RMC Chennai | தமிழகத்தில் 14 மாவட்டங்களில் மழைக்கு வாய்ப்பு உள்ளதாக வானிலை ஆய்வு மையம் தெரிவித்துள்ளது.
RMC Chennai | தமிழகத்தில் 14 மாவட்டங்களில் மழைக்கு வாய்ப்பு உள்ளதாக வானிலை ஆய்வு மையம் தெரிவித்துள்ளது.
Published on: October 30, 2024 at 9:56 am
RMC Chennai | தென்தமிழகத்தில் உள் மாவட்டங்களில் ஒரு சில இடங்களிலும், வட தமிழக மாவட்டங்கள் மற்றும் கடலோர பகுதிகளில் ஒருசில இடங்களிலும் மழை பெய்துள்ளது.
வானிலை முன்னறிவிப்பு
30.10.2024: தமிழகத்தில் ஓரிரு இடங்களிலும், புதுவை மற்றும் காரைக்கால் பகுதிகளிலும் லேசானது முதல் மிதமான மழை பெய்யக்கூடும்.
31.10.2024: தமிழகத்தில் ஒருசில இடங்களிலும், புதுவை மற்றும் காரைக்கால் பகுதிகளிலும்,
இடி, மின்னலுடன் கூடிய லேசானது முதல் மிதமான மழை பெய்யக்கூடும்.
01.11.2024: தமிழகத்தில் ஒருசில இடங்களிலும் புதுவை மற்றும் காரைக்கால் பகுதிகளிலும்,
இடி, மின்னலுடன் கூடிய லேசானது முதல் மிதமான மழை பெய்யக்கூடும். ஈரோடு, கிருஷ்ணகிரி, தர்மபுரி, சேலம், திருப்பத்தூர், நாமக்கல், திருச்சிராப்பள்ளி, தேனி, திண்டுக்கல், மதுரை மற்றும் கரூர் மாவட்டங்களில் ஓரிரு இடங்களில் கனமழை பெய்யவாய்ப்புள்ளது.
02.11.2024: தமிழகத்தில் ஒருசில இடங்களிலும், புதுவை மற்றும் காரைக்கால் பகுதிகளிலும், இடி, மின்னலுடன் கூடிய லேசானது முதல் மிதமான மழை பெய்யக்கூடும்.
தென்காசி மற்றும் திருநெல்வேலி மாவட்டங்களின் மலைப்பகுதிகள், நீலகிரி. கோயம்புத்தூர், திருப்பூர், ஈரோடு, தேனி, திண்டுக்கல், விருதுநகர், மதுரை மற்றும் கன்னியாகுமரி மாவட்டங்களில் ஓரிரு இடங்களில் கனமழை பெய்யவாய்ப்புள்ளது.
03.11.2024 மற்றும் 04.11.2024: தமிழகத்தில் ஒருசில இடங்களிலும், புதுவை மற்றும் காரைக்கால் பகுதிகளிலும், லேசானது முதல் மிதமான மழை பெய்யக்கூடும்.
சென்னை மற்றும் புறநகர் பகுதிகளுக்கான வானிலை முன்னறிவிப்பு:
29.10.2024: வானம் ஓரளவு மேகமூட்டத்துடன் காணப்படும். நகரின் ஒருசில பகுதிகளில் லேசான மழை பெய்ய வாய்ப்புள்ளது. அதிகபட்ச வெப்பநிலை 35° செல்சியஸை ஒட்டியும், குறைந்தபட்ச வெப்பநிலை 27° செல்சியஸை ஒட்டியும் இருக்கக்கூடும்.
30.10.2024: வானம் ஓரளவு மேகமூட்டத்துடன் காணப்படும். நகரின் ஒருசில பகுதிகளில் லேசான மழை பெய்ய வாய்ப்புள்ளது. அதிகபட்ச வெப்பநிலை 35-36* செல்சியஸை ஒட்டியும், குறைந்தபட்ச வெப்பநிலை 26-27° செல்சியஸை ஒட்டியும் இருக்கக்கூடும்.
