மகளிர் உரிமைத் தொகையா அல்லது தேர்தல் அச்சாரத் தொகையா? மு.க ஸ்டாலினுக்கு நயினார் நாகேந்திரன் கேள்வி

Nainar nagendran: “மகளிர் உரிமைத் தொகையா அல்லது தேர்தல் அச்சாரத் தொகையா” என தமிழக முதலமைச்சர் மு.க ஸ்டாலினுக்கு கேள்வியெழுப்பியுள்ளார் தமிழ்நாடு பாரதிய ஜனதா கட்சியின் மாநிலத் தலைவர் நயினார் நாகேந்திரன்.

தமிழக முதலமைச்சர் மு.க ஸ்டாலின், பாஜக மாநில தலைவர் நயினார் நாகேந்திரன்

BySaranya JK

Published on: October 11, 2025 at 6:06 pm

சென்னை, அக்.11, 2025: மகளிர் உரிமைத் தொகையா அல்லது தேர்தல் அச்சாரத் தொகையா என மு.க ஸ்டாலினுக்கு கேள்வியெழுப்பியுள்ளார் நயினார் நாகேந்திரன்.
இது குறித்து நயினார் நாகேந்திரன் மேலும், “2021 தேர்தலுக்கு முன் அனைத்து மகளிருக்கும் மாதம் ₹1000 உரிமைத் தொகையாக வழங்கப்படும் என்று கூறிவிட்டு 2023 ஆம் ஆண்டு வரை கிடப்பில் போட்டது ஏன்?

30 மாதங்கள் வழங்காமல், 2024 பாராளுமன்றத் தேர்தலை முன்னிட்டு சரியாக இரண்டு மாதங்களுக்கு முன் சிலருக்கு மட்டும் உரிமைத் தொகையை வழங்கியது ஏன்?

2026 சட்டமன்றத் தேர்தல் நெருங்கும் வேளையில், சில மாதங்களில் மீதமுள்ள மகளிருக்கு உரிமைத் தொகை வழங்கப்படும் என்று கூறி மீண்டும் மீண்டும் தமிழக மகளிரை ஏமாற்ற முயற்சிப்பது ஏன்?” என அடுக்கடுக்காக கேள்விகளை முன்வைத்துள்ளார்.

இதுதான் திராவிட மாடல் சமத்துவமா?

மேலும், “ஆட்சி அரியணை ஏறும் முன் அனைவருக்கும் வழங்கப்படும் என்று கூறிவிட்டு, ஆட்சி அமைத்ததும் “தகுதியற்றவர்கள்” என்று சிலரை முத்திரை குத்துவது தான் திராவிட மாடல் சமத்துவமா?” எனக் வினாவியுள்ளார்.

ரூ.30 ஆயிரம் கடன்

தொடர்ந்து, “சரி, தங்கள் கணக்குப்படி “தகுதியுள்ளவர்கள்” என்று வகைப்படுத்தப்பட்ட மகளிருக்கு 2021 முதல் 2023 வரையிலான காலகட்டத்தில் வழங்காமல் விட்ட உரிமைத் தொகையான ₹30,000 கடனை எப்போது தான் அடைப்பீர்கள்?” எனவும் கேள்வியெழுப்பியுள்ளார் நயினார் நாகேந்திரன்.

இதையும் படிங்க : தூத்துக்குடியில் மழையால் வீடு இழந்த பயனாளிக்கு புதிய வீடு, பசு மாடு வழங்கிய பா.ஜ.க தலைவர்!