வந்தே மாதரம் பாடலை அவமதித்தால் தண்டனைக்குரிய குற்றம்.. மத்திய அரசு புதிய சட்டம்?

Bill on Vande Mataram : வந்தே மாதரம் பாடலை அவமதித்தால், தண்டனை வழங்கும்படி சட்டத்தில் திருத்தம் மேற்கொள்ள மத்திய அரசு திட்டமிட்டுள்ளதாக தகவல்கள் வெளியாகியுள்ளன.

இந்திய நாடாளுமன்றம்

ByJayakrishnan R

Published on: July 17, 2026 at 2:00 pm

புதுடெல்லி, ஜூலை 17, 2026: மத்திய அரசு, ‘வந்தே மாதரம்’ பாடலை அவமதிப்பதை இனி தண்டனைக்குரிய குற்றமாக்கும் வகையில் புதிய மசோதாவை கொண்டு வர உள்ளது. வரும் மழைக்கால கூட்டத்தொடரில் இந்த மசோதா அறிமுகப்படுத்தப்படவுள்ளதாக மக்களவை செயலகம் வெளியிட்ட நாடாளுமன்ற அலுவல் குறிப்பில் தெரிவிக்கப்பட்டுள்ளது.

இந்த மசோதா, தேசிய கவுரவத்துக்கு அவமதிப்பு ஏற்படுத்துவதைத் தடுக்கும் சட்டம் 1971-ல் திருத்தம் செய்யும் வகையில் கொண்டு வரப்படுகிறது. இதன் மூலம், ‘வந்தே மாதரம்’ பாடலை அவமதிப்பவர்களுக்கு சட்டரீதியான தண்டனை விதிக்கப்படும்.

இந்த நடவடிக்கை, தேசிய சின்னங்கள் மற்றும் தேசிய மரியாதையை பாதுகாக்கும் நோக்கத்துடன் மேற்கொள்ளப்படுவதாக அரசாங்கம் தெரிவித்துள்ளது. ‘வந்தே மாதரம்’ பாடல், இந்தியாவின் சுதந்திரப் போராட்டத்துடன் இணைந்த முக்கியமான தேசிய அடையாளமாகக் கருதப்படுகிறது.

மசோதா நாடாளுமன்றத்தில் அறிமுகப்படுத்தப்பட்டு நிறைவேற்றப்பட்டால், ‘வந்தே மாதரம்’ பாடலின் மரியாதையை காக்கும் வகையில் புதிய சட்டப்பூர்வ பாதுகாப்பு அமலுக்கு வரும். இது, தேசிய உணர்வுகளை வலுப்படுத்தும் முக்கியமான முன்னேற்றமாகக் கருதப்படுகிறது.

இதையும் படிங்க : இந்தியாவின் முதல் ஹைட்ரஜன் ரயில்.. பிரதமர் மோடி இன்று தொடங்கிவைக்கிறார்!