31.10.2024 (தீபாவளி தினம்): வானம் ஓரளவு மேகமூட்டத்துடன் காணப்படும். நகரின் ஒருசில பகுதிகளில் லேசான மழை பெய்ய வாய்ப்புள்ளது. அதிகபட்ச வெப்பநிலை 34-35* செல்சியஸை ஒட்டியும், குறைந்தபட்ச வெப்பநிலை 26-27″ செல்சியஸை ஒட்டியும் இருக்கக்கூடும்.
மீனவர்களுக்கான எச்சரிக்கை: ஏதுமில்லை என சென்னை வானிலை ஆய்வு மையம் தெரிவித்துள்ளது.
இதையும் படிங்க பசியில் காத்திருக்கும் பறவைகள்; மறைந்திருக்கும் 4 கிவி பழங்கள்: சரியா கண்டுபிடிச்சா நீங்க தான் கில்லி!
சென்னை, அக்.12, 2026: சென்னை: தேர்தலில் தோல்வியடைந்தாலும், கம்யூனிஸ்ட் இயக்கத்தின் அரசியல் பயணத்தைத் தடுத்து நிறுத்த முடியாது என்று மார்க்சிஸ்ட் கம்யூனிஸ்ட் கட்சியின் (சிபிஎம்) தமிழ்நாடு மாநிலச் செயலாளர் பெ. சண்முகம் தெரிவித்துள்ளார். மதுராந்தகம் மற்றும் தாராபுரம் சட்டமன்ற இடைத்தேர்தல்களில் இடதுசாரிக் கட்சிகளின் வேட்பாளர்களுக்கு வாக்களித்த மக்களுக்கு அவர் நன்றி தெரிவித்தார்.
மதுராந்தகத்தில் போட்டியிட்ட சிபிஎம் வேட்பாளர் பி. சுகந்தி, தாராபுரத்தில் போட்டியிட்ட இந்திய கம்யூனிஸ்ட் கட்சி (சிபிஐ) வேட்பாளர் லட்சுமணன் ஆகியோருக்கு ஆதரவாகப் பணியாற்றிய கட்சி நிர்வாகிகள் மற்றும் தொண்டர்களுக்கும் அவர் பாராட்டுத் தெரிவித்தார். இந்த இடைத்தேர்தல்களில் இரு கட்சிகளின் வேட்பாளர்களும் வைப்புத்தொகையை இழந்த நிலையில், தேர்தல் முடிவுகள் மட்டுமே ஒரு அரசியல் இயக்கத்தின் வளர்ச்சியையும் அதன் கொள்கைகளையும் தீர்மானிக்க முடியாது என்பதை இடதுசாரித் தலைவர்கள் வலியுறுத்தியுள்ளனர்.
தேர்தல் என்பது கம்யூனிஸ்டுகளின் நீண்டகால சமூக மாற்றப் போராட்டத்தின் ஒரு பகுதி மட்டுமே என்று சண்முகம் குறிப்பிட்டுள்ளார். பண பலம், அதிகார பலம் ஆகியவற்றைச் சாராமல், மாற்று அரசியலை மக்களிடம் எடுத்துச் செல்லும் நோக்கில் இடதுசாரிக் கட்சிகள் தேர்தல் பிரசாரத்தில் ஈடுபட்டதாக அவர் தெரிவித்துள்ளார். நாடாளுமன்றம் மற்றும் சட்டமன்றம் மட்டுமின்றி, மக்கள் மத்தியிலும் வீதிகளிலும் தொடர்ந்து போராடுவோம் என்றும் அவர் கூறியுள்ளார். தொழிலாளர்கள், விவசாயிகள், நடுத்தர வர்க்கத்தினர், சிறு வணிகர்கள், சிறு தொழில் முனைவோர், பெண்கள், இளைஞர்கள் மற்றும் மாணவர்களின் உரிமைகளுக்காக இடதுசாரி இயக்கங்கள் தொடர்ந்து குரல் கொடுக்கும் என்றும் அவர் உறுதியளித்துள்ளார்.
