RMC Chennai | தமிழகத்தில் 14 மாவட்டங்களில் மழைக்கு வாய்ப்பு உள்ளதாக வானிலை ஆய்வு மையம் தெரிவித்துள்ளது.
RMC Chennai | தமிழகத்தில் 14 மாவட்டங்களில் மழைக்கு வாய்ப்பு உள்ளதாக வானிலை ஆய்வு மையம் தெரிவித்துள்ளது.
Published on: October 30, 2024 at 9:56 am
RMC Chennai | தென்தமிழகத்தில் உள் மாவட்டங்களில் ஒரு சில இடங்களிலும், வட தமிழக மாவட்டங்கள் மற்றும் கடலோர பகுதிகளில் ஒருசில இடங்களிலும் மழை பெய்துள்ளது.
வானிலை முன்னறிவிப்பு
30.10.2024: தமிழகத்தில் ஓரிரு இடங்களிலும், புதுவை மற்றும் காரைக்கால் பகுதிகளிலும் லேசானது முதல் மிதமான மழை பெய்யக்கூடும்.
31.10.2024: தமிழகத்தில் ஒருசில இடங்களிலும், புதுவை மற்றும் காரைக்கால் பகுதிகளிலும்,
இடி, மின்னலுடன் கூடிய லேசானது முதல் மிதமான மழை பெய்யக்கூடும்.
01.11.2024: தமிழகத்தில் ஒருசில இடங்களிலும் புதுவை மற்றும் காரைக்கால் பகுதிகளிலும்,
இடி, மின்னலுடன் கூடிய லேசானது முதல் மிதமான மழை பெய்யக்கூடும். ஈரோடு, கிருஷ்ணகிரி, தர்மபுரி, சேலம், திருப்பத்தூர், நாமக்கல், திருச்சிராப்பள்ளி, தேனி, திண்டுக்கல், மதுரை மற்றும் கரூர் மாவட்டங்களில் ஓரிரு இடங்களில் கனமழை பெய்யவாய்ப்புள்ளது.
02.11.2024: தமிழகத்தில் ஒருசில இடங்களிலும், புதுவை மற்றும் காரைக்கால் பகுதிகளிலும், இடி, மின்னலுடன் கூடிய லேசானது முதல் மிதமான மழை பெய்யக்கூடும்.
தென்காசி மற்றும் திருநெல்வேலி மாவட்டங்களின் மலைப்பகுதிகள், நீலகிரி. கோயம்புத்தூர், திருப்பூர், ஈரோடு, தேனி, திண்டுக்கல், விருதுநகர், மதுரை மற்றும் கன்னியாகுமரி மாவட்டங்களில் ஓரிரு இடங்களில் கனமழை பெய்யவாய்ப்புள்ளது.
03.11.2024 மற்றும் 04.11.2024: தமிழகத்தில் ஒருசில இடங்களிலும், புதுவை மற்றும் காரைக்கால் பகுதிகளிலும், லேசானது முதல் மிதமான மழை பெய்யக்கூடும்.
சென்னை மற்றும் புறநகர் பகுதிகளுக்கான வானிலை முன்னறிவிப்பு:
29.10.2024: வானம் ஓரளவு மேகமூட்டத்துடன் காணப்படும். நகரின் ஒருசில பகுதிகளில் லேசான மழை பெய்ய வாய்ப்புள்ளது. அதிகபட்ச வெப்பநிலை 35° செல்சியஸை ஒட்டியும், குறைந்தபட்ச வெப்பநிலை 27° செல்சியஸை ஒட்டியும் இருக்கக்கூடும்.
30.10.2024: வானம் ஓரளவு மேகமூட்டத்துடன் காணப்படும். நகரின் ஒருசில பகுதிகளில் லேசான மழை பெய்ய வாய்ப்புள்ளது. அதிகபட்ச வெப்பநிலை 35-36* செல்சியஸை ஒட்டியும், குறைந்தபட்ச வெப்பநிலை 26-27° செல்சியஸை ஒட்டியும் இருக்கக்கூடும்.
31.10.2024 (தீபாவளி தினம்): வானம் ஓரளவு மேகமூட்டத்துடன் காணப்படும். நகரின் ஒருசில பகுதிகளில் லேசான மழை பெய்ய வாய்ப்புள்ளது. அதிகபட்ச வெப்பநிலை 34-35* செல்சியஸை ஒட்டியும், குறைந்தபட்ச வெப்பநிலை 26-27″ செல்சியஸை ஒட்டியும் இருக்கக்கூடும்.
