கன்னியாகுமரியில் தொடர் மழை.. ரப்பர் பால் வடிக்கும் பணி பாதிப்பு.. தொழிலாளர்கள் நிவாரணம் கோரிக்கை

Kanyakumari Rubber Tapping Crisis: கன்னியாகுமரியில் தொடர் மழை காரணமாக ரப்பர் பால் வடிக்கும் பணி பாதிக்கப்பட்டுள்ளது. இதனால், தொழிலாளர்கள் நிவாரணம் கோரிக்கை விடுத்துள்ளனர்.

ரப்பர் மரங்கள்

BySaranya JK

Published on: October 27, 2026 at 11:25 am

கன்னியாகுமரி, அக்.27, 2026: கன்னியாகுமரி மாவட்டத்தில் தொடர்ந்து பெய்து வரும் கனமழையால், ரப்பர் மரங்களில் இருந்து பால் எடுக்கும் பணி முற்றிலும் பாதிக்கப்பட்டுள்ளது. இதனால் ரப்பர் தோட்டங்களை நம்பி வாழும் ஆயிரக்கணக்கான தொழிலாளர்கள் வேலைவாய்ப்பின்றி தவித்து வருகின்றனர். ரப்பர் விவசாயிகளின் வருமானமும் கடுமையாகப் பாதிக்கப்பட்டுள்ளது.

கன்னியாகுமரி மாவட்டத்தில் ரப்பர் சாகுபடி முக்கியமான விவசாயத் தொழிலாக விளங்கி வருகிறது. சிறிய மற்றும் பெரிய ரப்பர் தோட்டங்களில் மழையின் காரணமாகப் பால் வடிக்கும் பணிகள் முடங்கியுள்ளன. மழைக்காலத்திலும் ரப்பர் பால் எடுக்க உதவும் வகையில் மரங்களில் மழைத் தடுப்புக் கவசங்கள் பொருத்தப்பட்டிருந்தாலும், தொடர்ந்து பெய்யும் மழையால் அவை போதிய பலனளிக்கவில்லை.

ரப்பர் பால் உற்பத்தி குறைந்துள்ளதால், ரப்பர் தாள்கள் தயாரிக்கும் தொழிற்சாலைகளுக்கும் மூலப்பொருள் தட்டுப்பாடு ஏற்பட்டுள்ளது. இதனால் ரப்பர் பதப்படுத்தும் தொழில்களும் பாதிக்கப்பட்டுள்ளன. முதிர்ந்த ரப்பர் மரங்களை வெட்டி விற்பனை செய்யும் தொழிலும் மந்தமடைந்துள்ளது.

பெரிய ரப்பர் தோட்டங்களில் பணிபுரியும் தொழிலாளர்களுக்கு மழைக்கால இழப்பீடு ஓரளவு வழங்கப்படும் நிலையில், சிறிய தோட்டங்களில் வேலை செய்யும் தொழிலாளர்களுக்கு வேலை இல்லாத நாட்களில் வருமானம் கிடைப்பதில்லை. எனவே, தொடர் மழையால் வாழ்வாதாரம் பாதிக்கப்பட்டுள்ள சிறு தோட்டத் தொழிலாளர்களுக்கு தமிழக அரசு நிதியுதவி மற்றும் உரிய நிவாரணம் வழங்க வேண்டும் என அவர்கள் கோரிக்கை விடுத்துள்ளனர்.

இதையும் படிங்க : ஒரு கேண்டி பருத்திக்கு ₹4,500 உயர்வு! தமிழக ஜவுளித் துறைக்கு அதிகரிக்கும் நெருக்கடி