சவுதி மீது ஏவுகணை, ட்ரோன் தாக்குதல்! செங்கடல் பதற்றம் மீண்டும் தீவிரம்

Houthis Target Saudi: சவுதி அரேபியாவின் அராம்கோ எண்ணெய் கட்டமைப்புகளை குறிவைத்து ஹவுதி கிளர்ச்சியாளர்கள் ஏவுகணை மற்றும் ட்ரோன் தாக்குதல் நடத்தியதாக தெரிவித்துள்ளனர்.

சவுதி மீது ஏவுகணை தாக்குதல்

BySaranya JK

Published on: July 26, 2026 at 5:25 pm

ரியாத், ஜூலை 26, 2026: ஏமனின் ஈரான் ஆதரவு பெற்ற ஹவுதி கிளர்ச்சியாளர்கள், சவுதி அரேபியாவின் யான்பு மற்றும் ஜிசான் நகரங்களில் உள்ள அராம்கோ எண்ணெய் நிறுவனத்தின் கட்டமைப்புகளை குறிவைத்து ஏவுகணைகள் மற்றும் ட்ரோன்கள் மூலம் தாக்குதல் நடத்தியதாக தெரிவித்துள்ளனர். ஹொடைடா துறைமுக நகரின் மீது சவுதி நடத்திய வான்வழித் தாக்குதலுக்கு பதிலடியாக இந்த தாக்குதல் மேற்கொள்ளப்பட்டதாக ஹவுதி தரப்பு கூறியுள்ளது.

ஹவுதி ராணுவ செய்தித் தொடர்பாளர் பிரிகேடியர் ஜெனரல் யஹ்யா சரீ, இந்த தாக்குதல் அராம்கோ வசதிகளை குறிவைத்து நடத்தப்பட்டதாக தெரிவித்துள்ளார். இதையடுத்து யான்பு மற்றும் ஜிசான் நகரங்களில் வான்வழித் தாக்குதல் எச்சரிக்கை சைரன்கள் பலமுறை ஒலித்ததாக சவுதி சிவில் பாதுகாப்புத் துறை உறுதிப்படுத்தியுள்ளது.

சமீபத்தில், ஏமன் மீது சவுதி பொருளாதார முற்றுகையை அமல்படுத்துவதாக குற்றம்சாட்டிய ஹவுதி அமைப்பு, பாப் எல்-மண்டெப் நீரிணை வழியாகச் செல்லும் சவுதி தொடர்புடைய கப்பல்களை தடுக்கப்போவதாக எச்சரித்திருந்தது. உலகளாவிய கடல் வர்த்தகத்தில் முக்கிய பங்கு வகிக்கும் இந்த நீரிணை வழியாக சுமார் 12 சதவீத சர்வதேச வர்த்தகம் நடைபெறுகிறது.

முன்னதாக ஹவுதி அமைப்பு செங்கடலில் சவுதி எண்ணெய் கப்பல்களை தாக்கியதைத் தொடர்ந்து, ஹொடைடா துறைமுகம் மற்றும் அரசின் தொலைத்தொடர்பு நிறுவனத்தை குறிவைத்து சவுதி தலைமையிலான கூட்டுப் படைகள் வான்வழித் தாக்குதல் நடத்தியதாக தெரிவிக்கப்பட்டுள்ளது.

இந்த தாக்குதலில் இருவர் காயமடைந்ததாக ஹவுதி சுகாதாரத் துறை தெரிவித்துள்ளது. இதற்கிடையில், ஏமன் மோதலுக்கு இராணுவ நடவடிக்கைக்கு பதிலாக பேச்சுவார்த்தை மற்றும் தூதரக தீர்வை முன்னிறுத்த வேண்டும் என்று ஈரான் வெளியுறவுத்துறை அமைச்சர் அப்பாஸ் அராக்சி வலியுறுத்தியுள்ளார்.

இதையும் படிங்க: பெர்லின் பிரைட் பேரணியில் பயங்கரம்! கூட்டத்தில் வேன் பாய்ந்து ஒருவர் பலி