மீனவர்களுக்கான எச்சரிக்கை: ஏதுமில்லை என சென்னை வானிலை ஆய்வு மையம் தெரிவித்துள்ளது.
இதையும் படிங்க பசியில் காத்திருக்கும் பறவைகள்; மறைந்திருக்கும் 4 கிவி பழங்கள்: சரியா கண்டுபிடிச்சா நீங்க தான் கில்லி!
மும்பை, அக்.12, 2026: பாலிவுட் நடிகர் அமிதாப் பச்சனுக்கும் நடிகை ரேகாவுக்கும் இடையே காதல் உறவு இருந்ததாகப் பல ஆண்டுகளாகப் பேசப்பட்டு வந்த வதந்திகள் மீண்டும் கவனம் பெற்றுள்ளன. 1970-களில் அமிதாப் பச்சன் முன்னணி நட்சத்திரமாக வளர்ந்த காலகட்டத்தில், ரேகாவுடன் அவர் நடித்த படங்களும், இருவரின் திரை இணையும் ரசிகர்களிடையே பெரும் வரவேற்பைப் பெற்றன. இதனால், இருவருக்கும் இடையே காதல் உறவு இருப்பதாக ஊடகங்களில் பல்வேறு செய்திகள் வெளியாகின. இந்த வதந்திகள் பல ஆண்டுகளாகத் தொடர்ந்த நிலையில், அமிதாப் பச்சன் அவற்றால் தனது தனிப்பட்ட வாழ்க்கையும் தொழில்முறை வாழ்க்கையும் பாதிக்கப்பட்டதாகக் கூறியிருந்தார்.
1990-களின் இறுதியில், பத்திரிகையாளர் பவானா சோமையா எழுதிய Amitabh Bachchan: The Legend என்ற நூலுக்கான உரையாடலில் அமிதாப் இந்த வதந்திகள் குறித்து விளக்கம் அளித்திருந்தார். ரேகாவுடன் தமக்குத் திருமணத்துக்கு அப்பாற்பட்ட உறவு இருப்பதாக வெளியான தகவல்களை அவர் மறுத்தார். இருவரும் இணைந்து பணியாற்றிய காலத்தில் சக நடிகர்களாகச் சந்தித்ததாகவும், சமூக ரீதியாகத் தங்களுக்கு அதிகத் தொடர்பு இல்லை என்றும் தெரிவித்தார். மேலும், ரேகா தனது வீட்டில் வசிப்பதாகவும், தான் அவரது வீட்டில் வசிப்பதாகவும் வெளியான செய்திகள் ஆதாரமற்றவை என்று கூறிய அவர், இதுபோன்ற தகவல்களைப் புகைப்படங்களுடன் வெளியிட்டது தவறான புரிதல்களை ஏற்படுத்துவதாகவும் சுட்டிக்காட்டினார். இந்த வதந்திகளை அவர் “ஒரு பெரிய கேலிக்கூத்து” என்று வர்ணித்ததாக இந்திய ஊடகங்கள் செய்தி வெளியிட்டுள்ளன.
அமிதாப் பச்சனும் ரேகாவும் டூ அன்ஜானே, முகாதர் ஹா சிக்கந்தர், சில்சிலா உள்ளிட்ட திரைப்படங்களில் இணைந்து நடித்துள்ளனர். குறிப்பாக, 1981-ல் வெளியான சில்சில்லா திரைப்படம், அமிதாப்–ரேகா–ஜெயா பச்சன் ஆகியோரின் நடிப்பால் இன்றளவும் ரசிகர்களிடையே பேசப்படும் படமாக உள்ளது.
இதற்கிடையே, 2004-ஆம் ஆண்டு சிமி கரேவால் நடத்திய நிகழ்ச்சியில் ரேகாவிடம் அமிதாப் மீது காதல் கொண்டிருந்தீர்களா என்று கேட்கப்பட்டபோது, அவரைப் பெரிதும் விரும்புவதாக வெளிப்படையாகப் பேசியிருந்தார். இருவரின் பழைய நேர்காணல்களும் கருத்துகளும் தற்போது மீண்டும் சமூக வலைதளங்களிலும் செய்திகளிலும் கவனம் பெற்றுள்ளன. இருப்பினும், அமிதாப் பச்சன் தங்களுக்கிடையேயான உறவு குறித்த வதந்திகளைத் தொடர்ந்து மறுத்து வந்துள்ளார்.
