‘மனித வன்முறை முடிவுறும்போது நான் ஓய்வு பெறுவேன்’.. நவி பிள்ளை!

Navi Pillay: “மனித உரிமை மீறல்கள் முடிவுக்கு வந்தால்தான் ஓய்வு பெறுவேன்” என நோபல் பரிசு பெற்ற நவி பிள்ளை தெரிவித்துள்ளார்.

நவி பிள்ளை

BySaranya JK

Published on: October 15, 2026 at 11:45 am

சென்னை, அக்.15, 2026: 2026ஆம் ஆண்டுக்கான அமைதிக்கான நோபல் பரிசு பெற்ற தென்னாப்பிரிக்க நீதித்துறை நிபுணர் நவி பிள்ளை, உலகில் மனித உரிமை மீறல்கள் முடிவுக்கு வரும் வரை ஓய்வு பெறப்போவதில்லை என்று தெரிவித்துள்ளார். மனித உரிமைகள், சர்வதேச நீதி மற்றும் சமத்துவத்துக்காகத் தொடர்ந்து குரல் கொடுத்து வரும் அவர், தி நியூ இந்தியன் எக்ஸ்பிரஸ் நாளிதழுக்கு அளித்த பேட்டியில் இதனைத் தெரிவித்துள்ளார்.

தமிழ் வம்சாவளியைச் சேர்ந்த நவி பிள்ளையின் தந்தைவழித் தாத்தா மதுரை அருகே உள்ள வத்தலகுண்டுவைச் சேர்ந்தவர். தென்னாப்பிரிக்காவில் நிறவெறிக்கு எதிராகவும், மனித உரிமைகளுக்காகவும் பணியாற்றிய அவர், சர்வதேச அளவில் நீதித்துறை மற்றும் மனித உரிமைகள் துறையில் முக்கியப் பங்களிப்புகளைச் செய்துள்ளார். இளம் தலைமுறையினர் தங்களுக்குக் கிடைத்துள்ள உரிமைகளை உணர்ந்து, அவற்றைப் பாதுகாக்கத் துணிச்சலுடன் குரல் கொடுக்க வேண்டும் என்றும் அவர் வலியுறுத்தியுள்ளார்.

இலங்கை உள்நாட்டுப் போரின்போது காணாமல் போன தங்களது உறவினர்களுக்கு என்ன நடந்தது என்பதை அறியக் காத்திருக்கும் தமிழர்களுக்கு நீதி கிடைக்க வேண்டும் என்றும் நவி பிள்ளை தெரிவித்துள்ளார். பாதிக்கப்பட்ட மக்களின் கோரிக்கைகளுக்கு சர்வதேச சமூகம் ஆதரவான சூழலை உருவாக்க வேண்டும் என்றும், நீதி கிடைப்பதற்கான முயற்சிகளைத் தொடர்ந்து முன்னெடுக்க வேண்டும் என்றும் அவர் கூறியுள்ளார். தென்னாப்பிரிக்காவில் நிறவெறி ஒழிக்கப்பட்டதைச் சுட்டிக்காட்டிய அவர், கூட்டு முயற்சியால் பெரிய மாற்றங்களையும் ஏற்படுத்த முடியும் என நம்பிக்கை தெரிவித்துள்ளார்.

தமிழகத்தில் சாதிப் பாகுபாடு தொடர்வது குறித்துப் பேசிய அவர், இந்திய அரசியலமைப்புச் சட்டம் சமத்துவத்துக்கான வலுவான அடித்தளத்தை வழங்குவதாகக் குறிப்பிட்டுள்ளார். இருப்பினும், தீங்கு விளைவிக்கும் பழக்கவழக்கங்களையும் சாதிப் பாகுபாட்டையும் ஒழிக்க மேலும் நடவடிக்கைகள் தேவை எனத் தெரிவித்துள்ளார். பெண்களுக்கு எதிரான வன்முறை, ஆயுத மோதல்கள் மற்றும் மனித உரிமை மீறல்கள் உலகளவில் கவலைக்குரிய பிரச்சினைகளாக உள்ளதாகவும், அனைவரையும் சமமாக நடத்துவதன் மூலமே நீதியும் சமத்துவமும் நிலைநாட்டப்படும் என்றும் அவர் வலியுறுத்தியுள்ளார்.

இதையும் படிங்க : ரஷ்யாவிடம் டீசல் வாங்க டிரம்ப் ஒப்பந்தம்.. அமெரிக்க காங்கிரஸில் கடும் எதிர்ப்பு!