நடிகர் இம்ரான் கானிடம் அமெரிக்க குடியுரிமை? காவல் நிலையத்தில் பா.ஜ.க புகார்!

Imran Khan Citizenship Row: நடிகர் இம்ரான் கான் குடியுரிமை குறித்து கேள்வி எழுந்துள்ள நிலையில், காவல் நிலையத்தில் புகார் அளித்தார் பாஜக தலைவர் கிரித் சோமையா.

நடிகர் இம்ரான் கான்

ByThilahavathy P

Published on: October 15, 2026 at 1:26 pm

மும்பை, அக்.15, 2026: மும்பையில் குடியுரிமை மற்றும் தேர்தல் தொடர்பான விவகாரத்தில் போராட்டம் நடத்தியவர்களுக்கு ஆதரவாகப் பங்கேற்ற நடிகர் இம்ரான் கானின் குடியுரிமை குறித்து பாஜக முன்னாள் எம்.பி. கிரித் சோமையா கேள்வி எழுப்பியுள்ளார். அமெரிக்கக் குடியுரிமை கொண்டவர் எனக் கூறப்படும் இம்ரான் கான், மும்பையில் நடைபெற்ற போராட்டத்தில் பங்கேற்க சட்டப்படி அனுமதி பெற்றிருந்தாரா என்பது குறித்து விசாரணை நடத்தக் கோரி காவல்துறையிடம் புகார் அளித்துள்ளார்.

அக்டோபர் 10ஆம் தேதி மும்பையின் ஆகஸ்ட் கிராந்தி மைதானத்தில், தலைமைத் தேர்தல் ஆணையர் ஞானேஷ் குமாருக்கு எதிராகவும் வாக்காளர் பட்டியலின் சிறப்பு தீவிர திருத்த நடவடிக்கைக்கு எதிராகவும் நடைபெற்ற போராட்டத்தில் இம்ரான் கான் பங்கேற்றார். இந்தப் போராட்டத்தில் அவரது காதலியும் நடிகையுமான லேகா வாஷிங்டன் உள்ளிட்ட 400-க்கும் மேற்பட்டோர் காவல்துறையினரால் தடுத்து வைக்கப்பட்டனர். இதையடுத்து, இம்ரான் கானின் குடியுரிமை ஆவணங்களைச் சமர்ப்பிக்க அவருக்கு அழைப்பாணை அனுப்ப வேண்டும் என்று சோமையா வலியுறுத்தியுள்ளார்.

மேலும், வெளிநாட்டுக் குடியுரிமை கொண்ட ஒருவர் இந்தியாவில் அரசியல் போராட்டத்தில் பங்கேற்கலாமா என்றும், இதற்கான விதிமுறைகள் பின்பற்றப்பட்டனவா என்றும் சோமையா கேள்வி எழுப்பியுள்ளார். இந்தப் புகார் தொடர்பாக மும்பை காவல்துறை, வெளிநாட்டினர் பிராந்தியப் பதிவு அலுவலகத்துக்கு (FRRO) மனுவை அனுப்பியுள்ளதாகத் தகவல்கள் தெரிவிக்கின்றன. எனினும், இம்ரான் கான் விதிமுறைகளை மீறியதாக இதுவரை அதிகாரப்பூர்வமாக நிரூபிக்கப்படவில்லை; புகாரின் அடிப்படையில் விசாரணை மேற்கொள்ளப்படுவது தனி நடவடிக்கையாகும்.

இதையும் படிங்க : இம்ரான் கானின் பார்ட்னர் இவரா? இவர் தமிழ் நடிகை ஆச்சே?