மார்பகங்களில் கவனிக்க வேண்டிய 6 மாற்றங்கள்.. புற்றுநோய் நிபுணர் எச்சரிக்கை!

6 Breast Cancer Warning Signs: பெண்கள் தங்கள் மார்பகங்களில் கவனிக்க வேண்டிய 6 மாற்றங்கள் குறித்தும், இதுதொடர்பாக புற்றுநோய் நிபுணர் எச்சரிக்கை பற்றியும் பார்க்கலாம்.

மார்பக பராமரிப்பு

ByPushpa Gopinath

Published on: October 27, 2026 at 2:50 pm

சென்னை, அக்.27, 2026: மார்பகங்களில் ஏற்படும் சில மாற்றங்கள் மார்பகப் புற்றுநோயின் அறிகுறிகளாக இருக்கலாம் என்பதால், அவற்றைப் புறக்கணிக்கக் கூடாது என புற்றுநோய் நிபுணர்கள் எச்சரிக்கின்றனர். மார்பகங்களின் அளவு, வடிவம் மற்றும் தோற்றத்தில் திடீரென ஏற்படும் மாற்றங்களைக் கவனித்து, தேவைப்பட்டால் மருத்துவப் பரிசோதனை மேற்கொள்ள வேண்டும் என அறிவுறுத்தப்பட்டுள்ளது.

முதலாவதாக, மார்பகத்தில் புதிதாகக் கட்டி அல்லது தடிமனான பகுதி தோன்றுவது, இரண்டாவதாக ஒரு மார்பகத்தின் அளவு அல்லது வடிவத்தில் மாற்றம் ஏற்படுவது, மூன்றாவதாக தோலில் பள்ளங்கள், சிவத்தல் அல்லது ஆரஞ்சுப் பழத்தோல் போன்ற தோற்றம் உருவாவது ஆகியவை கவனிக்க வேண்டிய முக்கிய அறிகுறிகளாகும்.

நான்காவதாக, முன்பு இயல்பாக இருந்த காம்புகள் திடீரென உள்நோக்கித் திரும்புவது, ஐந்தாவதாக காம்பிலிருந்து ரத்தம் கலந்த அல்லது வழக்கத்திற்கு மாறான திரவம் வெளியேறுவது, ஆறாவதாக நீண்டகாலமாகத் தொடர்ந்து நீடிக்கும் மார்பக மாற்றங்கள் ஆகியவற்றையும் அலட்சியப்படுத்தக் கூடாது. இருப்பினும், இத்தகைய மாற்றங்கள் அனைத்தும் புற்றுநோயைக் குறிக்காது; வேறு காரணங்களாலும் ஏற்படலாம்.

இந்த அறிகுறிகள் தென்பட்டால் வலி ஏற்படும் வரை காத்திருக்காமல் மருத்துவரை அணுக வேண்டும். மருத்துவப் பரிசோதனையின் அடிப்படையில் அல்ட்ராசவுண்ட், மேமோகிராம் அல்லது தேவையானபட்சத்தில் திசுப் பரிசோதனை மேற்கொள்ளப்படலாம். ஆரம்பத்திலேயே கண்டறிவது சரியான சிகிச்சையைத் திட்டமிட உதவும் என்றும், மார்பகங்களின் இயல்பான தோற்றத்தில் ஏற்படும் புதிய மாற்றங்களைப் பெண்கள் தொடர்ந்து கவனிக்க வேண்டும் என்றும் மருத்துவர்கள் வலியுறுத்துகின்றனர்.

இதையும் படிங்க : 2 வயதுக்குட்பட்ட குழந்தைகளுக்கு ஸ்கிரீன் டைம் கூடாது.. தினமும் 3 மணி நேரம் விளையாட்டு: WHO வழிகாட்டுதல் என்ன?