தேர்தல் வெற்றி, தோல்விகளைத் தாண்டி மக்களின் வாழ்வாதாரப் பிரச்சினைகளுக்காகத் தொடர்ந்து செயல்படுவதே இடதுசாரி அரசியலின் நோக்கம் என்றும் அவர் வலியுறுத்தியுள்ளார்.
இதற்கிடையே, இந்திய கம்யூனிஸ்ட் கட்சியின் தமிழ்நாடு மாநிலச் செயலாளர் மு. வீரபாண்டியனும் தேர்தல் முடிவுகளை மதிப்பதாகத் தெரிவித்ததுடன், சட்டமன்றத்தில் உள்ள இடங்களின் எண்ணிக்கையை வைத்து இடதுசாரிக் கட்சிகளின் அரசியலை மதிப்பிட முடியாது என்று குறிப்பிட்டுள்ளார். சாதி, மதம் மற்றும் பணத்தின் அடிப்படையில் தேர்தல்கள் நடைபெறக் கூடாது என்றும், தங்களுக்குக் கிடைத்த வாக்குகள் கொள்கை அடிப்படையில் கிடைத்தவை என்றும் அவர் தெரிவித்துள்ளார். தேர்தல் தோல்வியால் இடதுசாரி இயக்கங்களின் கொள்கைகளும் போராட்டங்களும் முடிவுக்கு வந்துவிடாது என்ற கருத்தை இரு தலைவர்களும் வலியுறுத்தியுள்ளனர்.
இதையும் படிங்க : தமிழக லஞ்ச ஒழிப்புத்துறை இயக்குநராக பிரேம் ஆனந்த் சின்ஹா நியமனம்!
திராவிடன் டைம்ஸின் செய்திகளை உடனுக்குடன் தெரிந்துக்கொள்ள
சென்னை, அக்.12, 2026: தமிழக லஞ்ச ஒழிப்புத்துறை (DVAC) இயக்குநராக, கூடுதல் காவல்துறை இயக்குநர் (ADGP) பிரேம் ஆனந்த் சின்ஹாவை நியமித்து தமிழக அரசு உத்தரவிட்டுள்ளது. தாம்பரம் மாநகர காவல் ஆணையராகப் பணியாற்றி வந்த அவர், தற்போது லஞ்ச ஒழிப்புத்துறையின் இயக்குநராக நியமிக்கப்பட்டுள்ளார்.
கடந்த ஜூலை 13-ஆம் தேதி, அப்போதைய லஞ்ச ஒழிப்புத்துறை இயக்குநர் ஏ. அருண் பணியிட மாற்றம் செய்யப்பட்டதைத் தொடர்ந்து, அந்தப் பதவி முழுநேர அதிகாரி இல்லாமல் இருந்து வந்தது. இதையடுத்து, துறையின் சிறப்புப் புலனாய்வுப் பிரிவு ஐஜியான சி. மகேஸ்வரி கூடுதல் பொறுப்பாக இயக்குநர் பணியைக் கவனித்து வந்தார். இந்நிலையில், தமிழக அரசின் புதிய உள்துறைச் செயலர் ஏ. கார்த்திக் வெளியிட்ட உத்தரவின்படி, காலியாக இருந்த இயக்குநர் பதவிக்கு பிரேம் ஆனந்த் சின்ஹா நியமிக்கப்பட்டுள்ளார். இந்த நியமனம் உடனடியாக நடைமுறைக்கு வருவதாகவும் அறிவிக்கப்பட்டுள்ளது.
