PM meets CWG winners: ஸ்காட்லாந்தின் கிளாஸ்கோவில் நடைபெற்ற 2026 காமன்வெல்த் விளையாட்டுப் போட்டிகளில் 13 தங்கம் உட்பட 39 பதக்கங்களை வென்று 4-வது இடம் பிடித்த இந்திய வீரர், வீராங்கனைகளை பிரதமர் நரேந்திர மோடி தனது புதுடெல்லி இல்லத்தில் நேரில் சந்தித்துப் பாராட்டு தெரிவித்தார்.
Published on: August 10, 2026 at 2:07 pm
புதுடெல்லி, ஆக. 10, 2026: புதுடெல்லியில் உள்ள தனது அதிகாரப்பூர்வ இல்லத்தில், 2026 காமன்வெல்த் விளையாட்டுப் போட்டிகளில் பதக்கம் வென்ற இந்திய விளையாட்டு வீரர், வீராங்கனைகளை பிரதமர் நரேந்திர மோடி நேரில் சந்தித்து உற்சாக வரவேற்பளித்தார். இந்தச் சந்திப்பின் போது, கிளாஸ்கோ போட்டிகளின் போது தாங்கள் பெற்ற அனுபவங்கள், களத்தில் எதிர்கொண்ட சவால்கள் மற்றும் வெற்றிப் தருணங்களை வீரர்கள் பிரதமருடன் நெகிழ்ச்சியுடன் பகிர்ந்து கொண்டனர்.
இந்தச் சந்திப்பு குறித்து சமூக ஊடகத்தில் பதிவிட்ட பிரதமர் மோடி, வெற்றி பெற்ற ஒவ்வொரு வீரரும் தங்களது சிறந்த ஆட்டத்தின் மூலம் தேசத்திற்குப் பெருமை சேர்த்துள்ளதாகவும், இவர்களது வெற்றி நாட்டின் எண்ணற்ற இளைஞர்களுக்குப் பெரும் ஊக்கமாக அமையும் என்றும் குறிப்பிட்டார். மேலும், “விளையாடுபவர்கள் எப்போதும் மிளிர்வார்கள்” என்ற கருத்து அடங்கிய வீடியோ செய்தியைப் பகிர்ந்த பிரதமர், இந்தியக் விளையாட்டு வீரர்களுக்காக நாட்டு மக்கள் எப்போதும் தங்களது ஆதரவுக் குரலை (‘Cheer for Bharat’) எழுப்ப வேண்டும் எனக் கேட்டுக்கொண்டார்.
இந்நிகழ்வில் மத்திய இளைஞர் நலன் மற்றும் விளையாட்டுத் துறை அமைச்சர் மன்சுக் மாண்டவியா மற்றும் விளையாட்டுத் துறை இணை அமைச்சர் ரக்ஷா நிகில் கட்சே ஆகியோர் உடனிருந்தனர். ஸ்காட்லாந்தின் கிளாஸ்கோ நகரில் கடந்த ஜூலை 23 முதல் ஆகஸ்ட் 2 வரை நடைபெற்ற இக்காமன்வெல்த் விளையாட்டுப் போட்டிகளில், இந்திய அணி தனது மிகச்சிறப்பான திறனை வெளிப்படுத்திப் பதக்கப்பட்டியலில் ஒட்டுமொத்தமாக 4-வது இடத்தைப் பிடித்துச் சாதனை படைத்தது.
பல்வேறு விளையாட்டுப் பிரிவுகளில் களமிறங்கிய இந்திய விளையாட்டுப் பட்டாளம் 13 தங்கம், 17 வெள்ளி மற்றும் 9 வெண்கலம் என மொத்தம் 39 பதக்கங்களைக் கைப்பற்றித் தாய்நாட்டிற்குப் பெருமை சேர்த்துள்ளது. சர்வதேச விளையாட்டு அரங்கில் இந்திய வீரர்கள் அடைந்து வரும் அபார வளர்ச்சியையும் ஆற்றலையும் பறைசாற்றும் வகையில் அமைந்துள்ள இந்தச் சாதனையை, பிரதமருடன் இணைந்து ஒட்டுமொத்த தேசமும் கொண்டாடி வருகிறது.
இதையும் படிங்க: இந்திய பேட்மிண்டனில் புதிய நாயகி உதயம்.. சீனாவை வீழ்த்தி பட்டம் வென்ற அஷ்மிதா!
திராவிடன் டைம்ஸின் செய்திகளை உடனுக்குடன் தெரிந்துக்கொள்ள
திராவிடன் டைம்ஸ்.காம் (www.dravidantimes.com) ஆன்லைன் செய்தித்தளம் ஆகஸ்ட் 18 2024ல் தொடங்கப்பட்டது. தமிழ்நாடு, இந்தியா, சர்வதேசம், வணிகம், லைஃப்ஸ்டைல், சினிமா, ஆன்மிகம், தொழில்நுட்பம், கல்வி மற்றும் வேலைவாய்ப்பு என பலதரப்பட்ட செய்திகளை பக்கச்சார்பின்றி வெளியிடுகிறது.
© 2024 dravidantimes.com – developed and designed by Thirdvizion.com
