வங்கி கடன் மோசடி வழக்கு: ADAG முன்னாள் அதிகாரிகள் நீதிமன்றத்தில் ஆஜர்

Bank loan fraud case : வங்கி கடன் மோசடி தொடர்பான பணமோசடி வழக்கில், அனில் திருபாய் அம்பானி குழுமத்துடன் (ADAG) தொடர்புடைய முன்னாள் மூத்த அதிகாரிகள் இருவரை அமலாக்க இயக்குநரகம் (ED) இன்று நீதிமன்றத்தில் ஆஜர்படுத்தியது.

அமலாக்கத்துறை இயக்குநரகம்

BySaranya JK

Published on: April 16, 2026 at 12:01 pm

புதுடெல்லி, ஏப் 16 2026: அனில் திருபாய் அம்பானி குழுமம் (ADAG) தொடர்பான வங்கி கடன் மோசடி வழக்கில், முன்னாள் மூத்த அதிகாரிகள் அமிதாப் ஜுன்ஜுன்வாலா மற்றும் அமித் பஃப்னா ஆகியோர் கைது செய்யப்பட்டுள்ளனர். இவர்களை பணமோசடி தடுப்புச் சட்டத்தின் (PMLA) கீழ் அமலாக்க இயக்குநரகம் (ED) கைது செய்தது.

நீதிமன்றத்தில் ஆஜர்

டெல்லியில் உள்ள ரவுஸ் அவென்யூ சிறப்பு நீதிமன்றத்தில் இன்று இருவரும் ஆஜர் படுத்தப்பட்டனர். இருவரையும் விசாரணைக்காக 7 நாட்கள் காவலில் வைத்து விசாரிக்க அனுமதி வழங்க வேண்டும் என அமலாக்க இயக்குநரகம் நீதிமன்றத்தில் கோரிக்கை வைத்துள்ளது.

வழக்கின் பின்னணி

இந்த வழக்கு ரிலையன்ஸ் ஹோம் ஃபைனான்ஸ் மற்றும் ரிலையன்ஸ் கமர்ஷியல் ஃபைனான்ஸ் நிறுவனங்களுடன் தொடர்புடையது.

போலியான நிறுவனங்கள் மூலம் கடன் தொகைகளை தவறாக பயன்படுத்தியதாக குற்றச்சாட்டுகள் உள்ளன. வங்கிகளிடமிருந்து பெறப்பட்ட கடன்கள், உண்மையான வணிக நடவடிக்கைகளுக்கு பயன்படுத்தப்படாமல், போலி நிறுவனங்கள் வழியாக மாற்றப்பட்டதாக அமலாக்கத்துறை விசாரணையில் தெரியவந்துள்ளது.

கடன் தொகைகள் சரியான வணிக நோக்கங்களுக்கு பயன்படுத்தப்படாமல், தொடர்புடைய நிறுவனங்கள் மற்றும் நபர்களுக்கு திருப்பி செலுத்தப்பட்டதாகவும் அமலாக்கத்துறை சந்தேகம் தெரிவித்துள்ளது. இந்த வழக்கில் பல்வேறு நிதி பரிவர்த்தனைகள் சந்தேகத்திற்குரியதாக இருப்பதாகவும் கூறப்படுகிறது.

பணமோசடி தடுப்புச் சட்டத்தின் கீழ் விசாரணை தீவிரமாக நடைபெற்று வருகிறது. நீதிமன்றம் அமலாக்கத்துறையின் காவல் கோரிக்கையை பரிசீலித்து விரைவில் தீர்ப்பு வழங்கும் என எதிர்பார்க்கப்படுகிறது.

இதையும் படிங்க நி்கர காப்பீடு வருவாய் அதிரடி உயர்வு.. எல்.ஐ.சி போனஸ் பங்குகள் வெளியீடு!