பிரேம் ஆனந்த் சின்ஹா தாம்பரம் மாநகர காவல் ஆணையராகப் பொறுப்பு வகிப்பதற்கு முன்பு, காவல்துறையின் பல்வேறு முக்கியப் பதவிகளில் பணியாற்றியுள்ளார். 2001-ஆம் ஆண்டு ஐபிஎஸ் அதிகாரியாகத் தமிழக காவல்துறையில் இணைந்த அவர், தேவகோட்டை உதவி காவல் கண்காணிப்பாளராகப் பணியைத் தொடங்கி, பின்னர் பல்வேறு மாவட்டங்கள் மற்றும் முக்கியப் பிரிவுகளில் பணியாற்றினார்.
மத்திய போதைப்பொருள் தடுப்புப் பிரிவின் சென்னை மண்டல இயக்குநர், சென்னை காவல்துறையின் தெற்கு கூடுதல் ஆணையர், மதுரை மாநகர காவல் ஆணையர் உள்ளிட்ட பொறுப்புகளையும் வகித்துள்ளார். இதற்கிடையே, சென்னை மாநகர காவல் ஆணையர் ஏ. அமல்ராஜ், அடுத்த உத்தரவு பிறப்பிக்கப்படும் வரை தாம்பரம் மாநகர காவல் ஆணையர் பொறுப்பையும் கூடுதலாகக் கவனிப்பார் என அரசு தெரிவித்துள்ளது. ஊழல் புகார்கள் மற்றும் அரசியல் முக்கியத்துவம் வாய்ந்த வழக்குகளை விசாரிக்கும் லஞ்ச ஒழிப்புத்துறைக்கு முழுநேர இயக்குநர் நியமிக்கப்பட்டிருப்பது முக்கியத்துவம் பெற்றுள்ளது.
இதையும் படிங்க : தேர்தல் மனுக்கள், சீல் வாக்குப்பதிவு இயந்திரங்கள் பாதுகாப்பு.. அர்ச்சனா பட்நாயக்
திராவிடன் டைம்ஸின் செய்திகளை உடனுக்குடன் தெரிந்துக்கொள்ள
மும்பை, அக்.12, 2026: மறைந்த மூத்த பாலிவுட் நடிகர் நானா படேகரின் இறுதிச்சடங்கில் பாலிவுட் திரையுலகைச் சேர்ந்த பல பிரபலங்கள் பங்கேற்காதது குறித்து மராத்தி திரைப்பட இயக்குநரும் நடிகருமான பிரவீன் தர்டே அதிருப்தி தெரிவித்துள்ளார்.
ஏபிபி மாஜா (ABP Majha) தொலைக்காட்சியின் நேர்காணலில் பேசிய அவர், நானா படேகரைத் தங்களது நண்பர் என்று கூறிக்கொண்டவர்கள் குறைந்தபட்சம் அவரது இறுதிச்சடங்கிலாவது பங்கேற்றிருக்க வேண்டும் என்று தெரிவித்தார். இருப்பினும், திரையுலகப் பிரபலங்கள் வராதது நானா படேகரின் புகழையோ பெருமையையோ குறைத்துவிடாது என்றும் அவர் குறிப்பிட்டார்.
நானா படேகரின் இறுதிச்சடங்கில் ஆயிரக்கணக்கான விவசாயிகள் திரண்டு வந்து அஞ்சலி செலுத்தியதைப் பிரவீன் தர்டே பெரிதும் பாராட்டினார். நானா படேகர் ஒரு நடிகர் மட்டுமல்ல; விவசாயிகளுடன் நெருக்கமான தொடர்பு கொண்டிருந்தவர் என்றும், தன்னை முதன்மையாக ஒரு விவசாயியாகவே கருதியவர் என்றும் அவர் சுட்டிக்காட்டினார். பாலிவுட் நட்சத்திரங்கள் வாசனைத் திரவியங்களுடன் வருவதைவிட, உழைப்பின் வியர்வையும் மண்ணின் மணமும் கொண்ட விவசாயிகள் நானாவுக்கு அளித்த மரியாதை முக்கியமானது என்ற கருத்தையும் அவர் தெரிவித்தார். விவசாயிகளுக்காக நானா படேகர் ஆற்றிய பணிகளும், அவர்களுடன் கொண்டிருந்த உறவும் அவரது உண்மையான பெருமையை வெளிப்படுத்துவதாகப் பிரவீன் தர்டே கூறினார்.
