அ.தி.மு.க.வில் இருந்து 15 எம்.எல்.ஏ.க்கள் வருவார்களா? செங்கோட்டையன் விளக்கம்!

AIADMK MLA Controversy: “அதிமுகவில் இருந்து 15 எம்.எல்.ஏக்கள் வருவார்கள் எனக் கூறவில்லை” என அமைச்சர் செங்கோட்டையன் விளக்கம் அளித்துள்ளார்.

அமைச்சர் செங்கோட்டையன்

ByPushpa Gopinath

Published on: October 19, 2026 at 1:01 pm

சென்னை, அக்.19, 2026: அதிமுகவில் இருந்து 15 எம்.எல்.ஏக்கள் தமிழக வெற்றிக் கழகத்தில் (தவெக) இணைய உள்ளதாகத் தான் கூறவில்லை என்று தமிழக வருவாய்த் துறை அமைச்சர் செங்கோட்டையன் விளக்கம் அளித்துள்ளார். 15 பேர் தவெகவில் இணைய உள்ளதாக மட்டுமே தெரிவித்ததாகவும், அவர்கள் அதிமுக எம்.எல்.ஏக்கள் என்று குறிப்பிடவில்லை என்றும் அவர் கூறியுள்ளார்.

தவெகவில் 15 எம்.எல்.ஏக்கள் இணைய உள்ளதாக செங்கோட்டையன் கூறியதாகக் குற்றம்சாட்டிய அதிமுக, இதுதொடர்பாக ஆளுநரிடம் புகார் அளித்திருந்தது. இதற்குப் பதிலளித்த செங்கோட்டையன், தான் கூறாத கருத்தைத் திரித்துக் கூறி தன் மீது குற்றம்சாட்டுவதாகத் தெரிவித்தார்.

மேலும், அதிமுக பொதுச்செயலாளர் எடப்பாடி பழனிசாமியின் விமர்சனங்களுக்குப் பதிலளிக்க விரும்பவில்லை என்று கூறிய அவர், அதிமுகவின் உள்கட்சி பிரச்சினைகளை அக்கட்சியின் இரு தரப்பினரும் பேசி தீர்த்துக்கொள்ள வேண்டும் என்றார். அதிமுகவில் இருந்து தன்னை நீக்கியது தனக்கு சாதகமாக அமைந்ததாகவும், அக்கட்சியில் தொடர்ந்து இருந்திருந்தால் அமைச்சராகியிருக்க முடியாது என்றும் தெரிவித்தார்.

அரசியல் கட்சிகளுக்கு இடையே தலைவர்கள் மற்றும் உறுப்பினர்கள் மாறுவது வழக்கமான ஒன்றுதான் என்றும், ஒவ்வொரு கட்சி மாற்றத்தையும் குதிரை பேரம் என்று கூற முடியாது என்றும் செங்கோட்டையன் குறிப்பிட்டார். முன்னாள் முதலமைச்சர் ஜெயலலிதா ஆட்சிக் காலத்திலும் கட்சி மாறுதல்கள் நடைபெற்றதாகச் சுட்டிக்காட்டிய அவர், தன் மீதான குற்றச்சாட்டுகளை மறுத்தார்.

இதையும் படிங்க : மதம் மாறிய முஸ்லிம்களின் இடஒதுக்கீட்டைப் பாதுகாக்க சட்டத் திருத்தம்.. அமைச்சர் நிர்மல் குமார் உறுதி!