இதையும் படிங்க : அட இது நம்ம சுயம்பு அண்ணாச்சி ல.. ரூ.400 கோடி வசூலை கடந்த திரிஷ்யம்-3!
திராவிடன் டைம்ஸின் செய்திகளை உடனுக்குடன் தெரிந்துக்கொள்ள
சென்னை, அக்.12, 2026: சென்னை கிழக்குக் கடற்கரைச் சாலையில் உள்ள திருவிடந்தையில், உள்நாட்டிலேயே உருவாக்கப்பட்ட இரண்டு ஹைபிரிட் ராக்கெட்டுகள் ஒரே நேரத்தில் ஏவப்பட்டன. ‘மிஷன் RHUMI Twin 2026’ என்ற திட்டத்தின் கீழ், 2026 அக்டோபர் 10-ஆம் தேதி காலை 7 மணிக்கு இந்த ஏவுதல் நடைபெற்றது.
ஸ்பேஷ் ஸோன் இந்தியா, மார்டின் குரூப் மற்றும் அமெரிக்காவைச் சேர்ந்த குளோபல் ஹெல்ப் இன்டர்நேஷனல் பவுன்டேஷன் ஆகிய அமைப்புகள் இணைந்து இந்தத் திட்டத்தை முன்னெடுத்தன. ராக்கெட் இயக்கத்தை இடைநிறுத்திய பின்னர் மீண்டும் இயக்கும் மறுதொடக்கம் மற்றும் மறுபற்றவைப்பு (Restart and Reignition) தொழில்நுட்பத்தைச் சோதிப்பதும், விண்வெளி ஆராய்ச்சியில் மாணவர்களின் பங்களிப்பை அதிகரிப்பதும் இத்திட்டத்தின் முக்கிய நோக்கங்களாகும்.
இந்தச் சோதனையில் ஏவப்பட்ட ராக்கெட்டுகளுக்கு RHUMI 1 மற்றும் RHUMI 2 எனப் பெயரிடப்பட்டுள்ளது. ஹைபிரிட் உந்துவிசைத் தொழில்நுட்பத்துடன், உள்நாட்டிலேயே உருவாக்கப்பட்ட மறுதொடக்கக் கட்டமைப்பைக் கொண்டு இவை வடிவமைக்கப்பட்டுள்ளன. ஒவ்வொரு ராக்கெட்டும் 3.1 மீட்டர் நீளமும், 164 மில்லிமீட்டர் விட்டமும் கொண்டது; அதன் எடை 35 கிலோவாகும். இந்தச் சோதனையின் மூலம் சேகரிக்கப்படும் தரவுகள், எதிர்கால விண்வெளி ஆராய்ச்சி மற்றும் தொழில்நுட்ப மேம்பாட்டுக்குப் பயனுள்ளதாக இருக்கும் என எதிர்பார்க்கப்படுகிறது. மேலும், பள்ளி மற்றும் கல்லூரி மாணவர்கள் உருவாக்கிய அறிவியல் கருவிகளும் ராக்கெட்டுகளில் பொருத்தப்பட்டு, வளிமண்டலம் தொடர்பான தரவுகளைச் சேகரிக்க ஏற்பாடு செய்யப்பட்டது.
இந்த நிகழ்ச்சியில் கேரள ஆளுநர் ராஜேந்திர விஸ்வநாத் அர்லேகர் சிறப்பு விருந்தினராகக் கலந்துகொண்டு ராக்கெட் ஏவுதலைத் தொடங்கி வைத்தார். முன்னாள் இஸ்ரோ இயக்குநரும் பத்மஸ்ரீ விருது பெற்றவருமான மயில்சாமி அண்ணாதுரை, முன்னாள் பாதுகாப்பு ஆராய்ச்சி மற்றும் மேம்பாட்டு அமைப்பின் (DRDO) தலைவர் ஜி. சதீஷ் ரெட்டி உள்ளிட்ட விஞ்ஞானிகளும் பங்கேற்றனர். Space Zone India நிறுவனம் இதுவரை 5,000-க்கும் மேற்பட்ட மாணவர்களுக்கு விண்வெளித் தொழில்நுட்பப் பயிற்சி அளித்துள்ளதாக அதன் தலைவர் ஆனந்த் மேகலிங்கம் தெரிவித்துள்ளார். 2021-ல் 100 ஃபெம்டோ செயற்கைக்கோள்களையும், 2023-ல் 150 பைக்கோ செயற்கைக்கோள்களையும் ஏவிய இந்நிறுவனம், 2024-ல் ஹைபிரிட் ராக்கெட்டையும் ஏவியிருந்தது. இந்தத் திட்டத்திற்காக Martin Group நிறுவனம் தனது சமூகப் பொறுப்புணர்வு நிதியிலிருந்து ரூ.1.5 கோடிக்கும் அதிகமாகச் செலவிட்டுள்ளதாகத் தெரிவிக்கப்பட்டுள்ளது.
