தூத்துக்குடியில் கனமழை, உப்பளங்களில் தேங்கிய நீர்.. 25,000 தொழிலாளர்கள் வாழ்வாதாரம் பாதிப்பு!

Thoothukudi: தூத்துக்குடி மாவட்டத்தில் பெய்து வரும் கனமழையால் உப்பளங்கள் கடுமையாக பாதிக்கப்பட்டுள்ளன.

தூத்துக்குடி உப்பளங்கள்

BySaranya JK

Published on: October 9, 2026 at 12:34 pm

தூத்துக்குடி, அக்.9, 2026: தூத்துக்குடி மாவட்டத்தில் பெய்து வரும் கனமழையால் உப்பளங்கள் கடுமையாக பாதிக்கப்பட்டுள்ளன.

தொடர் மழை காரணமாக உப்பளங்களில் மழைநீர் தேங்கியுள்ளதால், ஏற்கனவே தயாராக இருந்த உப்பு கரைந்து சேதமடைந்துள்ளதாகவும், உற்பத்தி பணிகள் பாதிக்கப்பட்டுள்ளதாகவும் தெரிவிக்கப்பட்டுள்ளது. இதனால் தூத்துக்குடி மாவட்டத்தின் முக்கிய தொழில்களில் ஒன்றான உப்பு உற்பத்தி கடும் பின்னடைவை சந்தித்துள்ளது. மழையால் உப்பளங்கள் சேதமடைந்துள்ள நிலையில், அடுத்த கட்ட உற்பத்தியை தொடங்குவதிலும் உப்பு உற்பத்தியாளர்களுக்கு சிக்கல் ஏற்பட்டுள்ளது.

இந்த மழை பாதிப்பால் தூத்துக்குடி மாவட்டத்தில் உப்பு உற்பத்தியை நம்பியுள்ள 25 ஆயிரத்துக்கும் மேற்பட்ட தொழிலாளர்களின் வாழ்வாதாரம் பாதிக்கப்பட்டுள்ளதாக கூறப்படுகிறது. உப்பளங்களில் வேலைவாய்ப்பு இல்லாத நிலை ஏற்பட்டுள்ளதால், தினக்கூலி அடிப்படையில் பணியாற்றும் தொழிலாளர்கள் வருமானத்தை இழக்கும் சூழலுக்கு தள்ளப்பட்டுள்ளனர்.

உப்பு உற்பத்தியுடன் தொடர்புடைய ஏற்றுமதி, போக்குவரத்து உள்ளிட்ட தொழில்களும் பாதிக்கப்படும் நிலை ஏற்பட்டுள்ளது. தொடர்ந்து மழை நீடித்தால், உப்பளங்களில் மேலும் சேதம் ஏற்பட்டு தொழிலாளர்களின் வாழ்வாதார பாதிப்பு அதிகரிக்கக்கூடும் என கவலை தெரிவிக்கப்பட்டுள்ளது.

தூத்துக்குடி மாவட்டத்தில் உப்பு உற்பத்தி தொழிலைச் சார்ந்துள்ள ஆயிரக்கணக்கான குடும்பங்களின் வாழ்வாதாரத்தை கருத்தில் கொண்டு, மழையால் ஏற்பட்ட சேதங்களை அரசு முறையாக கணக்கிட்டு உரிய நிவாரணம் வழங்க வேண்டும் என உப்பு உற்பத்தியாளர்கள் மற்றும் தொழிலாளர்கள் கோரிக்கை விடுத்துள்ளனர்.

குறிப்பாக உப்பளங்களில் தேங்கியுள்ள மழைநீரை அகற்றுவதற்கும், சேதமடைந்த உற்பத்தி பகுதிகளை சீரமைப்பதற்கும் தேவையான நடவடிக்கைகள் மேற்கொள்ள வேண்டும் என வலியுறுத்தப்பட்டுள்ளது. கனமழை காரணமாக உப்பு உற்பத்தி பாதிக்கப்பட்டுள்ளதால், தொழிலாளர்களின் வாழ்வாதாரத்தை பாதுகாக்க உடனடி நடவடிக்கை அவசியம் எனவும் அவர்கள் தெரிவித்துள்ளனர்.

இதையும் படிங்க : பழனி அருகே அரசுப் பள்ளி குடிநீர் தொட்டியில் மனிதக் கழிவு; அடையாளம் தெரியாத நபர் மீது வழக்கு