‘என் மகன்களை குறிவைக்கும் முயற்சி’.. இம்ரான் கான் முன்னாள் மனைவி ஜெமிமா!

Jemima: ‘என் மகன்களை குறிவைக்கும் முயற்சி’என பாகிஸ்தான் அமைச்சருக்கு இம்ரான் கான் முன்னாள் மனைவி ஜெமிமா பதிலடி கொடுத்துள்ளார்.

பாகிஸ்தான் முன்னாள் பிரதமர் இம்ரான் கான், முன்னாள் மனைவி ஜெமிமா

BySaranya JK

Published on: September 19, 2026 at 12:02 pm

இஸ்லாமாபாத், செப்.19, 2026: பாகிஸ்தான் முன்னாள் பிரதமர் இம்ரான் கானின் முன்னாள் மனைவியும், பிரிட்டனைச் சேர்ந்தவருமான ஜெமிமா கோல்ட்ஸ்மித், பாகிஸ்தான் பாதுகாப்புத்துறை அமைச்சர் கவாஜா ஆசிஃப்பின் கருத்துக்கு சமூக வலைதளமான எக்ஸ் தளத்தில் பதிலடி கொடுத்துள்ளார். இம்ரான் கானின் மகன்களை குறிவைத்து அமைச்சர் கருத்து தெரிவித்ததாகக் கூறப்படும் நிலையில், ஜெமிமா அதற்கு கடுமையான எதிர்வினையை பதிவு செய்துள்ளார்.

வியாழக்கிழமை எக்ஸ் தளத்தில் பதிவிட்ட கவாஜா ஆசிஃப், பிரதான யூத மத மரபின்படி ஒருவரின் யூத அடையாளம் தாய்வழி பரம்பரையின் அடிப்படையில் தீர்மானிக்கப்படுவதாகக் குறிப்பிட்டார். தாய் யூதராக இருந்தால், தந்தையின் மதம் எதுவாக இருந்தாலும் அந்த நபர் யூதராகக் கருதப்படுவார் என்றும் அவர் கூறினார். மேலும், தாய்மை உயிரியல் ரீதியாக உறுதியானது என்றும், தந்தைமை வரலாற்றில் உறுதிப்படுத்துவதில் சிக்கல்கள் இருந்ததாகவும் தனது பதிவில் அவர் குறிப்பிட்டிருந்தார்.

இந்தக் கருத்துக்கு பதிலளித்த ஜெமிமா கோல்ட்ஸ்மித், கவாஜா ஆசிஃப் கூறிய கொள்கை சரிதான் என்று முதலில் குறிப்பிட்டார். ஆனால், அதே விதியைப் பயன்படுத்தினால் தன்னை யூத சமூகமே யூதராக அங்கீகரிக்காது என்றும் அவர் தெரிவித்தார். தனது தாய் சர்ச் ஆஃப் இங்கிலாந்தைச் சேர்ந்த புராட்டஸ்டன்ட் கிறிஸ்தவர் என்றும், தனது தந்தையின் தாயார் பிரெஞ்சு கத்தோலிக்கர் என்றும் ஜெமிமா குறிப்பிட்டார். எனவே, அமைச்சர் முன்வைத்த அதே தர்க்கத்தின்படி தனது தந்தையும் யூதராகக் கருதப்பட முடியாது என்று அவர் கூறினார்.

மேலும், “எனது மகன்களை குறிவைக்கும் முயற்சியில், பாகிஸ்தான் பாதுகாப்புத்துறை அமைச்சர் மீண்டும் ஒரு சங்கடமான நிலையை உருவாக்கிக் கொண்டுள்ளார்” என்ற பொருளில் ஜெமிமா விமர்சித்தார். கவாஜா ஆசிஃப்பின் பதிவு இம்ரான் கானின் மகன்களான சுலைமான் இசா கான் மற்றும் காசிம் கானை நேரடியாகக் குறிப்பிடவில்லை என்றாலும், அவரது கருத்து அவர்களை மறைமுகமாகக் குறிவைப்பதாக ஜெமிமா கருதியதாக செய்திகள் தெரிவிக்கின்றன.

இம்ரான் கானும் ஜெமிமா கோல்ட்ஸ்மித்தும் 1995ஆம் ஆண்டு திருமணம் செய்து கொண்டு, 2004ஆம் ஆண்டு விவாகரத்து செய்தனர். இவர்களுக்கு சுலைமான் இசா மற்றும் காசிம் என இரு மகன்கள் உள்ளனர். யூத அடையாளம் குறித்த விவாதம், இம்ரான் கானின் அரசியல் வாழ்க்கையிலும் முன்னதாக பேசப்பட்ட விவகாரமாக இருந்துள்ளது. தற்போதைய சர்ச்சையில், யூத அடையாளம் தாய்வழியாக நிர்ணயிக்கப்படுகிறது என்ற அமைச்சரின் கருத்தையே மேற்கோள் காட்டி ஜெமிமா தனது மகன்களை குறிவைப்பதாகக் கூறப்படும் அணுகுமுறைக்கு பதிலளித்துள்ளார்.

இதையும் படிங்க : அமெரிக்காவில் சீக்கிய லாரி டிரைவருக்கு கத்திக்குத்து.. 45 வயதான அமெரிக்கர் கைது!