டேஸ்டியான முட்டைகறி ; ஈஸியா செய்யலாம் ; எப்படி தெரியுமா?

How to make egg curry | இட்லி, தோசை, சப்பாத்தி போன்ற அனைத்துடனும் சேர்த்து சாப்பிடக்கூடிய சுவையான முட்டை கறி இப்படி செய்து பாருங்கள்.

முட்டை கறி

ByDravidan Times Bureau

Published on: January 18, 2025 at 9:50 am

குழந்தைகள் முதல் பெரியவர்கள் வரை அனைவரும் விரும்பி உண்ணக்கூடிய சுவையான முட்டை கறி எப்படி செய்யலாம் என்று பார்க்கலாம்.

தேவையான பொருட்கள்

எண்ணெய் -2 டேபிள் ஸ்பூன்
முட்டை -6
ஏலக்காய் -2
பட்டை -2 துண்டு
கிராம்பு -2
பெரிய வெங்காயம் – 2
கருவேப்பிலை- ஒரு கொத்து
தக்காளி -2
மிளகாய் தூள் -2 டீஸ்பூன்
மல்லித்தூள் -1½ டீஸ்பூன்
மஞ்சள் தூள் -¼ டீஸ்பூன்

அரைக்க வேண்டியது

முந்திரி பருப்பு -5
கொத்தமல்லி இலை – சிறிதளவு
மிளகாய் -2
இஞ்சி- ஒரு சிறிய துண்டு
பூண்டு – ஒரு கைப்பிடி அளவு
தேங்காய் – ஒரு கைப்பிடி அளவு

செய்முறை

ஒரு மிக்ஸி ஜாரில் முந்திரிப்பருப்பு, கொத்தமல்லி இலை, மிளகாய், இஞ்சி, பூண்டு, தேங்காய் மற்றும் தேவையான அளவு தண்ணீர் சேர்த்து மை போட்டு அரைத்து எடுத்துக் கொள்ள வேண்டும். ஒரு கடாயில் எண்ணெய் சேர்த்து எண்ணெய் காய்ந்ததும் அதில் பட்டை, கிராம்பு, ஏலக்காய் சேர்த்து வறுக்க வேண்டும்.

பின்னர் இதனுடன் நறுக்கிய பெரிய வெங்காயம் சேர்த்து வெங்காயம் பொன்னிறமாக மாறும் வரை வதக்கவும். வெங்காயத்துடன் சிறிது உப்பு சேர்த்து வதக்கும் போது வெங்காயம் விரைவாக வதங்கும். இதனுடன் கருவேப்பிலை மற்றும் அரைத்த தக்காளி விழுது சேர்த்து வதக்கவும். எண்ணெய் பிரிந்து தக்காளி நன்கு வெந்த பின்னர் இதனுடன் ஏற்கனவே அரைத்து வைத்த விழுதினை சேர்த்து வதக்கவும்.

பின்னர் அடுப்பு தீயை லோ ஃப்ளேமில் வைத்து மிளகாய் தூள், மல்லி தூள் மற்றும் மஞ்சள் தூள் சேர்த்து மசாலாவின் பச்சை வாடை நீங்கும் வரை வதக்கவும். இதனுடன் கிரேவிக்கு தேவையான அளவு தண்ணீர் சேர்த்து ஐந்து நிமிடம் கொதிக்க விட வேண்டும். கிரேவி நன்கு கொதித்த பின்னர் இதனுடன் அவித்த முட்டைகளை சேர்த்து கொதிக்க விடவும்.

இறுதியாக சிறிது கொத்தமல்லி இலைகளை தூவி இறக்கவும். இப்போது சுவையான முட்டை கிரேவி தயார். இது இட்லி, தோசை, சப்பாத்தி, தேங்காய் பால் சாதம், புலாவ் போன்றவைகளுடன் சேர்த்து சாப்பிட சுவையாக இருக்கும்.

இதையும் படிங்க : காரமான கனவா மீன் மசாலா ; ஜம்முன்னு செஞ்சு சாப்பிடுங்க !