“எனது தென்னிந்திய உச்சரிப்பை ஏற்க 35 ஆண்டுகள் ஆனது!” – ராஷ்மிகாவைப் பாராட்டிய நடிகை மது

Accent Pride: ராஷ்மிகா மந்தனா தனது தென்னிந்திய உச்சரிப்பைத் தன்னம்பிக்கையுடன் ஏற்றுக்கொண்டதை நடிகை மது பாராட்டியுள்ளார்.

மது, ராஷ்மிகா மந்தனா

ByThilahavathy P

Published on: October 26, 2026 at 4:29 pm

மும்பை. அக். 26 2026: நடிகை ராஷ்மிகா மந்தனாவின் தென்னிந்திய உச்சரிப்பு குறித்த விமர்சனங்களுக்கு மத்தியில், நடிகை மது அவருக்கு ஆதரவு தெரிவித்துள்ளார். இயக்குநர் கரண் ஜோஹர் தொகுத்து வழங்கும் ‘காஃபி வித் கரண்’ நிகழ்ச்சியில் ராஷ்மிகா பேசிய விதத்தைப் பாராட்டிய மது, தனது தென்னிந்திய அடையாளத்தையும் உச்சரிப்பையும் ராஷ்மிகா தன்னம்பிக்கையுடன் ஏற்றுக்கொண்டது மகிழ்ச்சியளிப்பதாகக் கூறியுள்ளார்.

சமூக வலைதளத்தில் வெளியிட்ட காணொளியில் பேசிய மது, இந்தி திரைப்படங்களில் நடிக்கத் தொடங்கிய காலத்தில் தென்னிந்தியர் என்பதற்காகத் தன்னை மற்றவர்கள் எவ்வாறு மதிப்பிடுவார்கள் என்ற அச்சம் இருந்ததாகத் தெரிவித்தார். தனது இந்தி உச்சரிப்பை மேம்படுத்துவதற்காக உருது ஆசிரியரிடம் பயிற்சி பெற முயன்றதுடன், உச்சரிப்பில் தவறு ஏற்படாமல் இருக்கக் கடுமையாக உழைத்ததாகவும் அவர் நினைவுகூர்ந்தார்.

மேலும், இந்தி பேசும்போது தென்னிந்திய உச்சரிப்பு வெளிப்பட்டால் முன்பு பதற்றமடைந்ததாகக் கூறிய மது, தற்போது தனது அடையாளத்தைப் பெருமையுடன் ஏற்றுக்கொள்வதாகத் தெரிவித்துள்ளார். இந்த நிலையை அடைய தனக்கு 30 முதல் 35 ஆண்டுகள் ஆனதாகவும், ஆனால் ராஷ்மிகா தனது அடையாளத்தை ஆரம்பத்திலேயே தன்னம்பிக்கையுடன் ஏற்றுக்கொண்டிருப்பது பாராட்டுக்குரியது என்றும் அவர் குறிப்பிட்டுள்ளார்.

இதற்கிடையே, ராஷ்மிகாவின் இந்தி உச்சரிப்பு குறித்த விமர்சனங்களுக்கு மூத்த பாடலாசிரியரும் திரைக்கதை ஆசிரியருமான ஜாவேத் அக்தரும் ஆதரவு தெரிவித்துள்ளார். மொழி உச்சரிப்பை வைத்து ஒருவரை விமர்சிப்பது சரியல்ல எனக் குறிப்பிட்ட அவர், விமர்சிப்பவர்கள் தமிழ் மொழியைச் சரியாக உச்சரிக்க முடியுமா என்றும் கேள்வி எழுப்பியுள்ளார்.

இதையும் படிங்க: அமிதாப் பச்சனின் கேள்வி.. சீதை கதாப்பாத்திரத்தில் நடித்தது குறித்து மனம் திறந்த சாய்பல்லவி!