வாய்ப்புகள் தாமதமானதும், முயற்சியை கைவிடாதீர்கள்.. நடிகை யாமி கௌதம்!

Yami Gautam: நடிகை யாமி கவுதம், ‘ஆர்ட்டிக்கிள் 370’ திரைப்படத்தில் நடித்ததற்காக தனது முதல் தேசிய திரைப்பட விருதை சிறந்த நடிகைக்கான பிரிவில் பெற்றுள்ளார்.

நடிகை யாமி கவுதம்

ByThilahavathy P

Published on: September 23, 2026 at 11:30 am

புதுடெல்லி, செப்.23, 2026: நடிகை யாமி கவுதம், ‘ஆர்ட்டிக்கிள் 370’ திரைப்படத்தில் நடித்ததற்காக தனது முதல் தேசிய திரைப்பட விருதை சிறந்த நடிகைக்கான பிரிவில் பெற்றுள்ளார். 2024ஆம் ஆண்டு வெளியான இந்தப் படத்தில் யாமியின் நடிப்பு கவனம் பெற்ற நிலையில், 2024ஆம் ஆண்டுக்கான தேசிய திரைப்பட விருதுகள் வழங்கும் விழா செவ்வாய்க்கிழமை குஜராத்தின் ஏக்தா நகரில் நடைபெற்றது. குடியரசுத் தலைவர் திரௌபதி முர்முவிடம் இருந்து யாமி கவுதம் விருதைப் பெற்றுக்கொண்டார்.

விருது வழங்கும் விழாவில் யாமி கவுதம் புன்னகையுடன் மேடைக்கு சென்று, பாரம்பரிய முறையில் ‘நமஸ்தே’ கூறி மரியாதை செலுத்திய பின்னர் விருதைப் பெற்றுக்கொண்டார். அவரது கணவரும் திரைப்பட இயக்குநருமான ஆதித்யா தர் விழாவில் கலந்து கொண்டிருந்தார். யாமி விருது பெறும் தருணத்தை அவர் பார்வையாளர்கள் பகுதியில் இருந்து கவனித்தார். தேசிய விருது கிடைத்தது தன்னுடைய திரைப்பயணத்தில் மிகவும் உணர்வுப்பூர்வமான தருணம் என்று யாமி பின்னர் தெரிவித்தார்.

விருது பெற்ற பிறகு செய்தியாளர்களிடம் பேசிய யாமி கவுதம், இந்த தருணத்தை இன்னும் முழுமையாக உள்வாங்கிக்கொள்ள முயற்சித்து வருவதாக கூறினார். வாழ்நாள் முழுவதும் உழைக்கும் எந்தவொரு கலைஞருக்கும் தேசிய திரைப்பட விருது கிடைப்பது மிகப்பெரிய பெருமையும் கவுரவமும் என்றும் அவர் குறிப்பிட்டார். அதே நேரத்தில், தனது திரைப்பயணத்தில் இன்னும் கற்றுக்கொள்ளவும் சாதிக்கவும் நிறைய இருப்பதாகவும் யாமி தெரிவித்துள்ளார்.

மும்பைக்கு நடிகராக வேண்டும் என்ற கனவுடன் பல்வேறு நகரங்களில் இருந்து வரும் இளைஞர்களுக்கும் யாமி கவுதம் நம்பிக்கை அளிக்கும் வகையில் பேசினார். தன்னைப் போலவே கனவுகளுடன் மும்பைக்கு வரும் அனைவரின் சார்பிலும் தான் பேசுவதாகக் குறிப்பிட்ட அவர், வாழ்க்கை தங்களுக்கு என்ன வைத்திருக்கிறது என்பது ஆரம்பத்தில் தெரியாது என்றார். வாய்ப்புகள் கிடைக்க தாமதமானாலும் தொடர்ந்து முயற்சி செய்து, நல்ல பணிகளை மேற்கொண்டு வந்தால் ஒருநாள் தங்களது கனவு நனவாகும் என்ற நம்பிக்கையையும் அவர் வெளிப்படுத்தினார்.

“நீங்கள் தொடர்ந்து கடினமாக உழைத்துக்கொண்டே இருங்கள்; நல்ல பணிகளைச் செய்துகொண்டே இருங்கள். ஒருநாள் நிச்சயம் இதுபோன்ற தருணம் வரும்” என்ற கருத்தை யாமி கவுதம் பகிர்ந்துகொண்டார். திரைத்துறையில் குடும்பப் பின்னணி இல்லாமல் வாய்ப்புகளைத் தேடி மும்பைக்கு வரும் ஏராளமானோருக்கு அவரது இந்த வார்த்தைகள் ஊக்கமளிக்கும் வகையில் அமைந்துள்ளன. ‘ஆர்ட்டிக்கிள் 370’ படத்திற்காக பெற்றுள்ள தேசிய விருது, யாமி கவுதமின் திரைப்பயணத்தில் முக்கியமான அங்கீகாரமாக அமைந்துள்ளது.

இதையும் படிங்க : ‘தி பாரடைஸ்’ A சான்றிதழ் ஏன்? வன்முறை காட்சிகள் மட்டும் காரணமா? நடிகர் நானி விளக்கம்!