டி.டி.வி தினகரனுக்கு எதிரான வழக்கு.. எடப்பாடி பழனிச்சாமி வாபஸ்!

சென்னை ஏப்ரல் 16 2025: அம்மா மக்கள் முன்னேற்றக் கழகத்தின் பொதுச்செயலாளர் டிடிவி தினகரனுக்கு எதிரான வழக்கை, தமிழ்நாட்டின் முன்னாள் முதலமைச்சரும் அதிமுக பொதுச்செயலாளருமான எடப்பாடி பழனிச்சாமி வாபஸ் பெற்றார்.

இது தமிழக அரசியல் வட்டாரத்தில் பெரும் பரபரப்பை ஏற்படுத்தி உள்ளது. அனைத்திந்திய அண்ணா திராவிட முன்னேற்றக் கழகத்தில் இருந்து டிடிவி தினகரன் நீக்கப்பட்டபோது, அவர் அதிமுக போன்ற கொடியையும், மறைந்த முதலமைச்சர் ஜெயலலிதாவின் புகைப்படத்தையும் பயன்படுத்தினார்.

இந்த நிலையில் அதிமுக பொதுச்செயலாளர் எடப்பாடி பழனிச்சாமி தரப்பில் சென்னை உயர்நீதிமன்றத்தில் வழக்கு ஒன்று தாக்கல் செய்யப்பட்டது. அந்த வழக்கில் அதிமுக கொடியை போன்று அம்மா மக்கள் முன்னேற்ற கழகம் கொடி இருக்கக் கூடாது என்றும்; முன்னாள் முதலமைச்சர் ஜெயலலிதாவின் படத்தையும் டிடிவி தினகரன் பயன்படுத்தக் கூடாது என்றும் கூறப்பட்டிருந்தது.

இது தொடர்பான வழக்கு சென்னை உயர்நீதிமன்றத்தில் நடந்து வருகிறது. இந்த நிலையில் இவ்வழக்கை எடப்பாடி பழனிச்சாமி திரும்ப பெற்றுள்ளார். இது தமிழ்நாடு அரசியல் வட்டாரத்தில் பெரும் பரபரப்பை ஏற்படுத்தியுள்ளது.

2026 சட்டமன்ற தேர்தலில், அதிமுகவும் பாஜகவும் கூட்டணி அமைத்து தேர்தலை சந்திக்கின்றன. இந்தக் கூட்டணியில் அம்மா மக்கள் முன்னேற்ற கழகம் இணையும் என எதிர்பார்க்கப்படுகிறது.
அம்மா மக்கள் முன்னேற்ற கழகம் தவிர தமிழ்நாட்டின் முன்னணி கட்சிகளான பாட்டாளி மக்கள் கட்சியும், தேசிய முற்போக்கு திராவிட கழகமும் இந்தக் கூட்டணியில் இணையும் என எதிர்பார்க்கப்படுகிறது.

இதையும் படிங்க: தமிழ்நாட்டில் எத்தனை பேருக்கு எச்ஐவி பாதிப்பு தெரியுமா? அமைச்சர் வெளியிட்ட அதிர்ச்சி தகவல்!