கைமாறிய ஐ.டி.பி.ஐ வங்கி.. மத்திய அமைச்சரவை ஒப்புதல்!

IDBI Bank: ஐடிபிஐ வங்கியை வாங்க ஃபேர்ஃபாக்ஸ் நிறுவனத்துக்கு மத்திய அமைச்சரவை ஒப்புதல் வழங்கியுள்ளது.

ஐ.டி.பி.ஐ வங்கி

BySaranya JK

Published on: October 15, 2026 at 1:15 pm

சென்னை, அக்.15, 2026: கனடாவைச் சேர்ந்த ஃபேர்ஃபாக்ஸ் ஃபைனான்சியல் ஹோல்டிங்ஸ் நிறுவனத்தின் துணை நிறுவனமான கனடா இன்சூரன்ஸ்., இந்தியாவின் ஐடிபிஐ வங்கியில் 60.72 சதவீதப் பங்குகளை ரூ.52,878 கோடிக்கு வாங்குவதற்கு மத்திய அமைச்சரவை ஒப்புதல் அளித்துள்ளது.

அக்டோபர் 14ஆம் தேதி நடைபெற்ற பொருளாதார விவகாரங்களுக்கான அமைச்சரவைக் குழுக் கூட்டத்தில் இந்த முடிவு எடுக்கப்பட்டது. இந்தியாவின் நிதித்துறையில் இதுவரை மேற்கொள்ளப்படும் மிகப்பெரிய நேரடி அந்நிய முதலீடாக (FDI) இந்த ஒப்பந்தம் அமையும் என்று மத்திய அரசு தெரிவித்துள்ளது.

இந்த ஒப்பந்தத்தின்படி, மத்திய அரசின் 30.48 சதவீதப் பங்குகளும், இந்திய ஆயுள் காப்பீட்டுக் கழகத்தின் (LIC) 30.24 சதவீதப் பங்குகளும் விற்பனை செய்யப்பட உள்ளன. ஒரு பங்குக்கு ரூ.81 என்ற விலையில் இந்தப் பரிவர்த்தனை மேற்கொள்ளப்படுகிறது. ஒப்பந்தம் நிறைவடைந்த பிறகு, மத்திய அரசு 15 சதவீதப் பங்குகளையும், எல்ஐசி 19 சதவீதப் பங்குகளையும் தொடர்ந்து வைத்திருக்கும். இதன் மூலம் இரு தரப்பினரின் மொத்தப் பங்கு 34 சதவீதமாக இருக்கும்.

இந்த ஒப்பந்தம் நிறைவடைவதற்கு முன்பு, ஃபேர்ஃபாக்ஸ் நிறுவனம் இந்திய ரிசர்வ் வங்கியின் தகுதி மற்றும் ஒழுங்குமுறை நிபந்தனைகளைப் பூர்த்தி செய்ய வேண்டும். ஐடிபிஐ வங்கியின் நிதிநிலையை மேம்படுத்தவும், தனியார் முதலீடு, நவீன தொழில்நுட்பம் மற்றும் சிறந்த நிர்வாக நடைமுறைகளை அறிமுகப்படுத்தவும் இந்த நடவடிக்கை உதவும் என மத்திய அரசு எதிர்பார்க்கிறது. இருப்பினும், பங்குகள் கைமாறும் நடைமுறை மற்றும் தேவையான ஒழுங்குமுறை அனுமதிகள் நிறைவடைந்த பின்னரே இந்த ஒப்பந்தம் முழுமையடையும்.

இதையும் படிங்க : தங்கம் விலை ஒரே நாளில் ₹1,800 சரிவு.. வெள்ளியும் கடும் வீழ்ச்சி!