என்ன சம்பவம் செஞ்சிங்க விஜய்? நடிகர் சரத்குமார் கேள்வி

என்ன சம்பவம் செஞ்சிங்க விஜய் என நடிகர் சரத்குமார் கேள்வி எழுப்பி உள்ளார். நடிகர் சரத்குமாரின் பேச்சு தற்போது சமூக வலைதளங்களில் கவனம் ஈர்த்து வருகிறது.

ByDravidan Times Bureau

Published on: March 1, 2025 at 7:20 pm

தமிழக வெற்றி கழகத்தின் இரண்டாம் ஆண்டு தொடக்க விழா சென்னை மாமல்லபுரத்தில் நடைபெற்றது. இந்தக் கூட்டத்தில் நடிகர் விஜய் பேசுகையில், பாரதிய ஜனதா கட்சியை பாசிசம் என்றும் திராவிட முன்னேற்றக் கழகத்தை பாயாசம் என்றும் விமர்சித்தார்.

அப்போது நடிகர் விஜய், ” இங்கு சிலர் ஹேஷ்டேக் போட்டு விளையாடிக் கொண்டிருக்கிறார்கள். ஆனால் நம் ஆட்கள் இடையில் சென்று சம்பவம் செய்து விட்டார்கள்” என்றார். மேலும் தனக்கே உரித்தான பாணியில், ‘வாட் ப்ரோ.. ராங் ப்ரோ’ என்றெல்லாம் பேசினார். நடிகர் விஜயின் பேச்சு சமூக வலைதளங்களில் கவனம் பெற்றது.

இந்த பேச்சுக்கு உடனே எதிர்வணையாற்றினார் தமிழக பாரதிய ஜனதா கட்சியின் தலைவர் கு. அண்ணாமலை. இந்த நிலையில் இது தொடர்பாக நடிகர் சரத்குமார் பெரம்பலூரில் கூட்டம் ஒன்றில் பேசுகையில் பதில் அளித்துள்ளார்.

அப்போது அரசியல் வியூகத்தை சொல்லிக் கொடுக்க மட்டும் ஹிந்தி தெரிந்தவர் வேண்டுமா என கேள்வி எழுப்பிய நடிகர் சரத்குமார் விஜய் எதை பேசினாலும் தெரிந்து கொண்டு பேச வேண்டும் என்றும் கூறினார்.
அப்போது சரத்குமார், ” நீங்கள் ஒரு மிகச்சிறந்த நடிகர். உங்களுக்கு ரசிகர் பட்டாளம் உள்ளது. நீங்கள் எதை பேசினாலும் உண்மை எது என்பதை தெரிந்து கொண்டு பேச வேண்டும்.

அரசியல் வியூகம் வகுக்க பிரசாந்த் கிஷோர் என்ற ஹிந்தி படிக்க தெரிந்த நபரை தானே நீங்கள் வைத்துள்ளீர்கள். அப்படி இருக்கையில் வாட் ப்ரோ ஒய் ப்ரோ ராங் ப்ரோ என நீங்கள் பேசலாமா” எனவும் கேள்வி எழுப்பினார்.

நடிகர் சரத்குமாரின் இந்த பேச்சு சமூக வலைதளங்களில் கவனம் ஈர்த்து வருகிறது.

இதையும் படிங்க: சாரி ப்ரோ.. நெக்ஸ்ட் Question ப்ரோ.. விஜய் குறித்த கேள்விக்கு அன்புமணி பதில்!