தயிர், சாம்பார் சாதத்துக்கு ருசி அள்ளும்.. கத்தரிக்காய் வறுவல் இப்படி பண்ணுங்க!

How to make Brinjal fry: சாம்பார் மற்றும் தயிர் சாதத்துக்கு சூப்பர் சைடிஷ் ஆன கத்திரிக்காய் வறுவல் இப்படி செஞ்சு பாருங்க.

கத்திரிக்காய் வறுவல்

ByDravidan Times Bureau

Published on: February 15, 2025 at 11:25 am

எளிமையாக செய்யக்கூடிய கத்திரிக்காய் வறுவல் எப்படி செய்யலாம் என்று பார்க்கலாம்.

தேவையான பொருள்கள்

கத்தரிக்காய் -½ கிலோ
நல்லெண்ணெய் – 3 டேபிள்ஸ்பூன்
சீரகம் -1 டீஸ்பூன்
சோம்பு -1 டீஸ்பூன்
கடுகு -1 டீஸ்பூன்
வெந்தயம் -¼ டீஸ்பூன்
கருவேப்பிலை -1 கைப்பிடி அளவு
சின்ன வெங்காயம் -1கப்
உப்பு – தேவையான அளவு
பூண்டு -1 டேபிள் ஸ்பூன்
மஞ்சள் தூள் -¼ டீஸ்பூன்
மிளகாய் தூள் -2 டீஸ்பூன்( காரத்திற்கு ஏற்ப சேர்க்கவும் )
மிளகுத்தூள் -½ டீஸ்பூன்
மல்லித்தூள்-1 டீஸ்பூன்

செய்முறை

முதலில் கத்தரிக்காயை நன்கு கழுவி காம்பு பகுதியை நீக்கி விட்டு நீளவாக்கில் வெட்டி எடுத்துக் கொள்ள வேண்டும். நறுக்கிய கத்தரிக்காயை தண்ணீரில் போட்டு வைக்க வேண்டும். இல்லாவிடில் கத்தரிக்காய் கருத்து விடும். ஒரு கடாயில் நல்லெண்ணெய் சேர்த்து எண்ணெய் காய்ந்ததும் அதில் சீரகம், சோம்பு, கடுகு, வெந்தயம் மற்றும் கருவேப்பிலை சேர்த்து அடுப்பு தீயை லோ ஃப்லேமில் வைத்து வறுக்க வேண்டும்.

இவை பொறிந்ததும் இதனுடன் பொடியாக நறுக்கிய சின்ன வெங்காயம் ஒரு கப் சேர்த்து கலந்து விட வேண்டும். சின்ன வெங்காயத்திற்கு பதிலாக பெரிய வெங்காயமும் சேர்த்துக் கொள்ளலாம். வெங்காயத்துடன் சிறிது உப்பு சேர்த்து வெங்காயம் பொன்னிறமாக மாறும் வரை வதக்கவும். உப்பு சேர்த்து வதக்குவதால் வெங்காயம் வேகமாக வதங்கும்.

வெங்காயம் பொன்னிறமாக வதங்கிய பின்னர் இதனுடன் ஒரு டேபிள் ஸ்பூன் தட்டிய பூண்டினை சேர்க்க வேண்டும். பூண்டின் பச்சை வாடை நீங்கும் வரை கிளறி விடவும். பின்னர் இதனுடன் நறுக்கிய கத்தரிக்காய் சேர்த்து கிளறி விடவும். தண்ணீர் சேர்க்காமல் கிளறவும். கத்தரிக்காய் வறுவல் செய்வதற்கு தண்ணீர் சேர்க்க வேண்டிய அவசியம் இல்லை.

பின்னர் இதில் மஞ்சள் தூள், மிளகாய் தூள், மிளகுத்தூள், மல்லித்தூள் சேர்த்து அடுப்பு தீயை லோ ஃபிளேமில் வைத்து கிளறி விடவும். வறுவலுக்கு தேவையான உப்பை சரிபார்த்துக் கொண்டு 5 நிமிடம் மூடி போட்டு வேக விடவும். பின்னர் இரண்டு நிமிடம் ஹை பிளேமில் வைத்து கத்தரிக்காய் உடையாமல் கிளறி விட்டு இறக்கவும். இப்போது சுவையான கத்தரிக்காய் வறுவல் தயார். இந்த கத்தரிக்காய் வறுவல் சாம்பார், தயிர் சாதம், ரசத்துடன் சேர்த்து சாப்பிட சுவையாக இருக்கும்.

இதையும் படிங்க சுவை நாவிலேயே நிற்கும் ; எண்ணெய் கத்திரிக்காய் குழம்பு ; இப்படி செஞ்சு அசத்துங்க!