இளைஞர்களின் குரலையும் தமிழ் மொழியையும் பா.ஜ.க ஒடுக்குகிறது.. ராகுல் காந்தி

Rahul Gandhi : சென்னையில் மாணவர்கள் உடனான சந்திப்பின்போது, இளைஞர்களின் குரலை பா.ஜ.க அடக்குகிறது என காங்கிரஸ் முன்னாள் தலைவர் ராகுல் காந்தி விமர்சித்தார்.

ராகுல் காந்தி

BySaranya JK

Published on: October 11, 2026 at 2:19 pm

சென்னை, அக்.11, 2026: தமிழகத்திற்கு வருகை தந்த காங்கிரஸ் மூத்த தலைவரும், மக்களவை எதிர்க்கட்சித் தலைவருமான ராகுல் காந்தி, பாஜக அரசு நாட்டின் இளைஞர்களின் குரலை ஒடுக்குவதுடன், தமிழ் மொழி, கலாசாரம் மற்றும் வரலாற்றின் மீது தாக்குதல் நடத்துவதாகக் குற்றம்சாட்டியுள்ளார்.

சென்னையில் அக்டோபர் 10-ஆம் தேதி தீவுத்திடலில் நடைபெற்ற ‘மாணவர்கள் குரல்’ (Chhatron Ki Goonj) நிகழ்ச்சியில் கல்லூரி மாணவர்களுடன் அவர் கலந்துரையாடினார். கல்வி, சுதந்திரமான சிந்தனை, கேள்வி கேட்கும் உரிமை மற்றும் மாணவர்களின் எதிர்காலம் குறித்து பேசிய ராகுல் காந்தி, மாணவர்கள் யாராவது சொல்வதைக் கண்மூடித்தனமாக ஏற்றுக்கொள்ளாமல், சுயமாகச் சிந்தித்து முடிவெடுக்க வேண்டும் என வலியுறுத்தினார். திருவள்ளுவர் மற்றும் தந்தை பெரியாரின் கருத்துகளைச் சுட்டிக்காட்டிய அவர், மாணவர்கள் தங்களின் மண், மொழி, வரலாறு மற்றும் பாரம்பரியத்தைப் புரிந்துகொள்வது அவசியம் என்றும் தெரிவித்தார்.

மத்திய அரசின் புதிய கல்விக் கொள்கை, நீட் தேர்வு மற்றும் இந்தி மொழித் திணிப்பு தொடர்பாகவும் ராகுல் காந்தி கடுமையான விமர்சனங்களை முன்வைத்தார். புதிய கல்விக் கொள்கையை ஏற்றுக்கொண்டால்தான் தமிழகத்திற்கான நிதியை விடுவிப்போம் என மத்திய அரசு நிபந்தனை விதிப்பதாக அவர் குற்றம்சாட்டினார். நீட் தேர்வு தமிழக மாணவர்களின் மருத்துவக் கல்வி வாய்ப்புகளைப் பாதிப்பதாகவும், இந்தி திணிப்பு முயற்சிகள் மாநிலத்தின் மொழி அடையாளத்திற்கு அச்சுறுத்தலாக இருப்பதாகவும் அவர் தெரிவித்தார். மேலும், தொகுதி மறுவரையறை நடவடிக்கை தமிழகத்தின் நாடாளுமன்றப் பிரதிநிதித்துவத்தையும் குரலையும் பலவீனப்படுத்தும் அபாயம் இருப்பதாகக் கூறினார். தமிழ் மொழி, கலாசாரம், வரலாறு ஆகியவற்றின் மீதான தாக்குதலை காங்கிரஸ் அனுமதிக்காது என்றும், மாணவர்கள் கேள்வி கேட்கும் உரிமையையும் ஜனநாயக உரிமைகளையும் பாதுகாக்க வேண்டும் என்றும் வலியுறுத்தினார்.

நிகழ்ச்சியைத் தொடர்ந்து சென்னை விமான நிலையத்தில் செய்தியாளர்களிடம் பேசிய ராகுல் காந்தி, பிரதமர் நரேந்திர மோடி, மத்திய உள்துறை அமைச்சர் அமித் ஷா மற்றும் தலைமைத் தேர்தல் ஆணையர் ஞானேஷ் குமார் ஆகியோரையும் விமர்சித்தார். நாட்டின் மக்கள், ஜனநாயகம் மற்றும் அரசியலமைப்புக்கு எதிராக பாஜக தலைமை செயல்படுவதாகக் குற்றம்சாட்டிய அவர், டெல்லியில் போராட்டத்தில் ஈடுபட்ட இளைஞர்கள் தாக்கப்பட்டதாகவும் கூறினார்.

போராடும் மாணவர்களுக்கு எதிர்க்கட்சிகளும் இளைஞர்களும் துணையாக இருப்பார்கள் என்றும், அவர்களுக்கு நீதி கிடைக்கத் தொடர்ந்து போராடுவோம் என்றும் உறுதியளித்தார். இளைஞர்களின் சுதந்திரமான சிந்தனையையும் எதிர்ப்புக் குரல்களையும் எந்த அரசாலும் நிரந்தரமாக ஒடுக்க முடியாது என்பதே தனது நிலைப்பாடு என்றும் அவர் தெரிவித்தார். ராகுல் காந்தியின் இந்தப் பேச்சுகள், மத்திய அரசின் கல்விக் கொள்கை மற்றும் தமிழகத்தின் மொழி உரிமைகள் தொடர்பான அரசியல் விவாதத்தை மீண்டும் தீவிரப்படுத்தியுள்ளன.

இதையும் படிங்க : ஈரோடு அருகே சாதியப் பாகுபாடு.. பட்டியலின சமூகத்தைச் சேர்ந்த இருவரை காலில் விழ வைத்த அவலம்!