கடல்சார் பாதுகாப்புக்கு புதிய கூட்டணி… 14 நாடுகளை ஒருங்கிணைத்த சவுதி அரேபியா!

Saudi Maritime Alliance : மேற்கு ஆசியாவின் முக்கிய கடல் வழித்தடங்களில் கப்பல் போக்குவரத்து பாதுகாப்பை வலுப்படுத்தும் நோக்கில் சவுதி அரேபியா தலைமையில் 14 நாடுகள் இணைந்து புதிய பன்னாட்டு கடல்சார் பாதுகாப்பு கூட்டணியை உருவாக்கியுள்ளன.

14 நாடுகளை ஒருங்கிணைத்த சவுதி அரேபியா

BySaranya JK

Published on: July 31, 2026 at 11:45 am

ரியாத், ஜூலை 31 2026: மேற்கு ஆசியாவின் முக்கிய கடல் வழித்தடங்களில் கப்பல் போக்குவரத்து பாதுகாப்பை உறுதிப்படுத்தும் நோக்கில், சவுதி அரேபியா தலைமையில் 14 நாடுகள் இணைந்து பன்னாட்டு கடல்சார் பாதுகாப்பு கூட்டணியை உருவாக்கியுள்ளன. ரியாத்தில் நடைபெற்ற பல நாடுகளின் ராணுவ அதிகாரிகள் கலந்துகொண்ட ஆலோசனைக் கூட்டத்திற்குப் பிறகு இந்த அறிவிப்பு வெளியிடப்பட்டது.

கூட்டணி வெளியிட்டுள்ள அறிக்கையில், உலகளாவிய கடல்சார் பாதுகாப்புக்கு எழுந்துவரும் சவால்களை எதிர்கொள்வதற்கான ஒத்துழைப்பு அமைப்பாக இந்த கூட்டணி செயல்படும் என்று தெரிவிக்கப்பட்டுள்ளது. மேலும், கடல்சார் பாதுகாப்பை மேம்படுத்துதல், கப்பல்களின் சுதந்திரமான போக்குவரத்தை உறுதி செய்தல், சர்வதேச வர்த்தகப் பாதைகள் மற்றும் எரிசக்தி விநியோக வழித்தடங்களை பாதுகாத்தல் ஆகியவை இதன் முக்கிய நோக்கங்களாக குறிப்பிடப்பட்டுள்ளது.

சர்வதேச சட்டங்களுக்கு இணங்க, பாப் அல்-மந்தப் நீரிணை, செங்கடல் மற்றும் ஏடன் வளைகுடா பகுதிகளில் உள்ள பொதுவான கடல்சார் நலன்களை பாதுகாப்பதற்காக இந்த கூட்டணி செயல்படும் என்றும் தெரிவிக்கப்பட்டுள்ளது.

இந்த கூட்டணியின் நிறுவன உறுப்பினர்களாக சவுதி அரேபியா, குவைத், பஹ்ரைன், கத்தார், எகிப்து, ஜோர்டான், ஏமன், நைஜீரியா, சூடான், ஜிபூட்டி, சோமாலியா உள்ளிட்ட நாடுகள் இடம்பெற்றுள்ளன. இந்த கூட்டணி முற்றிலும் தற்காப்பு நோக்கத்திற்கானது என்றும், எந்த நாடு, கூட்டணி அல்லது சர்வதேச அமைப்பையும் குறிவைப்பதில்லை என்றும் உறுப்பினர் நாடுகள் தெரிவித்துள்ளன. மேலும், சவுதி அரேபியாவே இந்த கூட்டணியின் நிறுவன நாடாகவும், நிரந்தர தலைமையகமாகவும் செயல்படும் என்று அறிவிக்கப்பட்டுள்ளது.

இதையும் படிங்க : இந்தியா, சீனா முக்கிய குற்றவாளிகள்.. அமெரிக்கா புதிய மசோதா!