லண்டனில் இந்திய இளைஞர் குத்திக் கொலை.. போலீசார் விசாரணை!

Indian-origin man dies in UK attack : லண்டனில் 26 வயதான இந்திய இளைஞர் குர்பேஜ் சிங் என்பவர் குத்திக் கொல்லப்பட்டார்.

கொல்லப்பட்ட இந்திய இளைஞர் குர்பேஜ் சிங்

BySaranya JK

Published on: June 14, 2026 at 12:58 pm

லண்டன், ஜூன் 14, 2026: லண்டன் சவுத் ஹாலில் இந்திய வம்சாவளி இளைஞர் குர்பேஜ் சிங் (26) குத்திக்கொலை செய்யப்பட்ட சம்பவம் பெரும் அதிர்ச்சியை ஏற்படுத்தியுள்ளது. போலீசார் விசாரணை தீவிரப்படுத்தி, சாட்சியங்களை வெளிப்படுத்துமாறு பொதுமக்களிடம் வேண்டுகோள் விடுத்துள்ளனர்.

லண்டன் சவுத் ஹாலில் உள்ள நார்த் ரோடு, டார்மர்ஸ் வெல்ஸ் லேன் சந்திப்பில் புதன்கிழமை அதிகாலை 12.41 மணிக்கு இந்தக் கொலை நடந்ததாக போலீஸ் வட்டாரங்கள் தெரிவிக்கின்றன. அப்போது ஆம்புலன்ஸ் சேவை போலீசாருக்கு தகவல் அளித்தது. சம்பவ இடத்தில் இருவர் காயமடைந்த நிலையில் கிடைத்தனர். அவர்களில் குர்பேஜ் சிங் சம்பவ இடத்திலேயே உயிரிழந்தார். மற்றொருவர் 30 வயதானவர்; அவர் மருத்துவமனையில் சிகிச்சை பெற்று வெளியேற்றப்பட்டார்.

கைது நடவடிக்கை

இந்த சம்பவத்துடன் தொடர்புடையதாக 20 முதல் 30 வயதுக்குள் உள்ள ஏழு பேர் கைது செய்யப்பட்டனர். ஆரம்ப விசாரணைக்குப் பிறகு அவர்களில் ஆறு பேருக்கு மேலான நடவடிக்கை எடுக்கப்படவில்லை. ஏழாவது நபர் ஜாமீனில் விடுவிக்கப்பட்டு, பின்னர் மீண்டும் ஆஜராகுமாறு உத்தரவிடப்பட்டது.

சி.சி.டி.வி காட்சிகள் ஆய்வு

மெட்ரோபாலிடன் போலீசின் சிறப்பு குற்றப்பிரிவு அதிகாரி அலிசன் ஃபாக்ஸ்வெல், “சம்பவத்தை நேரில் கண்டவர்கள், அல்லது அந்த பகுதியில் சிசிடிவி காட்சிகள் வைத்திருப்பவர்கள் உடனடியாக போலீசாரிடம் தெரிவிக்க வேண்டும்” என்று கேட்டுக்கொண்டார். அவர் மேலும், “குர்பேஜ் சிங்கின் மரணம் மிகுந்த துயரமானது. அவரது குடும்பத்தாருக்கு எங்கள் ஆழ்ந்த அனுதாபங்கள்” என தெரிவித்தார்.

தொடர் விசாரணை

குர்பேஜ் சிங் ஒரு கடையின் வெளியே தாக்கப்பட்டதாக போலீசார் தெரிவித்துள்ளனர். தாக்குதலின் காரணம் மற்றும் சூழ்நிலைகள் இன்னும் வெளிச்சம் பார்க்கவில்லை. போலீசார் தொடர்ந்து விசாரணை நடத்தி வருகிறார்கள். பாதிக்கப்பட்ட குடும்பத்தாருக்கு தேவையான ஆதரவு வழங்கப்படுவதாகவும் அதிகாரிகள் உறுதியளித்துள்ளனர்.

இதையம் படிங்க : துபாய் சாலை விபத்தில் 7 இந்தியர்கள் மரணம்.. 9 பேர் காயம்!