இரகசிய தகவல்கள் பகிர்ந்த ராணுவ வீரர் மனைவி? ஜம்மு காஷ்மீரில் வழக்குப்பதிவு!

Army Spy Allegations: ராணுவ அதிகாரியின் மனைவி மீது உளவு பார்த்ததாகக் குற்றச்சாட்டு எழுந்துள்ள நிலையில், ஜம்மு காஷ்மீரில் வழக்குப்பதிவு செய்யப்பட்டுள்ளது.

எஃப்.ஐ.ஆர் பதிவு

BySaranya JK

Published on: October 19, 2026 at 3:04 pm

புதுடெல்லி, அக்.19, 2026: ஜம்மு காஷ்மீரில் பணியாற்றும் ராணுவ அதிகாரி ஒருவரின் மனைவி, வெளிநாட்டு உளவு அமைப்புகளுடன் தொடர்பில் இருந்து நாட்டின் பாதுகாப்பு தொடர்பான முக்கியத் தகவல்களைப் பகிர்ந்ததாகக் குற்றச்சாட்டு எழுந்துள்ளது. தெலங்கானாவைச் சேர்ந்த அந்தப் பெண், தற்போது ஜம்முவில் தனது கணவருடன் வசித்து வருகிறார். இந்த விவகாரம் தொடர்பாக ஜம்மு காஷ்மீர் காவல்துறையினர் வழக்குப்பதிவு செய்துள்ளனர்.

வெளிநாட்டு உளவு அமைப்புகளுடன் தொடர்புடையவர்கள், கல்வியாளர்கள் மற்றும் ஆராய்ச்சியாளர்கள் எனத் தங்களை அறிமுகப்படுத்திக்கொண்டு அந்தப் பெண்ணுடன் தொடர்புகொண்டதாக விசாரணை வட்டாரங்கள் தெரிவித்துள்ளன. முதலில் சுற்றுச்சூழல் மற்றும் புவிசார் அரசியல் தொடர்பான கட்டுரைகளை எழுதச் செய்த அவர்கள், பின்னர் பாதுகாப்பு மற்றும் ராணுவ முக்கியத்துவம் வாய்ந்த விவகாரங்கள் தொடர்பாகத் தகவல்களைப் பெற முயன்றதாகச் சந்தேகிக்கப்படுகிறது.

இந்த விவகாரத்தில் சீனாவுடன் தொடர்புடைய உளவு நடவடிக்கையாளர்களுக்கும் தொடர்பு இருக்கலாம் என அதிகாரிகள் சந்தேகிக்கின்றனர். இதுதொடர்பாக ஜம்முவில் உள்ள காந்தி நகர் காவல் நிலையத்தில், அதிகாரப்பூர்வ ரகசியங்கள் சட்டம் மற்றும் பாரதிய நியாய சன்ஹிதாவின் தொடர்புடைய பிரிவுகளின்கீழ் வழக்குப்பதிவு செய்யப்பட்டுள்ளது. காவல்துறையினர் அந்தப் பெண்ணிடம் விசாரணை நடத்தியுள்ளனர்.

எனினும், இதுவரை நடைபெற்ற முதற்கட்ட விசாரணையில், அவர் உண்மையிலேயே ரகசியமான அல்லது முக்கியமான தகவல்களைப் பகிர்ந்தது உறுதிப்படுத்தப்படவில்லை என அதிகாரிகள் தெரிவித்துள்ளனர். அந்தப் பெண் கைது செய்யப்படவில்லை என்றும் தகவல்கள் தெரிவிக்கின்றன. அவருடைய வெளிநாட்டுத் தொடர்புகள், தகவல்கள் பரிமாறப்பட்டதா, அப்படியானால் அவற்றின் தன்மை என்ன என்பது குறித்து விசாரணை தொடர்ந்து நடைபெற்று வருகிறது.

இதையும் படிங்க : கொல்கத்தா துர்கா பூஜை பந்தலில் கூட்ட நெரிசல்: 17 பேர் உயிரிழப்பு?