சென்னையில் ரூ.3,109 கோடியில் குடிநீர் திட்டம்.. முதலமைச்சர் விஜய் அடிக்கல்!

CM Vijay: சென்னையில் ரூ.3,109 கோடியில் குடிநீர் திட்டத்துக்கு, முதலமைச்சர் விஜய் அடிக்கல் நாட்டினார்.

குடிநீர் திட்டத்துக்கு அடிக்கல் நாட்டிய விஜய்

ByPushpa Gopinath

Published on: October 15, 2026 at 11:11 am

சென்னை, அக்.15, 2026:சென்னை மாநகரின் குடிநீர் விநியோகத்தை மேம்படுத்தும் வகையில், ரூ.3,108.55 கோடி மதிப்பிலான ‘ரிங் மெயின்’ குடிநீர் திட்டத்திற்கு முதலமைச்சர் சி. ஜோசப் விஜய் அடிக்கல் நாட்டினார். சோழிங்கநல்லூரில் உள்ள சென்னை குடிநீர் வாரியத்தின் நீரேற்று நிலையத்தில் இந்த நிகழ்ச்சி நடைபெற்றது. சென்னையில் வசிக்கும் சுமார் 91 லட்சம் மக்களின் குடிநீர் தேவையைப் பூர்த்தி செய்வதற்காக, தற்போது 143 விநியோக நிலையங்கள் மூலம் நாள்தோறும் 1,260 மில்லியன் லிட்டர் தண்ணீர் விநியோகிக்கப்படுகிறது. ஐந்து நீர்த்தேக்கங்கள், கிருஷ்ணா நதிநீர் மற்றும் கண்ணன்கோட்டை–தேர்வாய்கண்டிகை நீர்த்தேக்கம் ஆகியவை இதற்கான முக்கிய நீராதாரங்களாக உள்ளன.

தற்போது ஒவ்வொரு நீர் சுத்திகரிப்பு நிலையத்திலிருந்தும் குறிப்பிட்ட பகுதிகளுக்கு நேரடியாகக் குழாய்கள் மூலம் குடிநீர் அனுப்பப்படுகிறது. ஒரு நீராதாரத்தில் அல்லது விநியோகப் பாதையில் பாதிப்பு ஏற்பட்டால், மாற்றுப் பாதையில் தண்ணீரை அனுப்புவதற்கான வசதி குறைவாக உள்ளது. இந்தச் சிக்கலுக்குத் தீர்வு காணும் வகையில், ஐந்து நீர் சுத்திகரிப்பு நிலையங்கள், செயல்பாட்டில் உள்ள மூன்று கடல்நீரைக் குடிநீராக்கும் நிலையங்கள் மற்றும் பெரூரில் கட்டப்பட்டு வரும் 400 மில்லியன் லிட்டர் திறன் கொண்ட கடல்நீரைக் குடிநீராக்கும் நிலையம் என மொத்தம் ஒன்பது வசதிகளை இத்திட்டம் ஒருங்கிணைக்கும். இதன் மூலம் சென்னையின் பல்வேறு பகுதிகளுக்கும் தடையற்ற குடிநீர் விநியோகத்தை உறுதி செய்வதே திட்டத்தின் முக்கிய நோக்கமாகும்.

இத்திட்டத்தின் கீழ் 91.20 கிலோமீட்டர் நீளத்துக்கு ரிங் மெயின் குழாய்களும், 64.20 கிலோமீட்டர் நீளத்துக்கு பிரதான நீர்க் கடத்துக் குழாய்களும், 2.65 கிலோமீட்டர் நீளத்துக்கு நீரேற்று குழாய்களும் அமைக்கப்பட உள்ளன. மேலும், நீரின் அழுத்தம், ஓட்டம் மற்றும் தரத்தை நிகழ்நேரத்தில் கண்காணிக்கும் நவீன SCADA தொழில்நுட்பம் பயன்படுத்தப்படவுள்ளது. சென்னை குடிநீர் வாரியத்தின் கட்டுப்பாட்டு மையத்திலிருந்து இந்த அமைப்பு கண்காணிக்கப்படும். ஆசிய வளர்ச்சி வங்கியின் நிதியுதவியுடன் செயல்படுத்தப்படும் இத்திட்டத்தை 2031ஆம் ஆண்டுக்குள் நிறைவு செய்யத் திட்டமிடப்பட்டுள்ளது. இதன் மூலம் குடிநீர் விநியோகத்தில் ஏற்படும் தடைகளை விரைவாகச் சரிசெய்து, ஆண்டு முழுவதும் சீரான குடிநீர் விநியோகத்தை உறுதிப்படுத்த முடியும் என எதிர்பார்க்கப்படுகிறது.

இதையும் படிங்க : எஸ்ஐஆர் நடவடிக்கையில் மு.க.ஸ்டாலினுக்கு முக்கியப் பங்கு.. அமைச்சர் ஆதவ் அர்ஜுனா!