இதையும் படிங்க : ரூ.3.4 கோடி ஆன்லைன் முதலீட்டு மோசடி.. ஆந்திராவில் முக்கியக் குற்றவாளி கைது!
திராவிடன் டைம்ஸின் செய்திகளை உடனுக்குடன் தெரிந்துக்கொள்ள
புதுடெல்லி, அக்.12, 2026: தலைமைத் தேர்தல் ஆணையர் ஞானேஷ் குமார் பதவி விலகக் கோரி, டெல்லியில் காக்ரோச் ஜனதா கட்சி (சி.ஜே.பி) சார்பில் நடைபெற்று வரும் போராட்டம் 2-வது நாளாக ஞாயிற்றுக்கிழமையும் தொடர்ந்தது.
டெல்லியின் கன்னாட் பிளேஸ் பகுதியில் இருந்து ஜந்தர் மந்தர் நோக்கி பேரணியாகச் செல்ல முயன்ற போராட்டக்காரர்களை போலீசார் தடுத்து நிறுத்தினர். இதையடுத்து, 100-க்கும் மேற்பட்டோர் போலீசாரால் தடுத்து வைக்கப்பட்டதாகத் தகவல்கள் தெரிவிக்கின்றன. போராட்டக்காரர்கள் சிலர் எதிர்ப்புத் தெரிவித்தபோதும், போலீசார் அவர்களைப் பிடித்து பேருந்துகளில் ஏற்றிச் சென்றனர். போராட்டத்தின் போது, “ஞானேஷ் குமார் பதவி விலக வேண்டும்” என முழக்கங்கள் எழுப்பப்பட்டன.
வாக்காளர் பட்டியலில் மேற்கொள்ளப்படும் சிறப்பு தீவிரத் திருத்தம் (எஸ்.ஐ.ஆர்) தொடர்பாக முறைகேடுகள் நடைபெற்றுள்ளதாகக் குற்றம்சாட்டும் சி.ஜே.பி, இதற்குப் பொறுப்பேற்று தலைமைத் தேர்தல் ஆணையர் பதவி விலக வேண்டும் என வலியுறுத்தி வருகிறது. இந்தப் போராட்டத்துக்கு டெல்லி போலீசார் அனுமதி மறுத்திருந்த நிலையில், ஜந்தர் மந்தர் செல்லும் வழிகளில் பாதுகாப்பு பலப்படுத்தப்பட்டது. கன்னாட் பிளேஸ் மற்றும் ராஜீவ் சௌக் பகுதிகளில் பேரணியாகச் செல்ல முயன்றவர்களை போலீசார் தடுத்து நிறுத்தியதால் அங்கு பரபரப்பு ஏற்பட்டது. முன்னதாக, சனிக்கிழமையும் போராட்டத்துக்குச் செல்ல முயன்ற அரசியல் தலைவர்கள், மாணவர்கள், வழக்கறிஞர்கள் மற்றும் செயற்பாட்டாளர்கள் உட்படப் பலர் பல்வேறு இடங்களில் தடுத்து வைக்கப்பட்டனர்.
டெல்லியில் போராட்டம் நடைபெறுவதைத் தடுக்கும் வகையில் முக்கியப் பகுதிகளில் போலீசார் குவிக்கப்பட்டதுடன், ஜந்தர் மந்தர் செல்லும் பாதைகளிலும் கட்டுப்பாடுகள் விதிக்கப்பட்டன. இதனால், போராட்டக்காரர்கள் பல்வேறு இடங்களில் சிறு குழுக்களாகத் திரண்டு தங்களது எதிர்ப்பை வெளிப்படுத்தினர். தலைமைத் தேர்தல் ஆணையர் மீதான குற்றச்சாட்டுகள் மற்றும் எஸ்.ஐ.ஆர் நடவடிக்கைகள் தொடர்பான விவாதங்கள் தீவிரமடைந்துள்ள நிலையில், போராட்டத்தைத் தொடர்ந்து டெல்லியில் பாதுகாப்பு நடவடிக்கைகள் அதிகரிக்கப்பட்டுள்ளன.
