ஜெம் வீரமணி சிறார்கள் வன்கொடுமை வழக்கு.. அருண், கண்ணனிடம் 3 மணி நேரம் விசாரணை!

Gem Veeramani: ஜெம் கிரானைட் வீரமணி சம்பந்தப்பட்ட போக்சோ வழக்கில் முன்னாள் சென்னை காவல் ஆணையர் அருண், கூடுதல் ஆணையர் கண்ணனிடம் 3 மணி நேரம் விசாரணை நடத்தப்பட்டது.

ஜெம் வீரமணி

BySaranya JK

Published on: October 13, 2026 at 2:36 pm

சென்னை, அக்.13, 2026: ஜெம் கிரானைட்ஸ் நிறுவன உரிமையாளர் ஆர். வீரமணி மீதான போக்சோ வழக்குகளைக் கையாண்ட விதம் தொடர்பாக, சென்னை மாநகர முன்னாள் காவல் ஆணையர் ஏ. அருண் மற்றும் முன்னாள் கூடுதல் காவல் ஆணையர் என். கண்ணன் ஆகியோரிடம் சிறப்புப் புலனாய்வுக் குழு (SIT) விசாரணை நடத்தியுள்ளது. திங்கள்கிழமை இருவருக்கும் விசாரணைக்கு ஆஜராகுமாறு அழைப்பு விடுக்கப்பட்ட நிலையில், வீரமணிக்கு எதிராகப் புகார் வந்தபோது காவல்துறை அதிகாரிகள் எடுத்த நடவடிக்கைகள் குறித்து கேள்விகள் எழுப்பப்பட்டன.

விசாரணைக் குழுவினர் வழங்கிய கேள்வித்தாளுக்கு இருவரும் அளித்த பதில்கள் பதிவு செய்யப்பட்டதாகவும், இந்த விசாரணை சுமார் மூன்று மணி நேரம் நடைபெற்றதாகவும் தகவல்கள் தெரிவிக்கின்றன. வீரமணி மீதான புகார்கள் காவல்துறையின் உயர் அதிகாரிகளுக்கு முன்கூட்டியே தெரிவிக்கப்பட்டிருந்ததாகச் செய்திகள் வெளியானதைத் தொடர்ந்து, கடந்த மாதம் அருண் மற்றும் கண்ணன் ஆகியோர் பணியிட மாற்றம் செய்யப்பட்டு கட்டாயக் காத்திருப்போர் பட்டியலில் வைக்கப்பட்டனர்.

இந்த வழக்கின் பின்னணி குறித்து விசாரணை நடத்தப்பட்டு வரும் நிலையில், வீரணிக்கு எதிரான புகார் 2024 நவம்பர் மாதத்திலேயே சென்னை மாநகர காவல்துறையின் உயர் அதிகாரிகளுக்குத் தெரிவிக்கப்பட்டதாகக் கூறப்படுகிறது. அப்போது கூடுதல் காவல் ஆணையராக இருந்த என். கண்ணனிடம் புகார் அளிக்கப்பட்டதாகவும், அவர் அதை அப்போதைய காவல் ஆணையர் அருணின் கவனத்திற்குக் கொண்டு சென்றதாகவும் தகவல்கள் வெளியாகின. இருப்பினும், வீரமணிக்கு எதிராக 2025 அக்டோபரில்தான் முதல் தகவல் அறிக்கை பதிவு செய்யப்பட்டது.

பின்னர், வழக்கில் போதிய ஆதாரங்கள் இல்லை எனக் கூறி காவல்துறை 2026 பிப்ரவரியில் வழக்கை முடிக்க அறிக்கை தாக்கல் செய்தது. ஆனால், அந்த அறிக்கையை ஏற்க மறுத்த சிறப்பு போக்சோ நீதிமன்றம், வழக்கில் தொடர்ந்து விசாரணை நடத்த உத்தரவிட்டது. இதையடுத்து, வீரமணி மற்றும் அவருடன் தொடர்புடையவர்கள் மீதான புகார்கள் குறித்து விசாரணை தீவிரப்படுத்தப்பட்டது. கடந்த ஆகஸ்ட் மாத இறுதியில் வீரமணியும் அவரது கூட்டாளிகள் இருவரும் கைது செய்யப்பட்டனர்.

இதற்கிடையே, வீரமணி மீதான புகார்கள் தொடர்பாக சிறப்புப் புலனாய்வுக் குழு மேலும் ஒரு வழக்கைப் பதிவு செய்துள்ளது. இதன் மூலம் அவருக்கு எதிராகப் பதிவு செய்யப்பட்ட வழக்குகளின் எண்ணிக்கை ஏழாக உயர்ந்துள்ளதாகத் தகவல்கள் தெரிவிக்கின்றன. இந்த வழக்குகளில் புகார்கள் எவ்வாறு கையாளப்பட்டன, ஆரம்பகட்ட விசாரணையில் ஏதேனும் முறைகேடுகள் நடந்தனவா, வழக்கை முடிக்க முயற்சி மேற்கொள்ளப்பட்டதா என்பது உள்ளிட்ட பல்வேறு கோணங்களில் விசாரணை நடைபெற்று வருகிறது.

மேலும், இந்த விவகாரத்துடன் தொடர்புடையதாகக் கூறப்படும் நிதிப் பரிவர்த்தனைகள் குறித்தும் விசாரணை அமைப்புகள் தகவல்களைச் சேகரித்து வருகின்றன. முன்னாள் காவல்துறை உயர் அதிகாரிகளிடம் நடத்தப்பட்டுள்ள விசாரணை, வழக்கைக் கையாண்ட விதம் குறித்த விசாரணையின் ஒரு பகுதியாகும். விசாரணையின் முடிவுகள் மற்றும் சேகரிக்கப்படும் ஆதாரங்களின் அடிப்படையில் அடுத்தகட்ட நடவடிக்கைகள் மேற்கொள்ளப்படும் என எதிர்பார்க்கப்படுகிறது.

இதையும் படிங்க : எஸ்.ஐ.ஆர் போராட்டத்தில் விஜய் பங்கேற்காதது ஏன்? மாணிக்கம் தாகூர் Vs தி.மு.க!