பீகாரில் படகு கவிழ்ந்து கோர விபத்து! குழந்தைகள் உட்பட 13 பேர் உயிரிழப்பு

Vaishali Boat Accident: பீகார் மாநிலம் வைஷாலி மாவட்டத்தில் கங்கை ஆற்றில் படகு கவிழ்ந்த விபத்தில் குழந்தைகள் உட்பட 13 பேர் உயிரிழந்தனர். விருந்து நிகழ்ச்சிக்காகப் படகில் சென்றவர்கள் விபத்தில் சிக்கிய நிலையில், உயிரிழந்தவர்களின் குடும்பங்களுக்கு மத்திய, மாநில அரசுகள் நிவாரண உதவிகளை அறிவித்துள்ளன.

வைஷாலி படகு விபத்து

BySaranya JK

Published on: October 14, 2026 at 1:04 pm

வைஷாலி, அக். 14 2026: பீகார் மாநிலம் வைஷாலி மாவட்டத்தில் கங்கை ஆற்றில் படகு கவிழ்ந்த விபத்தில் குழந்தைகள் உட்பட 13 பேர் உயிரிழந்தனர். ரகோபூர் பகுதியில் உள்ள ராம்பூர் சியாம்சந்த் கிராமத்தைச் சேர்ந்தவர்கள், ஆற்றின் மறுகரையில் நடைபெற்ற விருந்து நிகழ்ச்சியில் பங்கேற்பதற்காகப் படகில் சென்றபோது இந்தத் துயரச் சம்பவம் நிகழ்ந்தது. படகில் பயணம் செய்தவர்களில் பெரும்பாலானோர் குழந்தைகள் எனத் தெரிவிக்கப்பட்டுள்ளது.

கங்கை ஆற்றில் சென்றுகொண்டிருந்த படகு திடீரெனக் கவிழ்ந்ததில் அதில் இருந்தவர்கள் நீரில் மூழ்கினர். படகில் அதிகமானோர் பயணம் செய்ததே விபத்துக்குக் காரணமாக இருக்கலாம் என உள்ளூர் தகவல்கள் தெரிவிக்கின்றன. விபத்து குறித்து தகவல் கிடைத்ததும், காவல்துறையினர் மற்றும் மீட்புக் குழுவினர் சம்பவ இடத்துக்கு விரைந்தனர்.

விபத்தில் சிக்கியவர்களை மீட்க மாநிலப் பேரிடர் மீட்புப் படையினர், உள்ளூர் மக்கள் மற்றும் மீட்புக் குழுவினர் இணைந்து செயல்பட்டனர். வைஷாலி மாவட்ட ஆட்சியர் வர்ஷா சிங் வெளியிட்ட தகவலின்படி, 13 பேர் உயிரிழந்துள்ளனர். மீட்கப்பட்டவர்கள் சிகிச்சைக்காக மருத்துவமனைக்குக் கொண்டு செல்லப்பட்டனர். விபத்து தொடர்பான மீட்பு மற்றும் விசாரணைப் பணிகள் தொடர்ந்து மேற்கொள்ளப்பட்டன.

இந்த விபத்தில் உயிரிழந்தவர்களின் குடும்பங்களுக்கு பிரதமர் நரேந்திர மோடி இரங்கல் தெரிவித்துள்ளார். உயிரிழந்த ஒவ்வொருவரின் குடும்பத்துக்கும் பிரதமரின் தேசிய நிவாரண நிதியிலிருந்து ரூ.2 லட்சம் வழங்கப்படும் என்றும், காயமடைந்தவர்களுக்கு ரூ.50,000 வழங்கப்படும் என்றும் அறிவிக்கப்பட்டது. பீகார் முதலமைச்சர் சம்ராட் சௌத்ரியும் உயிரிழந்தவர்களின் குடும்பங்களுக்கு தலா ரூ.4 லட்சம் நிவாரண உதவி வழங்கப்படும் என அறிவித்துள்ளார்.

இதையும் படிங்க : எல். முருகன் திடீர் ராஜினாமா.. பரபரப்பு பின்னணி!