சூர்யா கேரக்டர் என்ன தெரியுமா?‘சீன்’ படத்தின் கதையை வெளியிட்ட ஜித்து மாதவன்!

Scene Movie Update: சூர்யா நடிக்கும் ‘சீன்’ திரைப்படத்தில் அவரது கதாபாத்திரம் குறித்துப் பரவும் முகங்களை அடையாளம் காண முடியாத குறைபாடு தொடர்பான வதந்திகளை வசனகர்த்தா டிராவிட் செல்வம் மறுத்துள்ளார்.

சீன்’ படத்தில் சூர்யா

ByThilahavathy P

Published on: October 24, 2026 at 4:05 pm

சென்னை, அக். 24 2026: நடிகர் சூர்யா நடிப்பில், மலையாள இயக்குநர் ஜித்து மாதவன் இயக்கியுள்ள ‘சீன்’ திரைப்படத்தில், சூர்யா முகங்களை அடையாளம் காண முடியாத ப்ரோசோபாக்னோசியா குறைபாடு கொண்ட காவல்துறை அதிகாரியாக நடிப்பதாகச் சமூக வலைதளங்களில் தகவல்கள் பரவி வருகின்றன. இதற்கு முன்பு, படத்தின் வசனகர்த்தா டிராவிட் செல்வம், சூர்யா பார்வையற்ற கதாபாத்திரத்தில் நடிக்கவில்லை என்று விளக்கம் அளித்திருந்தார். மேலும், உறுதிப்படுத்தப்படாத தகவல்களை நம்பாமல் படத்தின் வெளியீட்டுக்காகக் காத்திருக்குமாறு ரசிகர்களைக் கேட்டுக்கொண்டார்.

இதற்கிடையே, படத்தின் இயக்குநர் ஜித்து மாதவன் கதைக்களம் குறித்து விளக்கம் அளித்துள்ளார். முன்னாள் காவல்துறை அதிகாரி ஒருவர், காவல்துறையிலிருந்து பணிநீக்கம் செய்யப்பட்ட ஒருவருக்கு எதிராக வழக்குத் தொடர விரும்புகிறார். ஆனால், அவருக்கு ஆதரவு கிடைக்காததால், வித்தியாசமான குணாதிசயங்களைக் கொண்ட நபர்களை ஒன்றிணைத்து தனக்கென ஒரு குழுவை உருவாக்குகிறார். அந்தக் குழுவைக் கொண்டு முக்கியமான வழக்கை விசாரிப்பதே படத்தின் மையக்கருவாகும்.

சூர்யா இப்படத்தில் டிஎஸ்பி இந்தராஜ் என்ற காவல்துறை அதிகாரியாக நடிக்கிறார். வழக்கமான நடைமுறைகளுக்கு மாறான குணங்களைக் கொண்ட குழுவினரை ஒன்றிணைத்து, அவர்களின் தனித்துவமான திறன்களைப் பயன்படுத்தி விசாரணையை முன்னெடுப்பதில் அவர் எதிர்கொள்ளும் சவால்களையும், அதனால் ஏற்படும் நகைச்சுவையான சம்பவங்களையும் மையமாகக் கொண்டு படம் உருவாகியுள்ளது. காவல்துறை விசாரணை, ஆக்‌ஷன் மற்றும் நகைச்சுவை கலந்த குடும்பப் பொழுதுபோக்குத் திரைப்படமாக இதை இயக்குநர் விவரித்துள்ளார்.

இப்படத்தில் சூர்யாவுடன் மலையாள நடிகர்கள் நஸ்லென், நஸ்ரியா நஜிம், ஆனந்தராஜ், லால் மற்றும் ராஜ் பிரியன் ஆகியோர் முக்கியக் கதாபாத்திரங்களில் நடித்துள்ளனர். சூர்யா மற்றும் ஜோதிகாவின் 2டி என்டர்டெயின்மென்ட், ழகரம் ஸ்டூடியோஸ் தயாரிக்கும் இப்படத்திற்கு சுஷின் ஷ்யாம் இசையமைத்துள்ளார். திரைப்படம் நவம்பர் 6, 2026 அன்று தீபாவளியை முன்னிட்டு திரையரங்குகளில் வெளியாகத் திட்டமிடப்பட்டுள்ளது.

இதையும் படிங்க: சசிகுமார் படத்தில் நரேன்.. ஜிப்ரான் இசை.. எகிறும் எதிர்பார்ப்பு!