பங்குச் சந்தை நீண்டகால முதலீடு வரி ரத்து செய்யப்படுமா? மத்திய அரசு பதில்

Share Market Today : பங்குச் சந்தை முதலீடுகள் மீதான நீண்ட கால மூலதன ஆதாய வரியை (LTCG) ரத்து செய்யும் திட்டம் இல்லை என்று மத்திய அரசு தெளிவுபடுத்தியுள்ளது.

இந்திய பங்குச் சந்தை

BySaranya JK

Published on: July 21, 2026 at 5:03 pm

மும்பை, ஜூலை 21, 2026: பங்குச் சந்தை முதலீடுகள் மீதான நீண்ட கால மூலதன ஆதாய வரியை (LTCG) ரத்து செய்யும் திட்டம் இல்லை என்று மத்திய அரசு தெளிவுபடுத்தியுள்ளது. 2024-25 நிதியாண்டில் இந்த வரி மூலம் ரூ. 1.29 லட்சம் கோடி வசூலிக்கப்பட்டுள்ளது; இது முந்தைய ஆண்டை விட 79% அதிகம். பங்குச் சந்தை பரிவர்த்தனைகளின் அளவு அதிகரித்ததும், சில்லறை முதலீட்டாளர்களின் பங்கேற்பு பெருமளவு உயர்ந்ததும் இந்த வருவாய் வளர்ச்சிக்கு முக்கிய காரணமாக அமைந்துள்ளது.

2018-ல் மீண்டும் அறிமுகப்படுத்தப்பட்ட எல்.டி.சி.ஜி வரி, 2024-25 பட்ஜெட்டில் 10%-லிருந்து 12.5%-ஆக உயர்த்தப்பட்டதால் வருவாய் வேகமாக வளர்ந்தது. இருப்பினும், வருவாயில் ஏற்பட்டுள்ள 79% வளர்ச்சியை விகித உயர்வால் மட்டுமே விளக்க முடியாது என்று நிபுணர்கள் கூறுகின்றனர். இந்திய பங்குச் சந்தைகளின் வலுவான செயல்பாடு, சில்லறை முதலீட்டாளர்களின் சாதனை அளவிலான பங்கேற்பு மற்றும் லாபத்தை எடுத்துக்கொள்ளும் (profit-booking) நடவடிக்கைகள் வருவாயை அதிகரித்ததாக கருதப்படுகிறது.

மத்திய நிதித்துறை இணையமைச்சர் பங்கஜ் சவுத்ரி, நாடாளுமன்றத்தில் எழுத்துப்பூர்வமாக அளித்த பதிலில், LTCG வரியை ரத்து செய்வது குறித்த எந்த முன்மொழிவும் தற்போது பரிசீலனையில் இல்லை என்று தெரிவித்தார். இதன் மூலம், மூலதனச் சந்தை வருவாய் அரசின் நேரடி வரி வசூலில் முக்கிய பங்காற்றி வருவதை அரசு வலியுறுத்தியுள்ளது.

2024-25 நிதியாண்டில் தனிநபர் வருமான வரி (PIT) 18% அதிகரித்து ரூ. 12.35 லட்சம் கோடியாகவும், நிறுவன வரி 8% அதிகரித்து ரூ. 9.9 லட்சம் கோடியாகவும் இருந்தது. இவற்றுடன் ஒப்பிடுகையில் LTCG வரி வருவாய் மிக வேகமாக வளர்ந்துள்ளது. நிபுணர்கள், வரி விகித உயர்வுடன் சேர்ந்து சந்தைச் செயல்பாடுகள் மற்றும் முதலீட்டாளர்களின் அதிக பங்கேற்பே இந்த சாதனை வருவாய்க்கு காரணம் எனக் கூறுகின்றனர்.

இதையும் படிங்க : பஜாஜ் ஆட்டோ லாபம் ரூ. 3,225 கோடி ஆக உயர்வு.. முதலாம் காலாண்டு அறிக்கை!