எங்கிருந்தும் பத்திரப் பதிவு: தமிழக பதிவுத்துறையில் புதிய நடைமுறை!

Anywhere Registration : தமிழகபத்திரப் பதிவுத்துறை ஆன்லைன் ஆவணப் பதிவு முறையை விரைவில் கட்டாயமாக்க உள்ளதாக அறிவித்துள்ளது.

தமிழக சட்டப்பேரவை

BySaranya JK

Published on: June 7, 2026 at 5:40 pm

சென்னை, ஜுன் 7 2026: தமிழ்நாடு பதிவு துறை, “Anywhere Registration” (எங்கிருந்தும் ஆவணப்பதிவு)எனப்படும் ஆன்லைன் ஆவணப் பதிவு முறையை விரைவில் கட்டாயமாக்க உள்ளதாக அறிவித்துள்ளது.

இந்த புதிய முறையின் மூலம், பொதுமக்கள் சார்பதிவாளர் அலுவலகங்களுக்கு நேரில் செல்லாமல், இணையதளம் வாயிலாக எந்த இடத்திலிருந்தும் எந்த நேரத்திலும் ஆவணங்களை பதிவு செய்ய முடியும்.

பதிவுத்துறை வெளியிட்டுள்ள அறிவிப்பின்படி, முதல் கட்டமாக கீழ்க்கண்ட ஆவணங்களுக்கு இந்த சேவை நடைமுறைக்கு வருகிறது:

முதல்முறை மனைகள் (Plots) விற்பனைப் பதிவுகள்
முதல்முறை அடுக்குமாடி குடியிருப்புகள் (Flats) விற்பனைப் பதிவுகள்
தமிழ்நாடு வீட்டு வசதி வாரியத்தின் (Housing Board) விற்பனைப் பத்திரங்கள்
வங்கிக் கடன்களுக்கான அடமானப் பத்திரங்கள் மற்றும் ரசீது ஆவணங்கள்

ஆன்லைனில் பதிவேற்றப்பட்ட ஆவணங்கள் சார்பதிவாளரால் சரிபார்க்கப்பட்டு ஒப்புதல் அளிக்கப்பட்ட பின்னர், டிஜிட்டல் கையொப்பத்துடன் பதிவு செய்யப்பட்ட ஆவணம் விண்ணப்பதாரரின் உள்நுழைவு கணக்கிலும், வாட்ஸ்அப் மூலமும் அனுப்பப்படும். பின்னர் அவற்றை இணையதளத்தில் இருந்து பதிவிறக்கம் செய்துகொள்ளலாம்.

பொதுமக்கள், கட்டிடத் தொழிலாளர்கள் (Builders), ஆவண எழுத்தர்கள், வங்கிகள் மற்றும் வழக்கறிஞர்கள் ஆகியோர் தனிப்பட்ட உள்நுழைவு கணக்குகளை உருவாக்கி ஆவணங்களை நேரடியாக சமர்ப்பிக்கலாம் என பதிவுத்துறை தெரிவித்துள்ளது.

இந்த முறையில், செயற்படுத்துபவர்கள், உரிமையாளர்கள் மற்றும் சாட்சியர்களின் ஆதார் விவரங்கள் பதிவேற்றப்பட வேண்டும்.மேலும், UIDAI தரவுத்தளத்துடன் இணைக்கப்பட்டுள்ள கைரேகை அல்லது கருவிழி (Iris) அடையாளச் சரிபார்ப்பு மூலம் உறுதிப்படுத்தல் மேற்கொள்ளப்படும்.

இணைய இணைப்பு, UIDAI அங்கீகரித்த கைரேகை கருவி, கருவிழி ஸ்கேனர் மற்றும் வெப்கேம் ஆகியவை அவசியமான தொழில்நுட்ப தேவைகளாக பட்டியலிடப்பட்டுள்ளன. அதிகாரிகள், இந்த நடைமுறை ஆவணப் பதிவு செயல்முறையை எளிமைப்படுத்தி, அலுவலகங்களுக்கு நேரில் செல்ல வேண்டிய அவசியத்தை குறைக்கும் என தெரிவித்துள்ளனர்.

இதையும் படிங்க 3 நாள் டைம், பகிரங்க மன்னிப்பு.. த.வெ.க பெண் எம்.எல்.ஏ.வுக்கு தி.மு.க. நோட்டீஸ்!