இதையும் படிங்க : சி.ஜே.பி போராட்டம்.. கைது, தடுப்புக் காவல் – சட்டம் கூறுவது என்ன?
திராவிடன் டைம்ஸின் செய்திகளை உடனுக்குடன் தெரிந்துக்கொள்ள
வாஷிங்டன், அக்.12, 2026: அமெரிக்க அதிபர் டொனால்ட் டிரம்ப், ரஷ்ய அதிபர் விளாடிமிர் புதினுடன் பேச்சுவார்த்தை நடத்தியதைத் தொடர்ந்து, ரஷ்யாவிலிருந்து டீசல் இறக்குமதி செய்வதற்கான தடைகளைத் தளர்த்திய முடிவுக்கு எதிராக அமெரிக்கக் குடியரசுக் கட்சி எம்.பி.க்கள் களமிறங்கியுள்ளனர்.
ரஷ்யாவிலிருந்து எண்ணெய் கொள்முதல் செய்வதைத் தடுக்கும் வகையில் இரு கட்சிகளின் ஆதரவுடன் புதிய மசோதாவைக் கொண்டுவரப் போவதாகக் குடியரசுக் கட்சியின் பிரையன் ஃபிட்ஸ்பேட்ரிக் அறிவித்துள்ளார். ‘ரொனால்ட் ரீகன் அமைதிக்கான வலிமை’ (Ronald Reagan Peace Through Strength Act) எனப் பெயரிடப்பட்டுள்ள இந்த மசோதாவுக்கு, குடியரசுக் கட்சியைச் சேர்ந்த டான் பேகனும் ஆதரவு தெரிவித்துள்ளார்.
டிரம்ப் மற்றும் புதின் இடையே வெள்ளிக்கிழமை நடைபெற்ற தொலைபேசி உரையாடலுக்குப் பிறகு, அமெரிக்காவுக்கும் உலகச் சந்தைக்கும் உடனடியாக 3 லட்சம் டன் டீசலை வழங்க ரஷ்யா ஒப்புக்கொண்டுள்ளதாக டிரம்ப் தெரிவித்தார். எரிபொருள் விலையைக் குறைப்பதே இந்த நடவடிக்கையின் நோக்கம் என அவர் கூறியுள்ளார். ஆனால், ரஷ்யாவிடமிருந்து எரிபொருளைக் கொள்முதல் செய்வது, உக்ரைன் மீதான போருக்கான ரஷ்ய அரசின் நிதி ஆதாரத்தை அதிகரிக்கக்கூடும் என்று எதிர்க்கட்சியினரும் சில குடியரசுக் கட்சி உறுப்பினர்களும் கவலை தெரிவித்துள்ளனர். 2022-ஆம் ஆண்டு முதல் ரஷ்ய எரிசக்தி இறக்குமதிக்கு விதிக்கப்பட்ட தடைகள் மற்றும் சமீபத்தில் காங்கிரஸ் நிறைவேற்றிய ரஷ்யா தொடர்பான புதிய பொருளாதாரத் தடைகள் சட்டத்தின் நடைமுறைகள் குறித்தும் கேள்விகள் எழுப்பப்பட்டுள்ளன.
இந்த மசோதாவைக் காங்கிரஸில் வாக்கெடுப்புக்குக் கொண்டுவர, பிரதிநிதிகள் சபையில் 218 உறுப்பினர்களின் கையொப்பங்களைப் பெறும் நடைமுறையைப் பயன்படுத்தப் பிரையன் ஃபிட்ஸ்பேட்ரிக் திட்டமிட்டுள்ளார். இருப்பினும், அமெரிக்கப் பிரதிநிதிகள் சபையின் தற்போதைய பதவிக்காலம் ஜனவரி மாதத்துடன் முடிவடைவதால், மசோதாவை நிறைவேற்றுவதற்கான கால அவகாசம் குறைவாக உள்ளது. பிரதிநிதிகள் சபையில் மசோதா நிறைவேறினாலும், செனட் சபையின் ஒப்புதலும் தேவைப்படும்; மேலும், டிரம்ப் அதற்கு மறுப்புத் தெரிவிக்கும் வாய்ப்பும் உள்ளது. இதனால், ரஷ்யாவுடனான எரிபொருள் ஒப்பந்தம் தொடர்பாக அமெரிக்க அரசியல் வட்டாரத்தில் புதிய மோதல் உருவாகியுள்ளது.
இதையும் படிங்க : கருங்கடலில் ரஷ்ய ட்ரோன் தாக்குதல்.. உயிர் தப்பிய 3 இந்தியர்கள்!
