இந்தியாவை விட்டு வெளியேற உத்தரவு.. நடிகர் இம்ரான் கான் நீதிமன்றத்தில் மனு!

Imran Khan Deportation Case: இந்தியாவை விட்டு வெளியேற உத்தரவு பிறப்பிக்கப்பட்டுள்ள நிலையில், அதற்கு எதிராக நடிகர் இம்ரான் கான் மும்பை உயர் நீதிமன்றத்தில் மனு தாக்கல் செய்துள்ளார்.

நடிகர் இம்ரான் கான்

ByThilahavathy P

Published on: October 18, 2026 at 12:39 pm

மும்பை, அக்.18, 2026: பாலிவுட் நடிகர் இம்ரான் கான், இந்தியாவை விட்டு அக்டோபர் 28-ம் தேதிக்குள் வெளியேற வேண்டும் என மும்பை காவல்துறை வழங்கிய அறிவிப்பை எதிர்த்து மும்பை உயர் நீதிமன்றத்தில் மனு தாக்கல் செய்துள்ளார். அமெரிக்கக் குடியுரிமை பெற்றுள்ள அவர், இந்திய வம்சாவளியினருக்கான OCI அட்டையையும் வைத்துள்ளார்.

கடந்த அக்டோபர் 10-ம் தேதி மும்பையின் ஆகஸ்ட் கிராந்தி மைதானத்தில், தலைமைத் தேர்தல் ஆணையர் ஞானேஷ் குமார் பதவி விலகக் கோரி நடைபெற்ற போராட்டத்தில் இம்ரான் கான் பங்கேற்றார். வாக்காளர் பட்டியல் சிறப்புத் தீவிர திருத்தமான SIR-க்கு எதிரான இந்தப் போராட்டத்தில் பங்கேற்றது தொடர்பாக அவர் காவல்துறையினரால் தற்காலிகமாகக் காவலில் எடுக்கப்பட்டார்.

இதையடுத்து, குடியேற்ற விதிகளை மீறியதாகக் கூறி, இந்தியாவை விட்டு வெளியேறுமாறு அவருக்கு அறிவிப்பு வழங்கப்பட்டது. இந்த அறிவிப்பு சட்டவிரோதமானது என்றும், அமைதியான போராட்டத்தில் பங்கேற்பதைத் தடை செய்யும் வகையில் தற்போதைய சட்டத்தில் வெளிப்படையான விதி எதுவும் இல்லை என்றும் தனது மனுவில் இம்ரான் கான் தரப்பு தெரிவித்துள்ளது.

அறிவிப்பை ரத்து செய்யவும், வழக்கு விசாரணை முடியும் வரை அதன் செயல்பாட்டுக்குத் தடை விதிக்கவும் அவர் நீதிமன்றத்தைக் கோரியுள்ளார். இந்த வழக்கில் நீதிமன்றம் எடுக்கும் முடிவு, இம்ரான் கான் இந்தியாவில் தொடர்ந்து தங்குவதற்கான நிலையைத் தீர்மானிப்பதில் முக்கியத்துவம் பெறும்.

இதையும் படிங்க : தீபாவளி 2026.. திரைக்கு வரும் தமிழ் திரைப்படங்கள்.. முழுப் பட்டியல்!