விண்வெளியில் தவிக்கும் இரு உயிர்கள்.. திரும்ப வருவதில் மீண்டும் தாமதம் ஏன்?

Sunita Williams return: நாசா விண்வெளி வீரர்களான சுனிதா வில்லியம்ஸ் மற்றும் புட்ச் வில்மோர் ஆகியோரை சர்வதேச விண்வெளி நிலையத்திலிருந்து திரும்புவதில் மீண்டும் சிக்கல் ஏற்பட்டுள்ளது.

சுனிதா வில்லியம்ஸ்

ByLeela Sankar

Published on: March 13, 2025 at 11:01 am

Updated on: March 13, 2025 at 11:48 am

சுனிதா வில்லியம்ஸ் மீட்பு மிஷன் 2025: நாசாவின் ஸ்பேஸ்எக்ஸ் க்ரூ-10 மிஷன் மார்ச் 14ஆம் தேதி வெள்ளிக்கிழமை மாலை 7:03 மணிக்கு விண்ணில் ஏவப்பட உள்ளதாக தெரிவிக்கப்பட்டுள்ளது. இந்த மிஷனில், நான்கு விண்வெளி வீரர்களை சர்வதேச விண்வெளி நிலையத்திற்கு அனுப்புகிறது.

இந்த பணி, நாசா விண்வெளி வீரர்களான சுனிதா வில்லியம்ஸ் மற்றும் புட்ச் வில்மோர் ஆகியோரை சர்வதேச விண்வெளி நிலையத்திலிருந்து திரும்ப அழைத்து வருவதை நோக்கமாகக் கொண்டுள்ளது.

மீண்டும் தாமதம் ஏன்?

மோசமான வானிலை மற்றும் விமானப் பாதையில் பலத்த காற்று வீசியதே இதற்கு காரணம் எனக் கூறப்படுகிறது. இது குறித்து, நாசா ட்விட்டர் எக்ஸ் தளத்தில், பலத்த காற்றும் மற்றும் மழை எதிர்பார்க்கப்படுவதால், வியாழக்கிழமை (மார்ச் 13, 2025) முதல் ஏவுதல் தாமதமானது என்று தெரிவித்துள்ளது.

இதற்கிடையில், லாஞ்ச் காம்ப்ளக்ஸ் 39A இல் உள்ள ஃபால்கன் 9 ராக்கெட்டிற்கான தரை ஆதரவு கிளாம்ப் ஆர்மில் உள்ள ஹைட்ராலிக் சிக்கலை சரிசெய்ய ஏவுதளக் குழுக்கள் பணியாற்றி வருகின்றன எனக் கூறப்பட்டுள்ளது.

முன்னதாக, வியாழக்கிழமை சர்வதேச விண்வெளி நிலையத்திற்கு ஒரு புதிய குழுவினரை அனுப்புவதற்காக புளோரிடாவிலிருந்து ஸ்பேஸ்எக்ஸ் ராக்கெட்டை ஏவ நாசா தயாராக இருந்தது.
போயிங்கின் ஸ்டார்லைனரில் ஏற்பட்ட சிக்கலால் ஒன்பது மாதங்களாக விண்வெளியில் சுனிதா வில்லியம்ஸ் மற்றும் புட்ச் வில்மோர் ஆகியோர் சிக்கித் தவிக்கின்றனர்.

இவர்களை மீண்டும் பூமிக்கு அழைத்து வர இந்த பணி உதவும் எனத் தெரிவிக்கப்பட்டுள்ளது. அமெரிக்க ஜனாதிபதி டொனால்ட் டிரம்ப் மற்றும் ஸ்பேஸ்எக்ஸ் தலைமை நிர்வாக அதிகாரி எலோன் மஸ்க் ஆகியோர் இவர்களை முன்னதாக பூமிக்கு திரும்ப கொண்டு வர உறுதி பூண்டுள்ளனர் என்பது குறிப்பிடத்தக்கது.

இதையும் படிங்க : இதுவே சரியான நேரம்: இந்தியாவுக்கு தொழில் தொடங்க வாருங்கள்; பிரதமர் நரேந்திர மோடி