தூத்துக்குடியில் இளைஞர் மரணம்.. போலீஸ் சித்ரவதை என குற்றச்சாட்டு!

Custodial Torture : தூத்துக்குடி தெற்கு காவல் நிலையத்தில் 24 வயது இளைஞர் அருணாசலம் உயிரிழந்த சம்பவம் பெரும் அதிர்ச்சியை ஏற்படுத்தியுள்ளது.

உயிரிழந்த இளைஞர் அருணாச்சலம்

ByJayakrishnan R

Published on: July 23, 2026 at 3:31 pm

தூத்துக்குடி, ஜூலை 23, 2026: தூத்துக்குடி தெற்கு காவல் நிலையத்தில் 24 வயது இளைஞர் அருணாசலம் உயிரிழந்த சம்பவம் தமிழகத்தில் பெரும் அதிர்ச்சியை ஏற்படுத்தியுள்ளது.

சட்டவிரோதமாக மது பாட்டில்களை விற்றதாகக் கூறி ஜூலை 17 அன்று கைது செய்யப்பட்ட அவர், காவல் நிலைய சித்திரவதைக்கு ஆளானதாக உறவினர்கள் குற்றம் சாட்டினர். விசாரணையின் போது நான்கு காவலர்கள் தாக்கியதால் தலை மற்றும் உடலில் பலத்த காயங்கள் ஏற்பட்டதாகவும், சிகிச்சை பெற்று வந்த அவர் வியாழக்கிழமை (ஜூலை 23, 2026) அதிகாலையில் உயிரிழந்ததாகவும் குடும்பத்தினர் தெரிவித்தனர்.

அமுதா நகரைச் சேர்ந்த அருணாசலம், டாஸ்மாக் மதுபானக் கடையில் விற்பனையாளராகப் பணியாற்றி வந்தார். கைது செய்யப்பட்ட பிறகு 120 மது பாட்டில்கள் பறிமுதல் செய்யப்பட்டதாக காவல் துறை தெரிவித்தது.
கைது நடைமுறைகள் அனைத்தும் பின்பற்றப்பட்டதாகவும், மருத்துவ பரிசோதனையில் வெளிப்புறக் காயங்கள் ஏதுமில்லை என சான்றளிக்கப்பட்டதாகவும் காவல் துறை வட்டாரங்கள் கூறுகின்றன. ஆனால், காவல் நிலையத்தில் அவர் திடீரென மயங்கி விழுந்ததாகவும், பின்னர் மருத்துவமனையில் அனுமதிக்கப்பட்டதாகவும் தகவல்கள் வெளியாகின.

உயிரிழந்த அருணாசலத்தின் உறவினர்கள் மருத்துவமனை வளாகத்தில் போராட்டத்தில் ஈடுபட்டனர். தாக்குதலில் ஈடுபட்ட நான்கு காவலர்களைக் கைது செய்ய வேண்டும் என்றும், சந்தேகத்திற்குரிய காவலர்கள் மீது எஃப்.ஐ.ஆர் பதிவு செய்யப்பட வேண்டும் என்றும் அவர்கள் வலியுறுத்தினர். அவரது தாயார் பரமேஸ்வரி, “காவல் நிலையத்தில் நான்கு பேர் கொடூரமாகத் தாக்கினர்; நீதி கிடைக்க அவர்கள் கைது செய்யப்பட வேண்டும்” என்று கூறினார்.

காவல் துறை வட்டாரங்கள், கைது செய்யப்பட்ட பிறகு அனைத்து சட்ட நடைமுறைகளும் பின்பற்றப்பட்டதாகவும், வீடியோ பதிவுடன் உடல் சோதனை நடத்தப்பட்டதாகவும் தெரிவித்தன. மேலும், அவர் காவல் நிலைய ஜாமீனில் விடுவிக்கப்பட்டு, முன்னெச்சரிக்கை நடவடிக்கையாக மேல் மருத்துவ பரிசோதனைக்காக அனுப்பப்பட்டதாகவும் கூறினர். ஆனால், சிகிச்சை பெற்று வந்த நிலையில் அவர் உயிரிழந்ததால், காவல் துறையின் விளக்கங்கள் குறித்து சந்தேகம் எழுந்துள்ளது.

அவரது தந்தை அளித்த புகாரின் அடிப்படையில் வழக்குப்பதிவு செய்யப்பட்டுள்ளதாகவும், இது குறித்த விசாரணை தொடர்ந்து நடைபெற்று வருவதாகவும் காவல் துறை தெரிவித்துள்ளது. இந்தச் சம்பவம் தமிழகத்தில் காவல் துறை நடவடிக்கைகள் குறித்து மீண்டும் கேள்விகளை எழுப்பியுள்ளது.

இதையும் படிங்க : 72 நாள்களில் ஆளுங்கட்சியின் சாதனைகள் என்ன? கி. வீரமணி