மேலும், நானா படேகரின் இறுதிச்சடங்கில் நடிகர்கள் ஜாக்கி ஷெராஃப், இயக்குநர் அனீஸ் பாஸ்மி, தயாரிப்பாளர் சஜித் நாடியட்வாலா உள்ளிட்ட சில திரையுலகப் பிரபலங்கள் பங்கேற்றிருந்தனர். நானா படேகர் தனது 75-வது வயதில் அக்டோபர் 8-ஆம் தேதி கோவாவில் மாரடைப்பால் உயிரிழந்தார்.
புனே அருகேயுள்ள டோன்ஜே கிராமத்தில் உள்ள அவரது பண்ணை வீட்டில் முழு அரசு மரியாதையுடன் இறுதிச்சடங்குகள் நடைபெற்றன. நடிகர் மகரந்த் அனஸ்புரேவுடன் இணைந்து 2015-ஆம் ஆண்டு ‘நாம் ஃபவுண்டேஷன்’ அமைப்பைத் தொடங்கிய நானா படேகர், வறட்சியால் பாதிக்கப்பட்ட விவசாயிகளுக்கு உதவியதன் மூலம் மக்களிடையே தனித்துவமான மதிப்பைப் பெற்றிருந்தார். அவரது மறைவு திரையுலகத்தினரிடமும் விவசாயிகள் மத்தியிலும் பெரும் சோகத்தை ஏற்படுத்தியுள்ளது.
இதையும் படிங்க : ரேகா மீது காதல் இருந்ததா? அமிதாப் பச்சன் பதில் மீண்டும் வைரல்!
திராவிடன் டைம்ஸின் செய்திகளை உடனுக்குடன் தெரிந்துக்கொள்ள
மும்பை, அக்.12, 2026: பாலிவுட் நடிகர் அமிதாப் பச்சனுக்கும் நடிகை ரேகாவுக்கும் இடையே காதல் உறவு இருந்ததாகப் பல ஆண்டுகளாகப் பேசப்பட்டு வந்த வதந்திகள் மீண்டும் கவனம் பெற்றுள்ளன. 1970-களில் அமிதாப் பச்சன் முன்னணி நட்சத்திரமாக வளர்ந்த காலகட்டத்தில், ரேகாவுடன் அவர் நடித்த படங்களும், இருவரின் திரை இணையும் ரசிகர்களிடையே பெரும் வரவேற்பைப் பெற்றன. இதனால், இருவருக்கும் இடையே காதல் உறவு இருப்பதாக ஊடகங்களில் பல்வேறு செய்திகள் வெளியாகின. இந்த வதந்திகள் பல ஆண்டுகளாகத் தொடர்ந்த நிலையில், அமிதாப் பச்சன் அவற்றால் தனது தனிப்பட்ட வாழ்க்கையும் தொழில்முறை வாழ்க்கையும் பாதிக்கப்பட்டதாகக் கூறியிருந்தார்.
1990-களின் இறுதியில், பத்திரிகையாளர் பவானா சோமையா எழுதிய Amitabh Bachchan: The Legend என்ற நூலுக்கான உரையாடலில் அமிதாப் இந்த வதந்திகள் குறித்து விளக்கம் அளித்திருந்தார். ரேகாவுடன் தமக்குத் திருமணத்துக்கு அப்பாற்பட்ட உறவு இருப்பதாக வெளியான தகவல்களை அவர் மறுத்தார். இருவரும் இணைந்து பணியாற்றிய காலத்தில் சக நடிகர்களாகச் சந்தித்ததாகவும், சமூக ரீதியாகத் தங்களுக்கு அதிகத் தொடர்பு இல்லை என்றும் தெரிவித்தார். மேலும், ரேகா தனது வீட்டில் வசிப்பதாகவும், தான் அவரது வீட்டில் வசிப்பதாகவும் வெளியான செய்திகள் ஆதாரமற்றவை என்று கூறிய அவர், இதுபோன்ற தகவல்களைப் புகைப்படங்களுடன் வெளியிட்டது தவறான புரிதல்களை ஏற்படுத்துவதாகவும் சுட்டிக்காட்டினார். இந்த வதந்திகளை அவர் “ஒரு பெரிய கேலிக்கூத்து” என்று வர்ணித்ததாக இந்திய ஊடகங்கள் செய்தி வெளியிட்டுள்ளன.
