கமல், அமிதாப், ரஜினி இணைந்து நடித்த படம்.. கெராஃப்தார் தெரியுமா?

Kamal Haasan: அமிதாப் பச்சன் ஒரு வார்த்தையைச் சொன்னாலே அது பிளாக்பஸ்டர் அறிமுகமாகிவிடும் என கமல்ஹாசன் புகழாரம் சூட்டியுள்ளார்.

அமிதாப் பச்சன், கமல்ஹாசன்

ByThilahavathy P

Published on: October 13, 2026 at 2:49 pm

சென்னை, அக்.13, 2026: பாலிவுட் சூப்பர் ஸ்டார் அமிதாப் பச்சனின் 84-வது பிறந்தநாளை முன்னிட்டு, நடிகரும் மக்கள் நீதி மய்யம் தலைவருமான கமல்ஹாசன் அவருக்குச் சிறப்பான வாழ்த்துகளைத் தெரிவித்துள்ளார்.

அக்டோபர் 11ஆம் தேதி அமிதாப் பச்சனின் பிறந்தநாளையொட்டி, சமூக வலைதளத்தில் பழைய புகைப்படம் ஒன்றைப் பகிர்ந்த கமல்ஹாசன், அமிதாப் பச்சனின் தனித்துவமான குரல், வசன உச்சரிப்பு, நாடகத்தன்மை மிக்க இடைவெளிகள் மற்றும் புருவத்தை உயர்த்தும் பாவனை ஆகியவற்றைப் பாராட்டியுள்ளார்.

குறிப்பாக, “தேவியோன் அவுர் சஜ்ஜனோ” (Deviyon aur Sajjano) என்ற எளிய வரியைக்கூட அமிதாப் பச்சன் சொன்னால், அது ஒரு பிரம்மாண்டமான திரைப்படத்தின் தொடக்கக் காட்சி போலத் தோன்றும் என்று குறிப்பிட்டுள்ளார். மேலும், அமிதாப் பச்சன் எப்போதும் தனித்துவமான இடத்தில் இருப்பவர் என்றும், அவரை “ஆங்கிரி யங் மேன்” எனக் குறிப்பிட்டுப் பிறந்தநாள் வாழ்த்துகளைத் தெரிவித்துள்ளார்.

கமல்ஹாசனும் அமிதாப் பச்சனும் இந்தியத் திரையுலகில் நீண்டகால அனுபவம் கொண்ட முன்னணி நடிகர்கள். இருவரும் முதன்முதலில் 1985ஆம் ஆண்டு வெளியான இந்தித் திரைப்படமான ‘கெராஃப்தார்’ (Geraftaar) படத்தில் இணைந்து நடித்தனர்.

பிரயாக் ராஜ் இயக்கிய இந்தப் படத்தில் அமிதாப் பச்சன், கமல்ஹாசன் ஆகியோருடன் நடிகர் ரஜினிகாந்தும் இடம்பெற்றிருந்தார். இப்படத்தில் கமல்ஹாசன் கிஷன் குமார் கன்னா என்ற கதாபாத்திரத்திலும், அமிதாப் பச்சன் கரண் குமார் கன்னா என்ற கதாபாத்திரத்திலும் நடித்தனர்.

நீண்ட இடைவெளிக்குப் பிறகு, நாக் அஸ்வின் இயக்கத்தில் 2024ஆம் ஆண்டு வெளியான ‘கல்கி 2898 ஏடி’ திரைப்படத்தில் இருவரும் மீண்டும் ஒரே படத்தில் இடம்பெற்றனர். இதில் அமிதாப் பச்சன் அஸ்வத்தாமனாகவும், கமல்ஹாசன் உச்சயஸ்கின் என்ற எதிர்மறைக் கதாபாத்திரத்திலும் நடித்திருந்தனர்.

அமிதாப் பச்சனின் பிறந்தநாளை முன்னிட்டு கமல்ஹாசன் மட்டுமின்றி, தெலுங்கு திரையுலகின் முன்னணி நடிகர் சிரஞ்சீவியும் அவருக்கு வாழ்த்துகளைத் தெரிவித்துள்ளார். அமிதாப் பச்சனைத் தனது வழிகாட்டியாகக் கருதுவதாகக் குறிப்பிட்ட சிரஞ்சீவி, அவரது சினிமா மீதான அர்ப்பணிப்பும் கலை மீதான மரியாதையும் தமக்கு எப்போதும் உத்வேகம் அளிப்பதாகப் பாராட்டியுள்ளார்.

இதற்கிடையே, ‘கல்கி 2898 ஏடி’ படத்தின் இரண்டாம் பாகத்திலும் கமல்ஹாசனும் அமிதாப் பச்சனும் தங்களது கதாபாத்திரங்களில் மீண்டும் நடிக்க உள்ளனர். பல தலைமுறை ரசிகர்களைக் கவர்ந்துள்ள அமிதாப் பச்சனின் குரல், நடிப்புத் திறன் மற்றும் திரை ஆளுமை இன்றளவும் பேசப்படுவதையே கமல்ஹாசனின் பிறந்தநாள் வாழ்த்துச் செய்தி எடுத்துக்காட்டுகிறது.

இதையும் படிங்க : ராமாயணம் முதல் பாகம் நவ.5 வெளியீடு.. ரசிகர்கள் பெரும் எதிர்பார்ப்பு!