2 வயதுக்குட்பட்ட குழந்தைகளுக்கு ஸ்கிரீன் டைம் கூடாது.. தினமும் 3 மணி நேரம் விளையாட்டு: WHO வழிகாட்டுதல் என்ன?

Child Health: ஐந்து வயதுக்குட்பட்ட குழந்தைகளின் ஆரோக்கியமான வளர்ச்சிக்காக, தினசரி உடல் இயக்கம், போதிய தூக்கம் மற்றும் திரை நேரத்தைக்(Screen time) கட்டுப்படுத்துவது அவசியம் என உலக சுகாதார நிறுவனம் வலியுறுத்தியுள்ளது.

தினமும் 3 மணி நேரம் விளையாட்டு

ByPushpa Gopinath

Published on: October 26, 2026 at 6:40 pm

புதுடெல்லி, அக். 26 2026: ஐந்து வயதுக்குட்பட்ட குழந்தைகளின் ஆரோக்கியமான வளர்ச்சிக்காக, உடல் இயக்கம், தூக்கம் மற்றும் திரை நேரம் தொடர்பான வழிகாட்டுதல்களை உலக சுகாதார நிறுவனம் (WHO) வலியுறுத்தியுள்ளது. குறிப்பாக, 1–2 வயதுக்குட்பட்ட குழந்தைகள் தினமும் குறைந்தது 180 நிமிடங்கள், அதாவது 3 மணி நேரம் பல்வேறு வகையான உடல் இயக்கச் செயல்பாடுகளில் ஈடுபட வேண்டும் எனப் பரிந்துரைக்கப்பட்டுள்ளது.

ஒரு வயதுக்குட்பட்ட குழந்தைகளுக்கு விழித்திருக்கும் நேரத்தில் பலமுறை தரையில் பாதுகாப்பாக விளையாடும் வாய்ப்புகளை வழங்க வேண்டும். இன்னும் தவழத் தொடங்காத குழந்தைகளுக்கு, விழித்திருக்கும் நேரத்தில் பல பகுதிகளாகப் பிரித்து குறைந்தது 30 நிமிடங்கள் குப்புறப் படுக்க வைத்து விளையாடும் பயிற்சி அளிக்கலாம். மேலும், குழந்தைகளைத் தொட்டில் வண்டி, உயரமான நாற்காலி உள்ளிட்டவற்றில் தொடர்ந்து ஒரு மணி நேரத்திற்கும் மேலாகக் கட்டுப்படுத்தி வைத்திருக்கக் கூடாது என அறிவுறுத்தப்பட்டுள்ளது.

ஒரு வயதுக்குட்பட்ட குழந்தைகளுக்கும், ஒரு வயது குழந்தைகளுக்கும் செயலற்ற திரை நேரம் பரிந்துரைக்கப்படவில்லை. இரண்டு வயது குழந்தைகளுக்கு ஒரு நாளில் அதிகபட்சம் ஒரு மணி நேரம் மட்டுமே திரை நேரம் இருக்க வேண்டும்; அதைவிடக் குறைவாக இருப்பது சிறந்தது. தொலைக்காட்சி மற்றும் மொபைல் திரைகளுக்குப் பதிலாக, பெற்றோர் குழந்தைகளுடன் சேர்ந்து புத்தகங்கள் வாசித்தல், பாடல்கள் பாடுதல், கதை சொல்லுதல் போன்ற செயல்களில் ஈடுபடுவது பயனுள்ளதாக இருக்கும் என WHO வழிகாட்டுதல் தெரிவிக்கிறது.

தூக்கத்தைப் பொறுத்தவரை, 4–11 மாதக் குழந்தைகளுக்கு ஒரு நாளில் 12–16 மணி நேரமும், 1–2 வயதுக் குழந்தைகளுக்கு 11–14 மணி நேரமும் தரமான தூக்கம் அவசியம். 3–4 வயதுக் குழந்தைகளும் தினமும் குறைந்தது 180 நிமிடங்கள் உடல் இயக்கச் செயல்பாடுகளில் ஈடுபட வேண்டும்; அதில் குறைந்தது 60 நிமிடங்கள் மிதமானது முதல் தீவிரமான உடற்பயிற்சியாக இருக்க வேண்டும். சிறு வயதிலிருந்தே விளையாட்டு, போதிய தூக்கம் மற்றும் குறைந்த திரை நேரம் ஆகியவற்றை வழக்கமாக்குவது குழந்தைகளின் உடல் மற்றும் அறிவாற்றல் வளர்ச்சிக்கு உதவும்.

இதையும் படிங்க: குணாதிசயங்கள் வேறுபட்டிருந்தாலும் உணர்வுப்பூர்வமாகப் பொருந்துகிறீர்களா? இதோ 7 அறிகுறிகள்!