பாராளுமன்றத்தில் அதிகாரம் இழக்கும் மம்தா பானர்ஜி? பரபரப்பு தகவல்கள்!

Mamata Banerjee : பாராளுமன்றத்தில் மம்தா பானர்ஜி தனது அதிகாரத்தை இழக்கவுள்ளார் என்ற தகவல் வெளியாகியுள்ளது. இது, அரசியல் வட்டாரத்தில் பெரும் பரபரப்பை ஏற்படுத்தியுள்ளது.

மம்தா பானர்ஜி

ByJayakrishnan R

Published on: June 6, 2026 at 11:17 am

Updated on: June 6, 2026 at 11:18 am

கொல்கத்தா, ஜூன் 6, 2026: மம்தா பானர்ஜி தலைமையிலான திரிணமூல் காங்கிரஸ் (டி.எம்.சி) கட்சியில் ஏற்பட்ட கிளர்ச்சி, பாராளுமன்றத்திற்கும் பரவக்கூடும் என்ற அச்சம் எழுந்துள்ளது. ரிதாப்ரதா பானர்ஜியை ஆதரித்து 60-க்கும் மேற்பட்ட எம்.எல்.ஏ.க்கள் கட்சித் தலைமையை எதிர்த்து செயல்பட்ட நிலையில், இதே போன்று லோக்சபா மற்றும் ராஜ்யசபாவிலும் அதிருப்தி உருவாகும் வாய்ப்பு இருப்பதாகக் கூறப்படுகிறது.

திரிணாமுல் காங்கிரஸ் உள்கட்சி பிரச்னை

மேற்கு வங்க சட்டமன்றத்தில் 80 எம்.எல்.ஏ.க்களில் சுமார் 60 பேர் ரிதாப்ரதா பானர்ஜியை எதிர்க்கட்சித் தலைவராக ஆதரித்தது, கட்சிக்குள் பெரிய அதிர்வலை ஏற்படுத்தியது. இதே போன்று, லோக்சபா மற்றும் ராஜ்யசபாவில் உள்ள திரிணாமுல் காங்கிரஸ் கட்சி எம்.பி.க்களும் அதே பாதையைத் தேர்வு செய்யக்கூடும் என கட்சியின் மூத்த எம்.பி. சுகேந்து சேகர் ராய் எச்சரித்துள்ளார்.

மம்தாவுக்கு இன்னும் விசுவாசம்

இதற்கிடையில், கிளர்ச்சியாளர்கள் ரிதாப்ரதாவை ஆதரித்தாலும், மம்தா பானர்ஜியை “சுப்ரீம் லீடர்” எனக் கருதி அவரின் தலைமையில் செயல்பட விரும்புவதாக தெரிவித்துள்ளனர். இது பற்றி, “மம்தா ஆலோசகராக மட்டும் இருக்க முடியாது; அவர் எங்கள் தலைவர்” என்று கிளர்ச்சியாளர் எம்.எல்.ஏ.க்கள் வலியுறுத்தினர். இது, கட்சிக்குள் ஏற்பட்ட அதிருப்தியின்போதும், மம்தாவுக்கு இன்னும் வலுவான ஆதரவு இருப்பதை காட்டுகிறது.

மம்தாவின் சமரச முயற்சிகள்

நிலைமை மேலும் மோசமடையாமல் இருக்க, மம்தா பானர்ஜி பல எம்.எல்.ஏ.க்களுடனும் எம்.பி.க்களுடனும் நேரடியாக தொடர்பு கொண்டு, உரையாடலை மீண்டும் தொடங்க முயற்சி செய்கிறார். லோக்சபாவில் 28 எம்.பி.க்களும், ராஜ்யசபாவில் 13 எம்.பி.க்களும் உள்ள நிலையில், ஒவ்வொரு அவையிலும் நம்பகமான எம்.பி. ஒருவரை கிளர்ச்சியாளர்களுடன் தொடர்பு கொள்ளச் செய்துள்ளார் என்ற தகவல் வெளியாகியுள்ளது.

சட்ட ரீதியான தீர்வுக்கு ஏற்பாடு

இதற்கிடையில், ரிதாப்ரதா பானர்ஜி எதிர்க்கட்சித் தலைவராக நியமிக்கப்பட்டது சட்டவிரோதம் எனக் கூறி, திரிணாமுல் காங்கிரஸ் கட்சி தரப்பில் உயர் நீதிமன்றத்தில் மனு தாக்கல் செய்யத் திட்டமிட்டுள்ளது.
இது பற்றி திரிணாமுல் காங்கிரஸ் எம்.பி. கல்யாண் பானர்ஜி, “இது சட்டப்படி செல்லாது; திங்கட்கிழமை நீதிமன்றத்தில் மனு தாக்கல் செய்வோம்” என்றார்.

இதையும் படிங்க : கரப்பான்பூச்சி ஜனதா கட்சி டெல்லி ஆர்ப்பாட்டம்.. சோனம் வாங்சுக் பங்கேற்பு!