திராவிடன் டைம்ஸின் செய்திகளை உடனுக்குடன் தெரிந்துக்கொள்ள
புதுடெல்லி, அக்.12, 2026: இந்திய மகளிர் கிரிக்கெட் அணியின் கேப்டன் ஸ்மிருதி மந்தனா, ஐக்கிய நாடுகள் குழந்தைகள் நிதியமான யுனிசெஃப் இந்தியாவின் யூனிசெஃப் இந்தியா ஆதரவாளராக நியமிக்கப்பட்டுள்ளார்.
அக்டோபர் 11-ஆம் தேதி கொண்டாடப்படும் சர்வதேச பெண் குழந்தைகள் தினத்தை முன்னிட்டு இந்த அறிவிப்பு வெளியிடப்பட்டுள்ளது. இளம் பெண்களுக்குச் சம உரிமைகள், சம வாய்ப்புகள் கிடைப்பதை உறுதி செய்வதுடன், அவர்களின் உடல்நலம், நல்வாழ்வு மற்றும் தலைமைத்துவத் திறன்களை மேம்படுத்துவதில் மந்தனா கவனம் செலுத்துவார்.
இந்தப் புதிய பொறுப்பின் மூலம், பெண் குழந்தைகள் விளையாட்டுகளில் பங்கேற்கவும், கல்வி கற்கவும், தங்களது திறமைகளை வெளிப்படுத்தவும் சம வாய்ப்புகளைப் பெறுவதற்கான விழிப்புணர்வுப் பணிகளில் ஸ்மிருதி மந்தனா ஈடுபடுவார். குழந்தைகள் மற்றும் இளைஞர்களின் உரிமைகள் தொடர்பான முன்னெடுப்புகளில் ஏற்கெனவே அவர் பங்களித்துள்ளார். குறிப்பாக, பாலின சமத்துவம் மற்றும் வாழ்க்கைத் திறன்களை வலியுறுத்தும் யுனிசெஃப் மற்றும் சர்வதேச கிரிக்கெட் கவுன்சில் பிரசாரங்களுக்கும், யுனிசெஃப் அமைப்பின் ‘Promise to Children’ பிரசாரத்துக்கும் ஆதரவு அளித்துள்ளார்.
இந்த நியமனம் குறித்து மகிழ்ச்சி தெரிவித்துள்ள ஸ்மிருதி மந்தனா, கிரிக்கெட் விளையாடிய தனது அனுபவம் ஒவ்வொரு கனவும் ஒரு வாய்ப்பிலிருந்தே தொடங்குகிறது என்பதைத் தனக்குக் கற்றுக்கொடுத்ததாகக் குறிப்பிட்டுள்ளார். கடின உழைப்பு, உறுதிப்பாடு மற்றும் ஊக்கம் ஆகியவை ஒரு வாய்ப்பைச் சிறப்பான சாதனையாக மாற்றும் என்றும், ஒவ்வொரு குழந்தையும் இளைஞரும் பெரிய கனவுகளைக் காணவும் தங்களது முழுத் திறனையும் அடையவும் வாய்ப்பு பெற வேண்டும் என்றும் அவர் தெரிவித்துள்ளார். அர்ஜுனா விருது பெற்ற மந்தனா, இந்திய மகளிர் கிரிக்கெட்டின் முன்னணி வீராங்கனைகளில் ஒருவராகத் திகழ்வதுடன், இளம் பெண்களுக்கு முன்னுதாரணமாகவும் விளங்குகிறார்.
இதையும் படிங்க : இந்தியா- நியூசி 100 ஆண்டு உறவு.. புதிய கிரிக்கெட் ஜெர்சி.. புதிய தகவல்கள்!
திராவிடன் டைம்ஸின் செய்திகளை உடனுக்குடன் தெரிந்துக்கொள்ள
திராவிடன் டைம்
திராவிடன் டைம்ஸ்.காம் (www.dravidantimes.com) ஆன்லைன் செய்தித்தளம் ஆகஸ்ட் 18 2024ல் தொடங்கப்பட்டது. தமிழ்நாடு, இந்தியா, சர்வதேசம், வணிகம், லைஃப்ஸ்டைல், சினிமா, ஆன்மிகம், தொழில்நுட்பம், கல்வி மற்றும் வேலைவாய்ப்பு என பலதரப்பட்ட செய்திகளை பக்கச்சார்பின்றி வெளியிடுகிறது.
© 2024 dravidantimes.com – developed and designed by Thirdvizion.com
