என்.ஐ.ஏ விசாரணை வளையத்தில் காக்ரோச் ஜனதா பார்ட்டி? நீதிமன்றத்தில் பரபரப்பு மனு!

CJP: காக்ரோச் ஜனதா பார்ட்டி போராட்டம் குறித்து என்.ஐ.ஏ விசாரணை நடத்தக் கோரி நீதிமன்றத்தில் மனுத்தாக்கல் செய்யப்பட்டுள்ளது.

காக்ரோச் ஜனதா பார்ட்டி போராட்டம்

BySaranya JK

Published on: July 23, 2026 at 2:58 pm

Updated on: July 23, 2026 at 2:59 pm

புதுடெல்லி, ஜூலை 23, 2026: டெல்லி உயர் நீதிமன்றம், ‘காக்ரோச் ஜனதா பார்ட்டி’ (சி.ஜே.பி) போராட்டங்கள் குறித்து தேசிய புலனாய்வு முகமை (என்.ஐ.ஏ) விசாரணை கோரும் பொதுநல மனுவை விசாரிக்க ஒப்புதல் அளித்துள்ளது.

மாணவர் போராட்டம் மற்றும் நாடாளுமன்றத்தை நோக்கிய பேரணி காரணமாக டெல்லி முழுவதும் கடும் பாதிப்பு ஏற்பட்டதாக மனுதாரர் தரப்பு வழக்கறிஞர் பருண் குமார் சின்ஹா வாதிட்டார். இதையடுத்து, நீதிமன்றம் அந்த மனுவை வெள்ளிக்கிழமை விசாரணைக்கு எடுத்துக்கொள்ள ஒப்புக்கொண்டது.

மனுதாரரான அகில பாரத இந்து மகாசபையின் முன்னாள் துணைத் தலைவர் சதீஷ் குமார் அகர்வால் சார்பில் ஆஜரான சின்ஹா, போராட்டம் “முழு டெல்லியையும் பிணைக்கைதியாக” மாற்றியதாகவும், சாலைகள் மறிக்கப்பட்டதால் பொதுமக்கள் பெரும் அவதிக்குள்ளாகியிருப்பதாகவும் வலியுறுத்தினார். மேலும், போராட்டங்களின் போது வன்முறை, சொத்து சேதம், அவசர சேவைகளுக்கு இடையூறு போன்ற குற்றங்களில் ஈடுபட்டவர்களை அடையாளம் கண்டு FIR பதிவு செய்யுமாறு கோரினார்.

இந்தப் போராட்டம் மாணவர்களின் உண்மையான பிரச்சினைகளுக்காக நடத்தப்படவில்லை என்றும், மாறாக வெளிநாட்டு சக்திகள் மற்றும் தேசவிரோத அமைப்புகள் நிதி மற்றும் வளங்களைப் பயன்படுத்தி நாட்டின் ஸ்திரத்தன்மையை குலைக்கும் நோக்கத்துடன் திட்டமிட்ட சதியின் ஒரு பகுதியாக இருக்கிறது என்றும் மனுவில் குறிப்பிடப்பட்டுள்ளது. ஜனநாயகக் கட்டமைப்பை சீர்குலைக்கவும், உள்நாட்டு மோதலுக்கான சூழலை உருவாக்கவும் முயற்சிக்கின்றன என்ற குற்றச்சாட்டும் முன்வைக்கப்பட்டுள்ளது.

ஜந்தர் மந்தரில் மாணவர் போராட்டக்காரர்கள் மீது காவல்துறை அத்துமீறல்கள் நடந்ததாகக் கூறப்படும் மனுக்கள் மீதான பதிலைக் கோரிய மறுநாளே, இச்சம்பவம் தனிப்பட்ட நிகழ்வு அல்ல என்று நீதிமன்றம் குறிப்பிட்டது. இதனால், NIA விசாரணை கோரும் மனுவை விசாரிக்க ஒப்புதல் அளிக்கப்பட்டது.

ஜூலை 20 அன்று, தொடர்ச்சியான தேர்வு முறைகேடுகள் மற்றும் வினாத்தாள் கசிவுகள் காரணமாக கல்வி அமைச்சர் தர்மேந்திர பிரதான் ராஜினாமா செய்யக் கோரி, ஜந்தர் மந்தரில் 23 நாட்கள் நீடித்த உண்ணாவிரதப் போராட்டத்திற்குப் பிறகு, CJP அமைப்பால் “சலோ சன்சத்” பேரணி நடத்தப்பட்டது. பல்லாயிரக்கணக்கான போராட்டக்காரர்கள் நாடாளுமன்றத்தை நோக்கிப் பேரணியாகச் சென்றது தலைநகரில் பெரும் தாக்கத்தை ஏற்படுத்தியது.

இதையும் படிங்க : மும்பை போராட்டத்துக்கு இடையூறு செய்தால் அடித்து துவைப்போம்.. ராஜ் தாக்கரே