திருப்பதி தரிசன டிக்கெட் மோசடி. போலி பரிந்துரை கடிதம்.. ரூ.36,000 பறிமுதல்!

Tirupati Darshan ticket fraud case திருப்பதி ஏழுமலையான் கோவிலில் சுவாமி தரிசனம் செய்ய போலி பரிந்துரை கடிதம் அளித்த விவகாரத்தில் ஒருவர் கைது செய்யப்பட்டார்.

திருப்பதியில் போலி பரிந்துரை கடிதம்- ஒருவர் கைது

BySaranya JK

Published on: April 28, 2026 at 11:09 am

திருமலை, ஏப்.28, 2026: திருப்பதி ஏழுமலையான் கோவிலில் சுவாமி தரிசனம் செய்ய போலி பரிந்துரை கடிதம் அளித்த விவகாரத்தில் ஒருவர் கைது செய்யப்பட்டார். இந்நிலையில், திருப்பதி ஏழுமலையான் கோயிலில் சுவாமி தரிசனம் பெறுவதற்கான போலி பரிந்துரை கடிதங்கள் தொடர்பான மோசடிகள் அதிகரித்து வருவதாக போலீசார் எச்சரிக்கை விடுத்துள்ளனர்.

மேலும், அதிகாரப்பூர்வ திருமலை திருப்பதி தேவஸ்தானம் இணையதளம் மற்றும் கவுண்டர்களைத் தவிர வேறு வழிகளில் டிக்கெட் பெற முயற்சிப்பது ஆபத்தானது எனவும் அவர்கள் தெரிவித்துள்ளனர்.

போலி பரிந்துரை கடிதம் முறைகேடு

ஆந்திர மாநிலம் கிழக்கு கோதாவரி மாவட்டத்தைச் சேர்ந்த அனிதா, தனது குடும்பத்தினருடன் ஏழுமலையான் கோயிலில் சுவாமி தரிசனம் செய்ய திட்டமிட்டார். இதற்காக, அவருடைய நண்பர் மூலம் நவீன்குமார் என்ற நபரை தொடர்பு கொண்டனர். நவீன்குமார், சுவாமி தரிசன டிக்கெட்டுகளை ஏற்பாடு செய்து தருவதாக கூறி, அனிதா குடும்பத்தைச் சேர்ந்த 12 பேரிடமிருந்து ஒவ்வொருவரிடமும் ரூ.3,000 வீதம், மொத்தம் ரூ.36,000 தொகையை கூகுள் பே மூலம் பெற்றுக்கொண்டார்.

பின்னர், அவர் வாக்குறுதியின்படி டிக்கெட்டுகளை வழங்காமல் தவறியதால், ஏமாற்றப்பட்ட குடும்பம் புகார் அளித்தது. இந்த சம்பவம், ஏழுமலையான் கோயிலில் தரிசன டிக்கெட் தொடர்பான மோசடிகள் அதிகரித்து வருவதை வெளிப்படுத்துகிறது.

போலீசார், நவீன்குமார் மீது வழக்கு பதிவு செய்து விசாரணை நடத்தி வருகின்றனர். மேலும், பக்தர்கள் தரிசன டிக்கெட்டுகளை பெறுவதில் அதிகாரப்பூர்வ வழிகளை மட்டுமே பயன்படுத்த வேண்டும் என்று வலியுறுத்தப்படுகிறது. இதற்கிடையில், தேவஸ்தான ஊழியர்கள் சிலர் கூட போலி பரிந்துரை கடிதங்கள் மூலம் தரிசனம் ஏற்பாடு செய்வதாகக் கூறி பணம் வசூலித்த சம்பவங்கள் வெளிச்சத்துக்கு வந்துள்ளன என்பது குறிப்பிடத்தக்கது.

இதையும் படிங்க : தவெக தலைவர் விஜய் திருச்செந்தூரில் சாமி தரிசனம்