ஃபேஸ்புக் கருத்தால் மரண தண்டனை.. இலங்கைத் தமிழரின் தண்டனையை ரத்து செய்த சவுதி நீதிமன்றம்!

Saudi Court Verdict: ஃபேஸ்புக் கருத்தால் மரண தண்டனை விதிக்கப்பட்ட நிலையில், இலங்கைத் தொழிலாளியின் தண்டனையை ரத்து செய்துள்ளது சவுதி நீதிமன்றம்.

இலங்கைத் தொழிலாளி அனோஜன் சிவராசா

BySaranya JK

Published on: October 15, 2026 at 1:04 pm

ஜெட்டா, அக்.15, 2026: சமூக வலைதளமான ஃபேஸ்புக்கில் பதிவிட்ட கருத்து தொடர்பாக மரண தண்டனை விதிக்கப்பட்ட இலங்கைத் தொழிலாளி அனோஜன் சிவராசாவின் தண்டனையை சவுதி அரேபிய உச்ச நீதிமன்றம் ரத்து செய்துள்ளது. அக்டோபர் 13ஆம் தேதி இந்தத் தீர்ப்பு வழங்கப்பட்டதாக இலங்கை துணை வெளியுறவு அமைச்சர் அருண் ஹேமச்சந்திரா தெரிவித்துள்ளார். இதன் மூலம் சிவராசாவுக்கு விதிக்கப்பட்டிருந்த மரண தண்டனை அச்சுறுத்தல் நீங்கியுள்ளது.

இலங்கையின் கிழக்கு மாகாணம், அம்பாறை மாவட்டத்தைச் சேர்ந்த சிவராசா, ஃபேஸ்புக்கில் மதம் தொடர்பான விவாதத்தின்போது இஸ்லாம் மற்றும் நபிகள் நாயகம் குறித்து அவமதிப்பதாகக் கருதப்பட்ட கருத்தைப் பதிவிட்டதாகக் கூறப்படுகிறது. பின்னர் அந்தப் பதிவை நீக்கியதுடன், மன்னிப்புக் கோரும் வீடியோவையும் வெளியிட்டார். இருப்பினும், அந்தப் பதிவின் ஸ்கிரீன்ஷாட் சவுதி அதிகாரிகளுக்குச் சென்றதைத் தொடர்ந்து, 2026 ஜூலை மாதம் அவர் கைது செய்யப்பட்டார். முதலில் அவருக்கு ஐந்து ஆண்டுகள் சிறைத்தண்டனையும், 30 லட்சம் சவுதி ரியால் அபராதமும் விதிக்கப்பட்டது. பின்னர் மேல்முறையீட்டு நீதிமன்றம் செப்டம்பர் மாதம் மரண தண்டனையாக உயர்த்தியது.

இந்த விவகாரத்தில் இலங்கை அரசு மேற்கொண்ட தொடர் தூதரக முயற்சிகள் மற்றும் சட்ட நடவடிக்கைகளுக்குப் பிறகு, சவுதி உச்ச நீதிமன்றம் மரண தண்டனையை ரத்து செய்துள்ளது. இதற்காக சவுதி அரசு, இலங்கைத் தூதரகம் மற்றும் இரு நாடுகளின் சட்டக் குழுக்களுக்கு இலங்கை அரசு நன்றி தெரிவித்துள்ளது. எனினும், சிவராசா தொடர்ந்து சிறையில் இருப்பாரா, அவருக்கு வேறு தண்டனை விதிக்கப்படுமா, எப்போது இலங்கை திரும்புவார் என்பது குறித்த விவரங்கள் இன்னும் தெளிவாகவில்லை.

இதையும் படிங்க : ‘மனித வன்முறை முடிவுறும்போது நான் ஓய்வு பெறுவேன்’.. நவி பிள்ளை!