப்படவில்லை என்றும் கூறினார்.
மேலும், சைதன்யாவின் வீட்டில் முதல் சோதனை இந்த ஆண்டு மார்ச் 10 ஆம் தேதி நடந்ததாகவும், ஆனால் பணமோசடி சட்டத்தின் கீழ் அவரை விசாரிக்க எந்த சம்மனும் அனுப்பப்படவில்லை என்றும் அவர் சுட்டிக்காட்டினார் என்பது குறிப்பிடத்தக்கது.

இதையும் படிங்க : மகாராஷ்டிரா சட்டப்பேரவையில் ரம்மி விளையாடிய அமைச்சர்; எதிர்க்கட்சிகள் கடும் விமர்சனம்!