அமிதாப் பச்சனும் ரேகாவும் டூ அன்ஜானே, முகாதர் ஹா சிக்கந்தர், சில்சிலா உள்ளிட்ட திரைப்படங்களில் இணைந்து நடித்துள்ளனர். குறிப்பாக, 1981-ல் வெளியான சில்சில்லா திரைப்படம், அமிதாப்–ரேகா–ஜெயா பச்சன் ஆகியோரின் நடிப்பால் இன்றளவும் ரசிகர்களிடையே பேசப்படும் படமாக உள்ளது.
இதற்கிடையே, 2004-ஆம் ஆண்டு சிமி கரேவால் நடத்திய நிகழ்ச்சியில் ரேகாவிடம் அமிதாப் மீது காதல் கொண்டிருந்தீர்களா என்று கேட்கப்பட்டபோது, அவரைப் பெரிதும் விரும்புவதாக வெளிப்படையாகப் பேசியிருந்தார். இருவரின் பழைய நேர்காணல்களும் கருத்துகளும் தற்போது மீண்டும் சமூக வலைதளங்களிலும் செய்திகளிலும் கவனம் பெற்றுள்ளன. இருப்பினும், அமிதாப் பச்சன் தங்களுக்கிடையேயான உறவு குறித்த வதந்திகளைத் தொடர்ந்து மறுத்து வந்துள்ளார்.
இதையும் படிங்க : அட இது நம்ம சுயம்பு அண்ணாச்சி ல.. ரூ.400 கோடி வசூலை கடந்த திரிஷ்யம்-3!
திராவிடன் டைம்ஸின் செய்திகளை உடனுக்குடன் தெரிந்துக்கொள்ள
சென்னை, அக்.12, 2026: சென்னை கிழக்குக் கடற்கரைச் சாலையில் உள்ள திருவிடந்தையில், உள்நாட்டிலேயே உருவாக்கப்பட்ட இரண்டு ஹைபிரிட் ராக்கெட்டுகள் ஒரே நேரத்தில் ஏவப்பட்டன. ‘மிஷன் RHUMI Twin 2026’ என்ற திட்டத்தின் கீழ், 2026 அக்டோபர் 10-ஆம் தேதி காலை 7 மணிக்கு இந்த ஏவுதல் நடைபெற்றது.
ஸ்பேஷ் ஸோன் இந்தியா, மார்டின் குரூப் மற்றும் அமெரிக்காவைச் சேர்ந்த குளோபல் ஹெல்ப் இன்டர்நேஷனல் பவுன்டேஷன் ஆகிய அமைப்புகள் இணைந்து இந்தத் திட்டத்தை முன்னெடுத்தன. ராக்கெட் இயக்கத்தை இடைநிறுத்திய பின்னர் மீண்டும் இயக்கும் மறுதொடக்கம் மற்றும் மறுபற்றவைப்பு (Restart and Reignition) தொழில்நுட்பத்தைச் சோதிப்பதும், விண்வெளி ஆராய்ச்சியில் மாணவர்களின் பங்களிப்பை அதிகரிப்பதும் இத்திட்டத்தின் முக்கிய நோக்கங்களாகும்.
