Gujarat 2008 blasts: ஒரே வழக்கில் 38 பேருக்கு மரண தண்டனை.. குஜராத் ஐகோர்ட் உறுதி!

Gujarat 2008 blasts: 2008 குஜராத் கலவர வழக்கில், 38 பேரின் மரண தண்டனையை மாநில ஐகோர்ட் உறுதி செய்துள்ளது.

மரண தண்டனை

BySaranya JK

Published on: July 7, 2026 at 4:30 pm

அகமதாபாத், ஜூலை 7, 2026: 2008 அகமதாபாத் தொடர் குண்டுவெடிப்பு வழக்கில், குஜராத் உயர் நீதிமன்றம் வரலாற்றுச் சிறப்புமிக்க தீர்ப்பை வழங்கியுள்ளது. 56 பேரின் உயிரைப் பறித்து, 246 பேரை காயப்படுத்திய இந்த வழக்கில், 2022-இல் சிறப்பு நீதிமன்றம் 38 பேருக்கு மரண தண்டனையும், 11 பேருக்கு ஆயுள் தண்டனையும் விதித்திருந்தது. அந்த உத்தரவை உயர் நீதிமன்றம் செவ்வாய்க்கிழமை உறுதி செய்தது. ஒரே வழக்கில் 38 பேருக்கு மரண தண்டனை விதிக்கப்பட்டது இந்திய நீதித்துறையில் இதுவே முதல் முறை.

2008 ஜூலை 26 அன்று, அகமதாபாத்தில் 20 இடங்களில் 70 நிமிட இடைவெளிக்குள் 21 குண்டுகள் வெடித்தன. இரண்டு நாட்களுக்குப் பிறகு சூரத் நகரில் வெடிக்காத நிலையில் இருந்த குண்டுகள் கண்டெடுக்கப்பட்டன. நகரக் குற்றப்பிரிவு காவல்துறையினர் 100-க்கும் மேற்பட்டோரை குற்றவாளிகளாகப் பட்டியலிட்டனர்; இவர்களில் 78 பேருக்கு எதிராக விசாரணை நடத்தப்பட்டது.

இந்த வழக்கில் 35 தனித்தனியான வழக்குகள் ஒன்றிணைக்கப்பட்டு விசாரணை நடைபெற்றது. இந்திய தண்டனைச் சட்டம், சட்டவிரோத நடவடிக்கைகள் (தடுப்பு) சட்டம், வெடிபொருள் சட்டம் மற்றும் பொதுச் சொத்து சேதத் தடுப்புச் சட்டம் ஆகியவற்றின் கீழ் குற்றவாளிகள் தண்டிக்கப்பட்டனர். பல ஆண்டுகளாக ஒன்பது நீதிபதிகள் விசாரித்த இந்த வழக்கில், அரசுத் தரப்பு 1,163 சாட்சிகளை விசாரித்தது. பாதுகாப்பு காரணங்களுக்காக 26 முக்கிய சாட்சிகளின் அடையாளங்கள் ரகசியமாக வைக்கப்பட்டன.

உயர் நீதிமன்றம், உயிரிழந்தவர்களின் குடும்பங்களுக்கு ₹10 லட்சம், பலத்த காயமடைந்தவர்களுக்கு ₹5 லட்சம் மற்றும் லேசான காயமடைந்தவர்களுக்கு ₹1 லட்சம் என இழப்பீடு வழங்குமாறு குஜராத் அரசுக்கு உத்தரவிட்டது. இந்த தொகை 2027 மார்ச் 31-ஆம் தேதிக்குள் வழங்கப்பட வேண்டும். 2022-இல் சிறப்பு நீதிமன்றம் நிர்ணயித்த தொகையை விட இம்முறை இழப்பீடு கணிசமாக அதிகரிக்கப்பட்டுள்ளது.

பிப்ரவரி 8, 2022 அன்று, சிறப்பு நீதிமன்றம் 49 பேருக்கு தண்டனை விதித்ததுடன், 28 பேரை விடுதலை செய்தது. இவ்வழக்கு இந்திய நீதித்துறையின் மிகப்பெரிய மற்றும் நீண்டகால விசாரணைகளில் ஒன்றாகும். இந்த தீர்ப்பு, பாதிக்கப்பட்ட குடும்பங்களுக்கு நீதி வழங்குவதோடு, நாட்டின் பாதுகாப்பு மற்றும் சட்டத்தின் கடுமையை வலியுறுத்துகிறது.

இதையும் படிங்க : கேரளத்தின் வயநாட்டுக்கு ரெட் அலர்ட்.. நிலச்சரிவுக்கு ஒருவர் பலி.. பரபரப்பு தகவல்கள்!