GDP Growth: 2026-27 நிதியாண்டின் முதல் காலாண்டில் இந்தியாவின் உண்மையான மொத்த உள்நாட்டு உற்பத்தி (GDP) 7.8 சதவீதம் வளர்ச்சி கண்டுள்ளது. உலகளாவிய பொருளாதார சவால்களுக்கு மத்தியிலும் பதிவான இந்த வளர்ச்சி, இந்திய பொருளாதாரத்தின் வலிமையை வெளிப்படுத்துவதாக பார்க்கப்படுகிறது.
Published on: September 1, 2026 at 3:44 pm
புதுடெல்லி, செப் 1, 2026: இந்தியாவின் பொருளாதாரம் 2026-27 நிதியாண்டின் ஏப்ரல் முதல் ஜூன் வரையிலான முதல் காலாண்டில் 7.8 சதவீதம் வளர்ச்சி அடைந்துள்ளது. மத்திய அரசின் அதிகாரப்பூர்வ புள்ளிவிவரங்களின்படி, முந்தைய நிதியாண்டின் இதே காலாண்டில் பதிவான 6.9 சதவீத வளர்ச்சியுடன் ஒப்பிடுகையில், இது குறிப்பிடத்தக்க முன்னேற்றமாகும். அதே நேரத்தில், முந்தைய காலாண்டில் பதிவான 8.6 சதவீத வளர்ச்சியை விட தற்போதைய வளர்ச்சி சற்று குறைவாக உள்ளது.
இந்த வளர்ச்சிக்கு உற்பத்தி மற்றும் சேவைத் துறைகளின் சிறப்பான செயல்பாடு முக்கிய காரணமாக அமைந்துள்ளது. முதல் காலாண்டில் உற்பத்தித் துறை 9.2 சதவீதமும், சேவைத் துறை 10 சதவீதமும் வளர்ச்சி கண்டுள்ளன. குறிப்பாக நிதி, ரியல் எஸ்டேட், தகவல் தொழில்நுட்பம் மற்றும் தொழில்முறை சேவைகள் உள்ளிட்ட துறைகள் 12.1 சதவீத வளர்ச்சியை பதிவு செய்துள்ளன.
மேலும், முதல் காலாண்டில் உண்மையான மொத்த மதிப்பு கூட்டல் (GVA) 8.2 சதவீதம் வளர்ச்சி கண்டுள்ளது. தனியார் முதலீடு, உள்நாட்டு நுகர்வு, அரசு செலவினம் மற்றும் ஏற்றுமதி உள்ளிட்ட காரணிகள் பொருளாதார வளர்ச்சிக்கு ஆதரவாக இருந்ததாக பொருளாதார ஆய்வுகள் தெரிவிக்கின்றன. இந்திய ரிசர்வ் வங்கி கணித்த 7 சதவீத வளர்ச்சியையும் தற்போதைய 7.8 சதவீத வளர்ச்சி தாண்டியுள்ளது.
மேற்காசியாவில் நிலவும் மோதல், எரிபொருள் விலை உயர்வு உள்ளிட்ட உலகளாவிய சவால்களுக்கு மத்தியிலும் இந்திய பொருளாதாரம் வலுவான வளர்ச்சியை பதிவு செய்துள்ளது. வலுவான உள்நாட்டு பொருளாதார செயல்பாடுகள் தொடர்ந்து நீடித்தால், நடப்பு நிதியாண்டின் ஒட்டுமொத்த வளர்ச்சியும் சிறப்பாக இருக்கும் என பொருளாதார நிபுணர்கள் எதிர்பார்க்கின்றனர்.
இதையும் படிங்க: கோபர்தன் திட்டம் இன்று முதல் அமல்! ரூ.23,731 கோடி முதலீட்டில் உயிரி எரிவாயு உற்பத்தி.. மத்திய அரசு முக்கிய முன்னெடுப்பு
திராவிடன் டைம்ஸின் செய்திகளை உடனுக்குடன் தெரிந்துக்கொள்ள
திராவிடன் டைம்ஸ்.காம் (www.dravidantimes.com) ஆன்லைன் செய்தித்தளம் ஆகஸ்ட் 18 2024ல் தொடங்கப்பட்டது. தமிழ்நாடு, இந்தியா, சர்வதேசம், வணிகம், லைஃப்ஸ்டைல், சினிமா, ஆன்மிகம், தொழில்நுட்பம், கல்வி மற்றும் வேலைவாய்ப்பு என பலதரப்பட்ட செய்திகளை பக்கச்சார்பின்றி வெளியிடுகிறது.
© 2024 dravidantimes.com – developed and designed by Thirdvizion.com
