ராமாயண சீதைக்கு சுருள் முடி இல்லை.. சாய் பல்லவி கதாபாத்திரம் குறித்து டி.வி சீரியல் சீதை!

Sai Pallavi: நடிகை சாய் பல்லவி குறித்து, ராமானந்த் சாகரின் புகழ்பெற்ற தொலைக்காட்சி தொடரில் சீதாவாக நடித்த தீபிகா சிக்லியா தனது கருத்துகளை பகிர்ந்துள்ளார்.

நடிகை சாய் பல்லவி

ByThilahavathy P

Published on: July 24, 2026 at 5:56 pm

மும்பை, ஜூலை 24, 2026: நிதேஷ் திவாரி இயக்கத்தில் உருவாகும் ராமாயணம் திரைப்படம் இந்தியத் திரையுலகில் மிகப்பெரிய எதிர்பார்ப்பை ஏற்படுத்தியுள்ளது. இதில் ரன்பீர் கபூர் ராமராகவும், சாய் பல்லவி சீதையாகவும் நடிக்கிறார். இந்த தேர்வைப் பற்றி, ராமானந்த் சாகரின் புகழ்பெற்ற தொலைக்காட்சி தொடரில் சீதாவாக நடித்த தீபிகா சிக்லியா தனது கருத்துகளை பகிர்ந்துள்ளார்.

தீபிகா, “சாய் பல்லவி ஒரு மிகச்சிறந்த நடிகை. ஆனால் சீதையாக அவர் எப்படித் தெரிவார் என்பதைப் பார்த்த பிறகே தெரியும். துளசிதாசரின் ராமாயணத்தில் சீதைக்கு பாதாம் வடிவ கண்கள், குறிப்பிட்ட உயரம், முடி மற்றும் சரும அமைப்பு ஆகியவை குறிப்பிடப்பட்டிருந்தன. ராமானந்த் சாகர் அதற்கேற்ற தோற்றத்தைக் கண்டுபிடித்தார். ராமாயணத்தில் சுருள் முடி கொண்ட சீதாவைப் பற்றிய குறிப்பு எதுவும் இல்லை” என்று கூறினார்.

அவர் மேலும், “நாங்கள் யார் என்பதாலேயே அறியப்படுகிறோம். நான் ‘சீதா’வாக அறியப்படுகிறேன். சிலர் என் பெயரை மறந்தாலும், சீதாவாக நடித்ததை நினைவில் வைத்திருக்கிறார்கள். அந்தப் பிம்பத்தை அழிப்பது மிகவும் கடினம். புதிய தலைமுறையினரும் எங்கள் தொடரைப் பார்த்ததால், அதன் தாக்கம் மிக அதிகம்” என்று குறிப்பிட்டார்.

இந்த திரைப்படம் இரண்டு பாகங்களாக வெளியாக உள்ளது. முதல் பாகம் 2026 தீபாவளியில் திரையரங்குகளில் வெளியாகும்; இரண்டாம் பாகம் 2027-ல் வெளியாகும் என எதிர்பார்க்கப்படுகிறது. சுமார் ₹4,000 கோடி பட்ஜெட்டில் உருவாகும் இப்படத்தில், ரன்பீர் கபூர், சாய் பல்லவி, யாஷ் உள்ளிட்டோர் நடிக்கின்றனர். இசைக்காக ஹான்ஸ் ஜிம்மர் மற்றும் ஏ.ஆர். ரஹ்மான் இணைந்து பணியாற்றுகின்றனர்.

இதையும் படிங்க : ஜனநாயகன் முதல் நாள் வசூல்.. எத்தனை கோடிகள் தெரியுமா? பாக்ஸ்ஆபிஸில் எப்படி?