இந்தச் சோதனையில் ஏவப்பட்ட ராக்கெட்டுகளுக்கு RHUMI 1 மற்றும் RHUMI 2 எனப் பெயரிடப்பட்டுள்ளது. ஹைபிரிட் உந்துவிசைத் தொழில்நுட்பத்துடன், உள்நாட்டிலேயே உருவாக்கப்பட்ட மறுதொடக்கக் கட்டமைப்பைக் கொண்டு இவை வடிவமைக்கப்பட்டுள்ளன. ஒவ்வொரு ராக்கெட்டும் 3.1 மீட்டர் நீளமும், 164 மில்லிமீட்டர் விட்டமும் கொண்டது; அதன் எடை 35 கிலோவாகும். இந்தச் சோதனையின் மூலம் சேகரிக்கப்படும் தரவுகள், எதிர்கால விண்வெளி ஆராய்ச்சி மற்றும் தொழில்நுட்ப மேம்பாட்டுக்குப் பயனுள்ளதாக இருக்கும் என எதிர்பார்க்கப்படுகிறது. மேலும், பள்ளி மற்றும் கல்லூரி மாணவர்கள் உருவாக்கிய அறிவியல் கருவிகளும் ராக்கெட்டுகளில் பொருத்தப்பட்டு, வளிமண்டலம் தொடர்பான தரவுகளைச் சேகரிக்க ஏற்பாடு செய்யப்பட்டது.
இந்த நிகழ்ச்சியில் கேரள ஆளுநர் ராஜேந்திர விஸ்வநாத் அர்லேகர் சிறப்பு விருந்தினராகக் கலந்துகொண்டு ராக்கெட் ஏவுதலைத் தொடங்கி வைத்தார். முன்னாள் இஸ்ரோ இயக்குநரும் பத்மஸ்ரீ விருது பெற்றவருமான மயில்சாமி அண்ணாதுரை, முன்னாள் பாதுகாப்பு ஆராய்ச்சி மற்றும் மேம்பாட்டு அமைப்பின் (DRDO) தலைவர் ஜி. சதீஷ் ரெட்டி உள்ளிட்ட விஞ்ஞானிகளும் பங்கேற்றனர். Space Zone India நிறுவனம் இதுவரை 5,000-க்கும் மேற்பட்ட மாணவர்களுக்கு விண்வெளித் தொழில்நுட்பப் பயிற்சி அளித்துள்ளதாக அதன் தலைவர் ஆனந்த் மேகலிங்கம் தெரிவித்துள்ளார். 2021-ல் 100 ஃபெம்டோ செயற்கைக்கோள்களையும், 2023-ல் 150 பைக்கோ செயற்கைக்கோள்களையும் ஏவிய இந்நிறுவனம், 2024-ல் ஹைபிரிட் ராக்கெட்டையும் ஏவியிருந்தது. இந்தத் திட்டத்திற்காக Martin Group நிறுவனம் தனது சமூகப் பொறுப்புணர்வு நிதியிலிருந்து ரூ.1.5 கோடிக்கும் அதிகமாகச் செலவிட்டுள்ளதாகத் தெரிவிக்கப்பட்டுள்ளது.
இதையும் படிங்க : ரூ.3.4 கோடி ஆன்லைன் முதலீட்டு மோசடி.. ஆந்திராவில் முக்கியக் குற்றவாளி கைது!
திராவிடன் டைம்ஸின் செய்திகளை உடனுக்குடன் தெரிந்துக்கொள்ள
திராவிடன் டைம்
திராவிடன் டைம்ஸ்.காம் (www.dravidantimes.com) ஆன்லைன் செய்தித்தளம் ஆகஸ்ட் 18 2024ல் தொடங்கப்பட்டது. தமிழ்நாடு, இந்தியா, சர்வதேசம், வணிகம், லைஃப்ஸ்டைல், சினிமா, ஆன்மிகம், தொழில்நுட்பம், கல்வி மற்றும் வேலைவாய்ப்பு என பலதரப்பட்ட செய்திகளை பக்கச்சார்பின்றி வெளியிடுகிறது.
© 2024 dravidantimes.com – developed and designed by Thirdvizion.com
