Ajith Kumar: நடிகர் அஜித் குமாரின் கார் பந்தய வாழ்க்கையை மையமாகக் கொண்டு உருவாகியுள்ள ‘Gladiators’ ஆவணப்படத்தின் டிரெய்லர் கடந்த சில தினங்களுக்கு முன்பு வெளியானது.
Ajith Kumar: நடிகர் அஜித் குமாரின் கார் பந்தய வாழ்க்கையை மையமாகக் கொண்டு உருவாகியுள்ள ‘Gladiators’ ஆவணப்படத்தின் டிரெய்லர் கடந்த சில தினங்களுக்கு முன்பு வெளியானது.
Published on: September 20, 2026 at 12:32 pm
சென்னை, செப்.20, 2026: நடிகர் அஜித் குமாரின் கார் பந்தய வாழ்க்கையை மையமாகக் கொண்டு உருவாகியுள்ள ‘Gladiators’ ஆவணப்படத்தின் டிரெய்லர் வெளியாகியுள்ளது. இயக்குநர் ஏ.எல். விஜய் இயக்கியுள்ள இந்த ஆவணப்படத்தில், அஜித்தின் பந்தயப் பயணம், அவர் எதிர்கொண்ட சவால்கள், கார் பந்தயங்களில் பெற்ற அனுபவங்கள் உள்ளிட்ட பல்வேறு அம்சங்கள் இடம்பெற்றுள்ளன. குறிப்பாக, அஜித்தின் மனைவி ஷாலினி மற்றும் குழந்தைகள் அனோஷ்கா, ஆத்விக் ஆகியோர் இடம்பெறும் அரிய காட்சிகளும் டிரெய்லரில் இடம் பெற்றுள்ளன.
3 நிமிடங்கள் 46 விநாடிகள் கொண்ட டிரெய்லர், மோட்டார் ஸ்போர்ட்ஸ் குறித்த அஜித்தின் பார்வையுடன் தொடங்குகிறது. “மோட்டார் ஸ்போர்ட்ஸின் எல்லைகள் மிகப் பெரியவை. இது வெறும் வேகம் அல்லது பிரபலத்துக்கானது மட்டுமல்ல. ஒழுக்கம், துல்லியம், கணக்கிட்ட அபாயங்களை எதிர்கொள்வது மற்றும் ஒரு நொடியில் முடிவெடுப்பது ஆகியவை முக்கியமானவை. மோட்டார் ஸ்போர்ட்ஸில் மிகவும் சவாலான பிரிவுகளில் ஒன்று எண்டியூரன்ஸ் ரேசிங்” என அஜித் கூறுகிறார். லே மான்ஸ், துபாய் 24H உள்ளிட்ட பல்வேறு கார் பந்தயங்களில் அவர் பங்கேற்ற காட்சிகளும் டிரெய்லரில் இடம்பெற்றுள்ளன.
அஜித்தின் பந்தய ஆர்வம் மற்றும் அவரது விடாமுயற்சி குறித்து பேசியுள்ள ஷாலினி, “எல்லோருக்கும் அவர் ஒரு நடிகராகத் தெரியும். ஆனால் அவருக்கு நெருக்கமானவர்களுக்கு மட்டுமே தனது கனவுகளையும் ஆர்வங்களையும் தொடர்ந்து பின்தொடரும் மனிதராக அவர் தெரியும்” எனக் கூறுகிறார். பந்தயங்களில் அஜித் சந்தித்த விபத்துகள் மற்றும் சவால்களின் காட்சிகளும் இடம்பெறும் நிலையில், தோல்விக்கு அவர் ஒருபோதும் பயப்படவில்லை என்றும், ஒரே இரவில் வெற்றி கிடைக்கும் என அவர் எதிர்பார்ப்பதில்லை என்றும் ஷாலினி குறிப்பிடுகிறார். வெற்றிக் கோப்பையை வெல்வதற்காக மட்டும் அவர் மீண்டும் பந்தயத்திற்குத் திரும்பவில்லை என்றும், “எதுவும் சாத்தியமில்லை என்று தோன்றும் அந்த சில விநாடிகளுக்காகவே அவர் மீண்டும் வந்தார்” என்றும் அவர் கூறுகிறார்.
அதே நேரத்தில், அஜித் பந்தயக் களத்தில் இருக்கும்போது தனக்கு மிகவும் பதற்றமாக இருக்கும் என்றும் ஷாலினி வெளிப்படையாகத் தெரிவித்துள்ளார். “அவர் பந்தயத்தில் இருக்கும்போது எனக்கு மிகவும் பதற்றமாக இருக்கும். ஆனால், அவர் தனது கனவுகளை மிகுந்த ஆர்வத்துடன் வாழ்வதைப் பார்க்கும்போது, அவருக்கு ஆதரவாக அருகில் இருக்க வேண்டும் என்று மட்டுமே நினைக்கிறேன்” என அவர் கூறுகிறார். இதன் மூலம், அஜித்தின் பந்தயப் பயணத்தில் குடும்பத்தினரின் ஆதரவும், அவர்கள் எதிர்கொள்ளும் உணர்வுகளும் டிரெய்லரில் வெளிப்படுத்தப்பட்டுள்ளன.
அஜித்தின் மகள் அனோஷ்கா, தனது தந்தையின் தனிப்பட்ட பண்புகள் மற்றும் அவர் தனக்கு கற்றுக்கொடுத்த மதிப்புகளை மிகவும் விரும்புவதாகக் கூறுகிறார். மகன் ஆத்விக், முதன்முறையாக தனது தந்தையின் பந்தய காரில் அமர்ந்த அனுபவத்தை நினைவுகூர்கிறார். பொதுவாக ரேஸ் கார்கள் மிகவும் குறுகலான இடவசதியைக் கொண்டிருக்கும் நிலையில், அதற்குள் அஜித் எவ்வாறு செயல்படுகிறார் என்பதைப் பார்த்து ஆச்சரியமடைந்ததாக அவர் கூறுகிறார். அஜித் குமாரின் நடிகர் என்ற அடையாளத்தைத் தாண்டி, பந்தய வீரராக அவரது ஆர்வம், அர்ப்பணிப்பு, குடும்பத்தின் ஆதரவு மற்றும் பந்தயக் களத்தில் அவர் எதிர்கொண்ட சவால்களை பதிவு செய்யும் ஆவணப்படமாக ‘Gladiators’ உருவாகியுள்ளது.
இதையும் படிங்க : ரூ.80 கோடியை கடந்த மண்டாடி பட வசூல்.. பட்டைய கிளப்பும் சூரியின் வசூல் வேட்டை!
திராவிடன் டைம்ஸின் செய்திகளை உடனுக்குடன் தெரிந்துக்கொள்ள
திராவிடன் டைம்ஸ்.காம் (www.dravidantimes.com) ஆன்லைன் செய்தித்தளம் ஆகஸ்ட் 18 2024ல் தொடங்கப்பட்டது. தமிழ்நாடு, இந்தியா, சர்வதேசம், வணிகம், லைஃப்ஸ்டைல், சினிமா, ஆன்மிகம், தொழில்நுட்பம், கல்வி மற்றும் வேலைவாய்ப்பு என பலதரப்பட்ட செய்திகளை பக்கச்சார்பின்றி வெளியிடுகிறது.
© 2024 dravidantimes.com – developed and designed by Thirdvizion.com
