Mamitha Baiju: ‘இரண்டு வானம்’ திரைப்படம் வெளியீடு ஒத்திவைக்கப்பட்டுள்ளது, நடிகர் விஷ்ணு விஷால், நடிகை மமிதா பைஜு ரசிகர்களுக்கு ஏமாற்றத்தை வழங்கியுள்ளது.
Mamitha Baiju: ‘இரண்டு வானம்’ திரைப்படம் வெளியீடு ஒத்திவைக்கப்பட்டுள்ளது, நடிகர் விஷ்ணு விஷால், நடிகை மமிதா பைஜு ரசிகர்களுக்கு ஏமாற்றத்தை வழங்கியுள்ளது.
Published on: October 13, 2026 at 3:31 pm
சென்னை, அக்.13, 2026: இயக்குநர் ராம்குமார் இயக்கத்தில் விஷ்ணு விஷால், மமிதா பைஜு இணைந்து நடித்துள்ள ‘இரண்டு வானம்’ திரைப்படத்தின் வெளியீடு ஒத்திவைக்கப்படுவதாகப் படக்குழு அறிவித்துள்ளது. முன்னதாக, இப்படம் அக்டோபர் 23ஆம் தேதி உலகம் முழுவதும் திரையரங்குகளில் வெளியாகும் என அறிவிக்கப்பட்டிருந்தது.
இந்நிலையில், தயாரிப்பு நிறுவனமான சத்யஜோதி ஃபிலிம்ஸ் அக்டோபர் 10ஆம் தேதி வெளியிட்ட அறிக்கையில், படத்தின் வெளியீட்டுத் தேதியை மாற்ற முடிவு செய்துள்ளதாகத் தெரிவித்தது. திரைப்படத்தை அதிகமான ரசிகர்களிடம் கொண்டு சேர்ப்பதற்கும், சிறந்த திரையரங்கு அனுபவத்தை வழங்குவதற்கும் ஏற்ற தேதியைத் தேர்வு செய்ய உள்ளதாகவும், புதிய வெளியீட்டுத் தேதி விரைவில் அறிவிக்கப்படும் என்றும் நிறுவனம் குறிப்பிட்டுள்ளது. மேலும், படத்தின் மீது நம்பிக்கை வைத்துள்ள விநியோகஸ்தர்கள், வர்த்தகக் கூட்டாளர்கள் மற்றும் ரசிகர்களுக்கு நன்றியும் தெரிவித்துள்ளது.
‘முண்டாசுப்பட்டி’, ‘ராட்சசன்’ ஆகிய வெற்றிப் படங்களைத் தொடர்ந்து, இயக்குநர் ராம்குமார் மற்றும் விஷ்ணு விஷால் மூன்றாவது முறையாக இணைந்துள்ள திரைப்படம் என்பதால் ‘இரண்டு வானம்’ மீது ரசிகர்கள் அதிக எதிர்பார்ப்பு வைத்துள்ளனர். காதல், உணர்வுகள் மற்றும் கற்பனை அம்சங்கள் கலந்த கதையாக இப்படம் உருவாகியுள்ளது.
உண்மையான அன்பு ஒருவரின் வாழ்க்கையில் எத்தகைய மாற்றங்களை ஏற்படுத்துகிறது என்பதை மையமாகக் கொண்டு கதை அமைக்கப்பட்டுள்ளதாகத் தகவல்கள் தெரிவிக்கின்றன. படத்தின் படப்பிடிப்பு கடந்த ஆண்டு ஜூன் 10ஆம் தேதி நிறைவடைந்தது. கொடைக்கானல் உள்ளிட்ட அழகிய இடங்களில் படப்பிடிப்பு நடைபெற்றது. படத்தின் முதல் தோற்றப் போஸ்டரில், வானத்தின் இரு பகுதிகளில் விஷ்ணு விஷாலும் மமிதா பைஜுவும் எதிரெதிர் திசைகளில் அமர்ந்திருப்பது போன்ற காட்சி இடம்பெற்றிருந்தது. இதுவும் படத்தின் தலைப்பும் ரசிகர்களிடையே ஆர்வத்தை ஏற்படுத்தின.
இப்படத்திற்கு திபு நினன் தாமஸ் இசையமைத்துள்ளார். தினேஷ் கே. பாபு ஒளிப்பதிவு செய்துள்ளார்; சான் லோகேஷ் படத்தொகுப்புப் பணிகளை மேற்கொண்டுள்ளார். கலை இயக்குநராக ஏ. கோபி ஆனந்தும், சண்டைப் பயிற்சி இயக்குநராக விக்கியும் பணியாற்றியுள்ளனர். செந்தில் தியாகராஜன் மற்றும் அர்ஜுன் தியாகராஜன் தயாரித்துள்ள இப்படத்தை டி.ஜி. தியாகராஜன் வழங்குகிறார்.
அக்டோபர் மாதத்தில் ரஜினிகாந்தின் ‘ஜெயிலர் 2’, சூர்யாவின் ‘சீன்’ உள்ளிட்ட பெரிய படங்கள் வெளியாக உள்ள நிலையில், திரையரங்குகளில் வசூல் போட்டியைத் தவிர்ப்பதற்காக ‘இரண்டு வானம்’ ஒத்திவைக்கப்பட்டிருக்கலாம் எனத் திரையுலகில் தகவல்கள் வெளியாகியுள்ளன. இருப்பினும், வெளியீட்டை ஒத்திவைத்ததற்கான குறிப்பிட்ட காரணத்தைப் படக்குழு அதிகாரப்பூர்வமாக அறிவிக்கவில்லை. புதிய வெளியீட்டுத் தேதி அறிவிக்கப்படும்போது, படத்தின் திரையரங்கு வெளியீட்டுத் திட்டம் குறித்த தெளிவான தகவல்கள் கிடைக்கும் என எதிர்பார்க்கப்படுகிறது.
இதையும் படிங்க : கமல், அமிதாப், ரஜினி இணைந்து நடித்த படம்.. கெராஃப்தார் தெரியுமா?
திராவிடன் டைம்ஸின் செய்திகளை உடனுக்குடன் தெரிந்துக்கொள்ள
திராவிடன் டைம்ஸ்.காம் (www.dravidantimes.com) ஆன்லைன் செய்தித்தளம் ஆகஸ்ட் 18 2024ல் தொடங்கப்பட்டது. தமிழ்நாடு, இந்தியா, சர்வதேசம், வணிகம், லைஃப்ஸ்டைல், சினிமா, ஆன்மிகம், தொழில்நுட்பம், கல்வி மற்றும் வேலைவாய்ப்பு என பலதரப்பட்ட செய்திகளை பக்கச்சார்பின்றி வெளியிடுகிறது.
© 2024 dravidantimes.com – developed and designed by Thirdvizion.com
