தங்கமா? வெள்ளியா? விலை சரிவுக்குப் பிறகு எதில் முதலீடு செய்வது சிறந்தது?

Gold vs Silver Investment: தங்கமா? வெள்ளியா? விலை சரிவுக்குப் பிறகு எதில் முதலீடு செய்வது சிறந்தது என்பது குறித்து பார்க்கலாம்.

தங்கம், வெள்ளி

BySaranya JK

Published on: November 4, 2026 at 2:54 pm

சென்னை, நவ.4, 2026: சர்வதேச சந்தையில் தங்கம் மற்றும் வெள்ளி விலைகள் கடுமையாகச் சரிந்துள்ள நிலையில், முதலீட்டாளர்கள் எதில் முதலீடு செய்யலாம் என்ற கேள்வி எழுந்துள்ளது. நடப்பாண்டில் இதுவரை சர்வதேச சந்தையில் தங்கம் சுமார் 10 சதவீதமும், வெள்ளி 32 சதவீதத்துக்கும் அதிகமாகவும் சரிந்துள்ளதாக பிரபல வணிக பத்திரிகை செய்திகள் தெரிவிக்கின்றன.

நவம்பர் 3ஆம் தேதி நிலவரப்படி, சர்வதேச சந்தையில் ஒரு அவுன்ஸ் தங்கம் 3,914 டாலராகவும், வெள்ளி 49 டாலராகவும் வர்த்தகமானது. இதன் அடிப்படையில் தங்கம் – வெள்ளி விகிதம் 80 ஆக உள்ளது. நீண்டகால சராசரியான 70-ஐ விட இது அதிகம் என்பதால், தங்கத்துடன் ஒப்பிடும்போது வெள்ளி விலை குறைவாக இருப்பதாகக் கருதப்படுகிறது.

இருப்பினும், வெள்ளியின் விலை ஏற்ற இறக்கங்கள் தங்கத்தைவிட அதிகம். தொழில்துறைத் தேவை, குறிப்பாக சோலார் பேனல் உற்பத்தி மற்றும் மின்னணுத் துறையின் தேவைகள் வெள்ளி விலையைப் பாதிக்கின்றன. அதேசமயம், அமெரிக்க வட்டி விகித உயர்வு குறித்த எதிர்பார்ப்பு, பணவீக்கம், டாலரின் மதிப்பு மற்றும் புவிசார் அரசியல் பதற்றங்கள் ஆகியவை இரு உலோகங்களின் விலையிலும் தாக்கத்தை ஏற்படுத்துகின்றன.

முதலீட்டாளர்களுக்கு நீண்டகால அடிப்படையில் தங்கம் ஒப்பீட்டளவில் நிலையான தேர்வாக இருக்கலாம் என்றும், அதிக ஏற்ற இறக்கங்களைத் தாங்கக்கூடியவர்கள் வெள்ளியைத் துணை முதலீடாகக் கருதலாம் என்றும் நிபுணர்கள் தெரிவிக்கின்றனர். ஒரே நேரத்தில் மொத்தப் பணத்தையும் முதலீடு செய்யாமல், விலை சரிவின்போது படிப்படியாக முதலீடு செய்வது சிறந்த அணுகுமுறை என்றும் அவர்கள் பரிந்துரைக்கின்றனர்.

இதையும் படிங்க : பங்குச்சந்தையில் அதிரடி ஏற்றம்.. 1,225 புள்ளிகள் உயர்ந்த சென்செக்ஸ்.. 23,800-ஐ கடந்த நிஃப்டி!